តើមានមូលហេតុចម្បងអ្វីខ្លះដែលបង្កឲ្យមានការបែកញើសលើបាតដៃគ្រប់ពេលវេលា?
TRAVEL & LIVING 5 years agoមនុស្សភាគច្រើនតែងពុំចាប់អារម្មណ៍ជាមួយនឹងសំណើមដែលមានលើបាតដៃនោះទេ ផ្ទុយទៅវិញគេថែមទាំងគិតថា វាគ្រាន់តែជាបញ្ហាដ៏សាមញ្ញតូចមួយតែប៉ុណ្ណោះដែលបណ្តាលមកពីអាកាសធាតុត្រជាក់ពេក ឬក្តៅពេកទើបបង្កឲ្យមានសំណើមកើតឡើង ដូច្នេះជាមួយនឹងបញ្ហាដដែលនេះហើយទើបមនុស្សម្នាគ្រប់រូបពុំសូវបានខ្វល់ខ្វាយនឹងបញ្ហានេះ។ យ៉ាងណាមិញ តាមការស្រាវជ្រាវរបស់គេហទំព័រសុខភាពមួយនៃសហរដ្ឋអាមេរិកបានឲ្យដឹងផងដែរថា ការបែកញើស ឬមានសំណើមលើបាតដៃនេះ គឺជាបញ្ហាដ៏ធំមួយដែលមនុស្សគ្រប់រូបគួរតែយកចិត្តទុកដាក់ខ្ពស់។ ហេតុនេះ សូវរីន នឹងបង្ហាញប្រិយមិត្តពីកត្តាចម្បងមួយចំនួនដែល បង្កឲ្យមានការបែកញើសលើបាតដៃដូចខាងក្រោម៖
១. ការទទួលទានជាតិអាកុលហួសកម្រិត
ប្រសិនបើអ្នកទទួលទានភេសជ្ជៈ មានជាតិអាកុលច្រើនហួសកម្រិតបរិមាណវានឹងធ្វើឲ្យសរសៃឈាមក្នុងសរីរាង្គកាន់តែរីកធំបន្តិចម្តងៗ ហើយធ្វើឲ្យមានកម្ដៅលើស្បែករបស់អ្នក។ ហេតុនេះវាបណ្តាលឲ្យប្រព័ន្ធប្រសាទប៉ារ៉ាស៊ីតរបស់អ្នកចាប់ផ្តើមបែក ញើសជាបន្តបន្ទាប់។ យ៉ាងណាមិញចំពោះអ្នកដែលមានការបែកញើសលើបាតដៃរួច មិនគួរបរិភោគនូវជាតិអាកុលនោះទេ។
២. របបទទួលទានអាហារ
អាហារដែលមានសារធាតុហឹរ ឬភេសជ្ជៈដែលមានសារជាតិកាហ្វេអ៊ីន សុទ្ធតែជាប្រភពធ្វើឲ្យបាតដៃរបស់អ្នកបែកញើសយ៉ាងឆាប់រហ័ស។ ក៏ព្រោះតែវាធ្វើឲ្យ ប្រព័ន្ធសរសៃប្រសាទរំញោច និងអាស៊ីតអាសេទិក ផលិតទឹកកាន់តែច្រើនហួសកម្រិត ដូច្នេះវាបានបណ្តាលឲ្យក្រពេញញើសត្រូវបញ្ចេញជាតិទឹកតាមបាតដៃឥតឈប់ឈរ។ ដោយឡែក មុននឹងអ្នកទទួលទានរបបអាហារគួរតែប្រាកដថា អាហារនោះមិនមានសារធាតុទាំងនេះ ប្រសិនបើអ្នកកំពុងស្ថិតនៅក្នុងស្ថានភាពនេះ អ្នកគួរតែកាត់បន្ថយការទទួលទានប្រភេទទាំងនេះជាបន្ទាន់។
៣. ការជក់បារី
ផ្សែងបារី ក៏ជាចំណែកមួយនៃការបង្កឲ្យមានសំណើមលើបាតដៃជានិច្ចផងដែរ។ នៅពេលសារជាតិនីកូទីនក្នុងបារីបានជ្រាបចូលក្នុងសរីរាង្គហើយ វាបានភ្ជាប់ទៅនឹងណឺរ៉ូននៃប្រព័ន្ធសរសៃប្រសាទរបស់អ្នក។បន្ទាប់មកទៀត រំញោចក្រពេញញើសនឹងកាន់តែផលិតទឹកកាន់តែច្រើនជារៀងរាល់ថ្ងៃ។
៤. ហ្សែន
ហ្សែន ជាកត្តាមួយដែលគួរឲ្យកត់សម្គាល់បំផុតក្នុងចំណោមកត្តាចម្បងដែលបង្កឲ្យមានការបែកញើសបាតដៃនេះ ព្រោះតែអ្នកដែលមានអាការៈនឹងមិនអាចជាសះស្បើយបានឡើយ បើទោះបីជាបានទទួលនូវការព្យាបាលពីគ្រូពេទ្យជំនាញក៏ដោយ។ ដោយឡែក បើយោងតាមការស្រាវជ្រាវផ្នែកវេជ្ជសាស្ត្រនៃសាកលវិទ្យាល័យកាលីហ្វ័រញ៉ា (University of California) ក្នុងឆ្នាំ២០០២ បានឲ្យដឹងថា អត្រាហ្សែនរបស់អ្នកដែលមានអាការៈបែបនេះមានការធ្លាក់ចុះយ៉ាងខ្លាំង ហើយចំពោះហានិភ័យដែលកើតឡើងក៏នៅមានតិចនៅឡើយ។
ខាងលើនេះ ជាកត្តាដែលចម្បងបំផុតដែលក្រុមស្រាវជ្រាវបានរកឃើញថា វាតែងតែកើតឡើងជាញឹកញាប់។ ម៉្យាងវិញទៀត រាល់ពេលដែលមានសំណើមលើបាតដៃនេះវាក៏ជាកត្តាមួយដែលអាចបំផ្លាញនូវឱកាសដ៏ល្អរបស់អ្នកនឹងមនុស្សជាទីស្រឡាញ់របស់អ្នក ហើយថែមទាំងធ្វើឲ្យបាតដៃមានជាប់ធូលី ឬបង្កមេរោគផងដែរ។ ដូច្នេះ អ្នកដែលពុំទាន់មានអាការៈនេះគួរតែមានការយកចិត្តទុកដាក់ខ្ពស់ជាមួយនឹងសកម្មភាពរស់នៅប្រចាំថ្ងៃ និងរបបអាហារមួយចំនួន ដើម្បីបង្ការ ឬទប់ស្កាត់កុំឲ្យកើតមានការបែកញើសដៃទើបជាការប្រសើរ៕
Article by PAN SIVLY