ឱកាសដំណាច់ឆ្នាំសកលត្រូវបានមហាជនទូទៅនៅលើពិភពលោកចាត់ទុកថាជាវេលាដ៏ពិសេសមួយសម្រាប់ក្រុមគ្រួសារ និង មនុស្សដែលជិតស្និទ្ធបំផុតព្រោះក្នុងរយៈពេល៣៦៥ថ្ងៃមានឱកាសដំណាច់ឆ្នាំតែម្ដងប៉ុណ្ណោះ។ ដោយឡែកនៅក្នុងប្រទេសកម្ពុជា ប្រជាជនខ្មែរជាច្រើនក៏និយមធ្វើ សកម្មភាពផ្សេងៗទៅតាមឥទ្ធិពលសកលភាវូបនីយកម្មពីបណ្តាប្រទេសលោកខាងលិចដែរ ប៉ុន្តែខ្លះទៀតគ្រាន់តែ ចំណាយពេលសម្រាប់ការជួបជុំក្រុមគ្រួសារកំសាន្តសប្បាយក្នុងលក្ខណៈសាមញ្ញមិនសូវគគ្រឹកគគ្រេង។ តើសកម្មភាពណាខ្លះដែលប្រជាជនខ្មែរច្រើនតែនិយមប្រារព្ធធ្វើដើម្បីចូលរួមអបអរទិវាចូលឆ្នាំសកលថ្មី?
ថ្វីត្បិតតែគោលបំណងនៃការប្រារព្ធពិធីឆ្លងឆ្នាំសកលមានលក្ខណៈជារួមតែមួយក៏ពិតមែន ក៏យើងអាចសង្កេត ឃើញជារួមថាការប្រារព្ធពិធីនេះនៅទូទាំងព្រះរាជាណាចក្រកម្ពុជាមានលក្ខណខុសប្លែកគ្នាទៅតាមពេលវេលាដែលអំណោយផលជាក់ស្តែងរបស់ក្រុមគ្រួសារនីមួយៗ ចំណូលថវិកា កម្រិតវ័យ កម្រិតវប្បធម៌ និង ទម្លាប់របស់បុគ្គល ម្នាក់ៗ។ ក្នុងឱកាសបំណាច់ឆ្នាំសកលដ៏រីករាយនេះផងដែរបងប្អូនប្រជាពលរដ្ឋខ្មែរយើងច្រើនតែយកឱកាសនេះអញ្ជើញសមាជិកគ្រួសារមកជួបជុំគ្នាធ្វើម្ហូប អាហារ តួយ៉ាង ស៊ុប ឬ អាំងគ្រឿងសមុទ្រ ឬ អាំងសាច់គោ ឬ ធ្វើគ្រឿងក្លែមផ្សេងៗ តិចឬច្រើនក្តី ទៅតាមការនិយម របស់គ្រួសារនីមួយៗ អមជាមួយសុរានិងភេសជ្ជៈទទួលទានផ្សេងៗ ដើម្បីបង្កើតបរិយាកាសរីករាយក្នុងរង្វង់គ្រួសារ បង្កើនភាពជិតស្និទ្ធរវាង គ្នាទៅវិញទៅមក។ ម្យ៉ាងវិញទៀត គ្រួសារខ្លះច្រើននាំប្រពន្ធកូនដើរកំសាន្តនៅតាមតំបន់មុខព្រះបរមរាជវាំង តំបន់សួនច្បារ មុខវត្តបទុមវត្តី ឬ តំបន់កោះពេជ្រ ដើម្បីទស្សនាសកម្មភាពកំសាន្តផ្សេងៗដែលសាលារាជធានីភ្នំពេញបានបង្កើតឡើង ដើម្បីអបអរស្វាគមន៍ពិធីបុណ្យឆ្លងឆ្នាំសកល ជាពិសេសគឺ ការប្រគំតន្រ្តីជាសាធារណៈដោយឥតគិតថ្លៃនិងមានការ ចូលរួមជាកិត្តិយសពីសំណាក់សិល្បករសិល្បការិនីក្នុងស្រុកជាច្រើនដួងរហូតដល់ពាក់កណ្តាលអាធ្រាត្រ។ ដោយឡែកសម្រាប់ក្រុមគ្រួសារមួយចំនួនដែលគាត់មិនសូវនិយមក្នុងការប្រារព្ធពិធីឆ្លងឆ្នាំនៅផ្ទះ ភាគច្រើនពួកគាត់បានកក់ភោជនីយដ្ឋានបែបលំដាប់ៗ ដែលមានបម្រើអាហារពេលល្ងាចតាមបែបអឺរ៉ុបដ៏រ៉ូមែនទិកជាមួយក្រុមគ្រួសារដើម្បីទទួលនូវបរិយាកាសដ៏រីករាយនាបំណាច់ឆ្នាំសកលនេះផងដែរ។
ក្រៅពីសកម្មភាពដ៏អធឹកអធ័មដូចដែលបានរៀបរាប់ខាងលើ គូសង្សារនិងស្វាមីភរិយាមួយចំនួននិយមជ្រើស យកថ្ងៃឆ្លងឆ្នាំសកលនេះជាវេលាដ៏ផ្អែមល្ហែមសម្រាប់សារភាពក្តីស្នេហ៍ ឬ រឹតបន្តឹងចំណងស្នេហារបស់ខ្លួនស្អិតរមួត ប្លែកខុសពីសព្វមួយដងតាមរយៈការទទួលទានអាហារពេលរាត្រីនៅទីតាំងដ៏រ៉ូមែនទិចដែលពួកគេពេញចិត្តទាំងសងខាង។ ក្នុងខណៈនេះដែរ ពួកគេអាចជូនកាដូវត្ថុជាទីស្រឡាញ់ ឬ ឆ្លើយឆ្លងសាសងរឿងរ៉ាវអនុស្សាវរីយ៍ដែលពួកគេ ទាំងពីរបានឆ្លងកាត់ក្នុងរយៈពេលមួយឆ្នាំកន្លង។ លើសពីនេះទៅទៀត ប្រជាជនមួយចំនួន ពិសេសអ្នកដែលរកស៊ី ជំនួញជាប់ខ្សែស្រឡាយ រមែងតែងតែយកដង្វាយចំណីនំនែកទៅសែនលោកតាព្រះចៅដែលមានបារមីសក្តិសិទ្ធិប្រចាំ បូជនីយដ្ឋានវត្តភ្នំហើយបួងសួងសុំលាភសុំជ័យក្នុងឆ្នាំថ្មីខាងមុខ និង ចាក់គម្ពីរផ្សងជោគជតារាសីថែមទៀតផង។ ឆ្លៀតក្នុងខណៈនេះ ក្រុម ការងារគេហទំព័រ សូវរីន យើងខ្ញុំ សូមជូនពរប្រិយមិត្តអ្នកអានទាំងអស់ឲ្យជួបប្រទះតែជោគជ័យគ្រប់ភារកិច្ចក្នុង ឆ្នាំ២០២០ខាងមុខនេះ៕
Article by HENG CHANMAKARA