ជនជាតិជប៉ុនមួយរូបបង្រៀនសិស្សខ្មែរពីរបៀបដាំតែតាមបែបធម្មជាតិក្នុងសាលាដើម្បីរកប្រាក់កម្រៃ
NEWS 5 years agoដូចដែលអ្នកគ្រប់គ្នាបានដឹងហើយថា ប្រទេសជប៉ុនតែងផ្តល់ជំនួយឥតសំណងដ៏ច្រើនលើសលុប មកកាន់ប្រទេសកម្ពុជា ដើម្បីផ្គត់ផ្គង់នូវចន្លោះខ្វះខាតមួយចំនួនដែលមាននៅក្នុងប្រទេស។ តួយ៉ាង ក្នុងវិស័យអប់រំ គេតែងសង្កេតឃើញថាជប៉ុនតែងឧបត្ថម្ភនូវសម្ភារសិក្សា ក៏ដូចជាផ្តល់នូវអាហារូបករណ៍ជាច្រើនពីមួយឆ្នាំ ទៅមួយឆ្នាំតាមរយៈសាលារៀន ឬសាកលវិទ្យាល័យនីមួយៗក្នុងប្រទេសកម្ពុជា ដើម្បីផ្តល់ឱកាស សម្រាប់សិស្សានុសិស្សក្រីក្ររបស់កម្ពុជាផងដែរ។ ជាមួយគ្នានេះ ជនជាតិជប៉ុនមួយចំនួនដែលបានមកទស្សនាប្រទេសកម្ពុជាបានសំលឹងមើលឃើញពីសក្តានុពលនិងភូមិសាស្ត្រក៏អំណោយផលរបស់ប្រទេសកម្ពុជាដែលអាចកែច្នៃក្លាយជាអ្វីមួយ តួយ៉ាងដូចជាជនជាតិជប៉ុនមួយរូបបានរកឃើញនូវវិធីសាស្រ្តថ្មីមួយដែលអាចបង្រៀនសិស្សានុសិស្សតាមបណ្តាខេត្តពីរបៀបដាំតែធម្មជាតិ រួមទាំងផ្តល់នូវប្រាក់កម្រៃដល់ពួកគេទៀតផង។
អ្នកនាង Michie Nishiguchi
ជំនួបជាមួយនឹង អ្នកនាង Michie Nishiguchi ស្ថាបនិកា និងអ្នកគ្រប់គ្រងទូទៅនៃ «Demeter Tea» បានបង្ហាញនូវបទពិសោធន៍ និងទស្សនៈវិស័យដ៏សំខាន់មួយចំនួននៅពេលដែលអ្នកនាងបានចុះទស្សនកិច្ចសិក្សាលើកដំបូងនៅអនុវិទ្យាល័យ បាយ័ន ខេត្តសៀមរាប។ អ្នកនាងបានឲ្យដឹងផងដែរថា អំឡុង ពេលដែលអ្នកនាងបានចុះទស្សនកិច្ចសិក្សានោះ បានឃើញសំរាមរប៉ាត់រប៉ាយច្រើនលើដីស្ទើរតែគ្រប់ទីកកន្លែង ដោយហេតុនេះហើយ ទើបអ្នកនាងបានចាប់ផ្តើមរកវិធីសាស្ត្រមួយចំនួន ដើម្បីប្រើប្រាស់បរិវេណដីទាំងនោះឲ្យមានសោភ័ណភាព ថែមទាំងផ្តល់នូវអត្ថប្រយោជន៍សំខាន់ៗមួយចំនួនសម្រាប់សុខភាព និងសម្រាប់មនុស្សទូទៅ។ តាមរយៈការស្រាវជ្រាវមួយចំនួនរបស់អ្នកនាង ទាក់ទងទៅនឹងគោលគំនិតដែលបានគ្រោងទុកនោះ អ្នកនាង Michie Nishiguchi បានរកឃើញថា កម្ពុជាមានថ្នាំបុរាណច្រើនប្រភេទដែលអាចព្យាបាលជំងឺច្រើនមុខ។ ដូច្នេះ អ្នកនាង ចាប់ផ្តើម សាកល្បងដាំតែ ធម្មជាតិ ដែលអាចផ្តល់នូវអត្ថប្រយោជន៍ច្រើនចំពោះសុខភាព ហើយថែមទាំងជួយដល់បរិវេណនៃសាលារៀននោះឲ្យមានភាពទាក់ទាញ និងមានសោភ័ណភាពបន្ថែមទៀតផង។ អ្នកនាង Michie Nishiguchi បានលើកឡើងថា «មុននឹងខ្ញុំចាប់ផ្តើមគម្រោងរបស់ខ្ញុំនោះ ខ្ញុំក៏បានចុះកម្មសិក្សានៅអនុវិទ្យាល័យ បាយ័ន ខេត្តសៀមរាបចំនួនមួយឆ្នាំ [….] ក្រោយពីខ្ញុំបានចុះកម្មសិក្សារួច ខ្ញុំបានសុំការអនុញ្ញាតពីនាយកសាលា ដើម្បីបង្រៀនសិស្សានុសិស្សដែលនៅ ទីនោះចេះពីរបៀបដាំ តែ រយៈពេលស្រោចទឹក និងរយៈពេលដែលត្រូវប្រមូលផល តែ ទាំងនោះ»។ ម៉្យាងវិញទៀត អ្នកនាងបានឲ្យដឹងថា បន្ទាប់ពីសិស្សានុសិស្សបានប្រមូលផល តែ ទាំងនោះរួច អ្នកនាងបានផ្តល់នូវប្រាក់កម្រៃដល់ពួកគេ ដើម្បីផ្គត់ផ្គង់ជីវភាពរស់នៅ ឬប្រើប្រាស់សម្រាប់ទិញសម្ភារផ្សេងៗក្នុងសាលារៀន។ មិនត្រឹមតែប៉ុណ្ណោះ លោកគ្រូ អ្នកគ្រូ សិស្សានុសិស្ស ទាំងអស់ក៏បានចាប់ផ្តើមយកចិត្តទុកដាក់ជាមួយនឹងការថែទាំបរិស្ថានឲ្យបានស្អាត និងមានសោភ័ណច្រើនជាងមុន។
គួរជម្រាបផងដែរថា ក្នុងគម្រោងនៃការបង្ហាត់បង្រៀនដាំ តែ ហើយថែមទាំងផ្តល់ឱកាសដល់សិស្សានុសិស្សអាចរកប្រាក់កម្រៃអំឡុងសិក្សានេះ បានផ្សារភ្ជាប់ទៅនឹងគោលបំណងបីសំខាន់ៗ។ គោលបំណងទីមួយគឺ ការផ្តោតសំខាន់លើ ការបង្កើតសួនរុក្ខជាតិពោរពេញទៅដោយភាពស្រស់បំព្រង រីឯគោលបំណងទីពីរ ជាការផ្តល់ឱកាសឲ្យកុមារសិក្សាពីវប្បធម៌ប្រពៃណីនៃការដាំដុះរុក្ខជាតិ និងគោលបំណងទីបីនោះគឺ ការបង្កើតប្រាក់ចំណូល តាមរយៈការដាំដុះ ហើយផលដែលប្រមូលបានទាំងនោះគឺជាគុណប្រយោជន៍ដែលមានលើទឹកដីផងដែរ៕
Article by PAN SIVLY