Sovrin
Sovrin
ចុងឆ្នាំទៅលេងសហគមន៍ជីរោទ៍ ស្នាក់នៅផ្ទះប្ញស្សី មើលសិល្បៈកុមារ និងស្វែងយល់ចំណេះដឹងបរិស្ថាន
TRAVEL & LIVING 4 years ago
បើនិយាយពីត្រើយខាងកើតនៃដងទន្លេមេគង្គខេត្តកំពង់ចាម ដែលសព្វថ្ងៃត្រូវបានកាត់បញ្ចូលក្នុងទឹកដីខេត្តត្បូងឃ្មុំទៅហើយនោះ ទេសចរទាំងឡាយច្បាស់ជាមិនភ្លេចនូវសម្រស់ដ៏ស្រស់ត្រកាលនៃស្ពានគីហ្ស៊ូណា និង តួប៉មបុរាណបន្សល់ទុកតាំងពីសម័យអាណានិគមនិយមបារាំងដែលមើលពីចម្ងាយឃើញរះត្រដែតផុតចុងព្រឹក្សាប្របតាមបណ្តោយដងទន្លេ ។ នៅចំណុចភូមិសាស្រ្តតំបន់នោះ សព្វថ្ងៃភ្ញៀវទេសចរច្រើនតែនិយមទៅលេងកម្សាន្តរយៈពេលខ្លីនៅរមណីយដ្ឋានសួនផ្កាឈូករ័ត្ននៅឃុំជីរោទ៍ទី១ ឬទៅអង្គុយហូបអាហារ សម្រន់បែបស្រុកស្រែខ្ចៅខ្យងកំពឹសក្តាមនៅតំបន់ស្ពានមាត់ឃ្មង់ ឃុំជីរោទ៍ទី២ ។ ប៉ុន្តែប្រសិនបើលោកអ្នកចង់ពន្យារពេលនៃដំណើរកម្សាន្តនៅតំបន់នោះឲ្យកាន់តែយូរកាន់តែសប្បាយថែមទៀតនោះ សូវរីនសូមណែនាំសហគមន៍ទេសចរណ៍មួយកន្លែងដែលកំពុងលាក់ខ្លួនពួនសម្រស់នៅក្បែរម្លប់ប្ញស្សីត្រឈឹងត្រឈៃជាប់មាត់ទន្លេយ៉ាងស្ងប់មនោរម្យ តែសម្បូរសកម្មភាពកម្សាន្តសប្បាយជាច្រើនសម្រាប់ភ្ញៀវទេសចរជាតិនិងអន្តរជាតិ ផ្សារភ្ជាប់នឹងការអប់រំ ការយល់ដឹងអំពីបរិស្ថាន និង វប្បធម៌ប្រចាំតំបន់។
សហគមន៍ទេសចរណ៍ដែលយើងកំពុងនិយាយនេះមានឈ្មោះថា “ផ្ទះស្នាក់ជីរោទ៍” មានទីតាំងស្ថិតនៅភូមិជីរោទ៍ ឃុំជីរោទ៍ទី១ ស្រុកត្បូងឃ្មុំ ខេត្តត្បូងឃ្មុំ ដែលត្រូវបានបង្កើតឡើងដោយអង្គការមិនមែនរដ្ឋា ភិបាលមួយឈ្មោះថា“អង្គការបណ្តុះបណ្តាលថ្នាក់មូលដ្ឋាន” ហៅកាត់ថា អង្គការអូប៊ីធី (OBT) ។ លក្ខណៈពិសេសនៃសេវាកម្មស្នាក់នៅរបស់អង្គការនេះ គឺត្រង់ថា លោកអ្នកអាចជ្រើសរើសរវាងការស្នាក់នៅបែបផ្ទះស្នាក់ផ្ទាល់ជាមួយប្រជាជនក្នុងតំបន់ និង ការស្នាក់នៅក្នុងផ្ទះបាំងហ្គាឡូធ្វើអំពីប្ញស្សី ដែលផ្ទះស្នាក់រចនាបថបែបនេះមានតែមួយទីតាំងគត់នៅប្រទេសកម្ពុជា។ផ្ទះបាំងហ្គាឡូនៅទីនោះមានចំនួន៤ខ្នងដែលមានឈ្មោះ ខុសៗគ្នាហើយក៏មានលក្ខណៈពិសេសរៀងៗខ្លួនផងដែរ ក្នុងនោះរួមមាន បាំងហ្គាឡូស្កាយ បាំងហ្គាឡូប្ញស្សី បាំងហ្គាឡូចេកនិងល្ហុង និង បាំងហ្គាឡូមាត់ទន្លេ។
បាំងហ្គាឡូស្កាយសម្រាប់អ្នកដែលត្រូវការភាពស្ងប់ស្ងាត់បំផុត ព្រោះវាស្ថិតនៅចំកណ្តាលចម្ការប៉េងប៉ោះ។ បាំងហ្គាឡូប្ញស្សីសម្រាប់អ្នកមិនសូវចូលចិត្តដើរឆ្ងាយ ព្រោះវាស្ថិតនៅជាប់សាលារៀន និង បណ្ណាល័យសហគមន៍ ជិតផ្លូវជាតិជាងគេបំផុត ហើយក៏សម្រាប់អ្នកស្រឡាញ់ស្ថាបត្យកម្មប្រពៃណីផងដែរ ព្រោះវាត្រូវបានសាងសង់តាមលំនាំរចនាបថផ្ទះរោងដោលខ្មែរ។ រីឯបាំងហ្គាឡូចេកនិងល្ហុងសម្រាប់អ្នកគេងលម្ហែយោលអង្រឹងបែបផ្ទះចម្ការ គយគន់កសិផលដំណាំសរីរាង្គចម្រុះរបស់សហគមន៍ ។ ដោយឡែកបាំងហ្គាឡូមាត់ទន្លេ សម្រាប់អ្នកចូលចិត្តស្រូបយកខ្យល់អាកាសមាត់ទន្លេដ៏បរិសុទ្ធ និង ទស្សនាទិដ្ឋភាពថ្ងៃលិច ប៉ុន្តែជម្រើសចុងក្រោយនេះសម្រាប់ទេសចរជាក្រុម ព្រោះវាមានទំហំធំ អាចផ្ទុកភ្ញៀវបានរហូតដល់៨នាក់។
លើសពីនេះ សូវរីនមានអ្វីច្រើនដែលចង់ចែករំលែកជាមួយមិត្តអ្នកអាន ព្រោះបទពិសោធន៍ទទួល ទានអាហារនៅភោជនីយដ្ឋានសហគមន៍មានលក្ខណៈប្លែកទាំងបរិយាកាស ទាំងជម្រើសអាហារ និង រសជាតិដែលពិបាកនឹងបំភ្លេច។ មុនពេលទៅដល់ទីនោះ លោកអ្នកត្រូវទាក់ទងជាមួយខាងសហគមន៍ជាមួយសិនដើម្បីឲ្យខាងគេរៀបចំក្រុមសិល្បៈកុមារប្រចាំសហគមន៍មកសម្តែងកំដរបរិយាកាសមុនឬក្រោយពេលលោកអ្នកទទួលទានអាហារនៅទីនោះ។ កុមារនៅទីនោះមើលទៅឆ្លាតៗគួរឲ្យស្រឡាញ់ខ្លាំងណាស់ពីព្រោះពួកគេត្រូវបានបណ្តុះបណ្តាលក្នុងថ្នាក់តន្រ្តីរបស់អង្គការ OBT ជាប្រចាំ ហើយពួកគេក៏បានទទួលការអប់រំក្រៅប្រព័ន្ធជាភាសាអង់គ្លេសផងដែរតាមរយៈគ្រូជនជាតិបរទេសស្ម័គ្រចិត្តដែលបានមកសិក្សាស្រាវជ្រាវឬ បំពេញគម្រោងការងាររយៈពេលខ្លីនៅសហគមន៍ឃុំជីរោទ៍នេះ។ ហេតុនេះហើយទើបក្មេងៗនៅទីនោះហាក់មានភាពស្និទ្ធស្នាលបើកចិត្តទូលាយជាមួយជនបរទេសនិងភ្ញៀវមកពីខាងក្រៅ ស្តែងឲ្យឃើញឡើងតាមរយៈទឹកមុខញញឹមញញែមសប្បាយរីករាយនិងទំនុកចិត្តក្នុងការសម្តែងសិល្បៈ។ ពួកគេអាចលេងឧបករណ៍តន្រ្តីខ្មែរបុរាណជាច្រើន ដូចជា ; ខ្លុយ រនាត ស្គរ តាខេ ឃឹម និង ទ្រ ជាដើម។ របាំដែលគេនិយមសម្តែងជូនភ្ញៀវទស្សនានៅសហគមន៍នេះមាន តួយ៉ាង របាំគោះអង្រែ របាំនេសាទ របាំឆៃយ៉ាំ និង របាំគោះត្រឡោក។ល។
ម្ហូបល្បីបំផុតប្រចាំសហគមន៍នេះដែលភ្ញៀវគ្រប់រូបមិនគួរមើលរំលងនោះគឺ ត្រីដំ។ ចំពោះមុខម្ហូបនេះសាច់ត្រីជាគ្រឿងផ្សំសំខាន់បំផុតនោះ ហើយប្រជាជនសហគមន៍ជីរោទ៍និយមជ្រើសរើសត្រីរៀល ដោយសារត្រីរៀលមានរសជាតិឆ្ងាញ់សាច់ផ្អែមចូលជាតិល្អសម្រាប់មុខម្ហូបត្រីដំនេះជាងគេ។ គេត្រូវទទួលទានម្ហូបនេះគួបផ្សំនឹងអន្លក់ស្រស់ៗជាច្រើនមុខដូចជា ស្លឹកកន្ទួត ស្លឹកម្កាក់ ត្រួយរាំង ស្ពៃក្តោប សណ្តែកកួរ ត្រសក់ និង ជីរគ្រប់មុខ។ ជាពិសេស តាមប្រពៃណីតំបន់នោះ ម្ហូបត្រីដំនេះត្រូវតែទទួលទានជាមួយស្រាស។ ក្រៅពីម្ហូបត្រីដំនេះ នៅមានម្ហូបស្រុកស្រែជាច្រើនទៀតដែលលោកអ្នកអាចជ្រើសរើសបាន ដូចជា មាន់ស្រែដុត ទឹកគ្រឿងអន្លក់ស្រស់ សម្លម្ជូរស្រែកូនត្រី និង សម្លម្ជូរដើមចេក។ ក្រោយពីទទួលទានអាហាររួច ភ្ញៀវអាចនាំគ្នាដើរទស្សនាវត្ថុសិប្បកម្មច្នៃពីត្រឡោកដូង និងដើមប្ញស្សីធ្វើដោយដៃប្រជាសហគមន៍ផ្ទាល់ ដែលក្នុងនោះរួមមាន កែវទឹកប្ញស្សី ទម្រជើងទៀននិងប៉ាន់តែធ្វើពីត្រឡោកដូង ព្រមទាំងវត្ថុអនុស្សាវរីយ៍រូបសត្វកែច្នៃ ។
ភ្ញៀវដែលមកទីនេះអាចស្នាក់នៅបានយូរថ្ងៃ ព្រោះពួកគេមិនត្រឹមតែមកស្នាក់នៅ និង ទទួលទានអាហារនោះទេ ប៉ុន្តែពួកគេអាចធ្វើសកម្មភាពទេសចរណ៍ជាច្រើនដែលផ្សារភ្ជាប់នឹងជីវិតរស់នៅរបស់អ្នកស្រុកទន្លេពិតៗ រួមមាន ការជិះកង់ទស្សនាភូមិអ្នកស្រុក ការនេសាទត្រីជាមួយអ្នកនេសាទជនជាតិចាម ការជិះរទេះគោជាមួយអ្នកភូមិ ការប្រមូលផលដំណាំតាមរដូវកាលនិងការរៀនធ្វើម្ហូបជាមួយចុងភៅសហគមន៍។ អ្វីដែលសំខាន់បំផុតដែលសហគមន៍កំពុងធ្វើយ៉ាងសស្រាក់សស្រាំ ហើយចង់ទាក់ទាញចំណាប់អារម្មណ៍ភ្ញៀវគ្រប់រូបដែលមកទីនេះនោះគឺ គម្រោងកែច្នៃសម្រាម ដែលមានលក្ខណៈពិសេសត្រង់ថា កុមារដែលមកសិក្សានៅទីនេះទាំងអស់ត្រូវតែយកសម្រាមមកបង់ជំនួសថ្លៃសិក្សាជាដាច់ខាតដើម្បីជួយកាត់បន្ថយកាកសំណល់នៅក្នុងតំបន់ក៏ដូចជាជួយលើកកម្ពស់ការយល់ដឹងជាសាធារណៈចំពោះបញ្ហាបរិស្ថាន។ សម្រាមដែលប្រមូលមកបានត្រូវបានយកទៅកែច្នៃក្នុងទីតាំងឡកែច្នៃដែលមានចម្ងាយប្រមាណត្រឹមមួយគីឡូម៉ែត្រពីផ្ទះស្នាក់។ នៅក្នុងរោងឡកែច្នៃ សម្រាមប្លាស្ទិកត្រូវបានរំលាយលាយជាមួយខ្សាច់ រួចចាក់ក្នុងពុម្ពជាដុំឥដ្ឋដែលអាចប្រើការជំនួសឥដ្ឋធម្មតាបានហើយឥដ្ឋកែច្នៃពីប្លាស្ទិកទាំងនេះត្រូវបានប្រើក្នុងសំណង់ផ្សេងៗរបស់ សហគមន៍ផ្ទះស្នាក់ជីរោទ៍ទាំងមូល៕
Article by SRIN SOKMEAN
