ស្នាដៃចម្រុះនៃសិល្បករជាច្រើនរូបត្រូវបានបង្ហាញនូវតាមដងផ្លូវនាទីក្រុងបាត់ដំបង
NEWS 4 years agoនាថ្ងៃទី២១ និង២២ ខែធ្នូ ឆ្នាំ២០១៩ កន្លងទៅនេះ ស្ថិតនៅក្នុងទីក្រុងបាត់ដំបងបានប្រារព្ធនូវពិព័រណ៍គំនូរ និងសកម្មភាពប្លែកៗជាច្រើនផ្សេងទៀតដែលបានឆ្លុះបញ្ចាំងពីទេពកោសល្យ ក៏ដូចជាការរួមសហការគ្នាបានយ៉ាងល្អរវាងសិល្បករនឹងសិល្បករមកពីតំបន់ផ្សេងៗគ្នា។ «ជំនោរ art» ជាព្រឹត្តិការណ៍ត្រូវបានរៀបចំឡើងដោយ លោក ប៉ោយ ឈុនលី ក្នុងគោលបំណងឲ្យសិល្បករគ្រប់រូបដែលមាន ទេពកោសល្យ និងជំនាញខុសៗគ្នាអាចបង្ហាញទៅកាន់មហាជន និងប្រជាជនមួយចំនួនដែលរស់នៅក្នុងតំបន់អាចស្គាល់ និងយល់ដឹងព័ត៌មានបន្ថែមនូវអត្ថន័យនីមួយៗដែលពួកគេពុំទាន់បានជួបប្រទះពីមុនមក។ យ៉ាងណាមិញ លោក ប៉ោយ ឈុនលី ជាអ្នកគ្រប់គ្រងព្រឹត្តិការណ៍នេះបានឲ្យដឹងយ៉ាងដូច្នេះថាប្រធានបទដ៏សំខាន់នៃកម្មវិធី «ជំនោរ art» នេះ គឺជាការផ្តោតសំខាន់ទៅលើអាកាសធាតុនៅក្នុងខែធ្នូដែលបានផ្តល់នូវអំណោយផលដ៏ល្អក្នុងការធ្វើឲ្យព្រឹត្តិការណ៍នេះបញ្ចប់ដោយរលូន ជាពិសេស សិល្បករជាតិ និងអន្តរជាតិបានផ្តល់នូវទិដ្ឋភាពដ៏ល្អប្រណីតដែលមិនធ្លាប់មានពីមុនមកឲ្យមានភាពលេចធ្លោក្នុងការធ្វើឲ្យសិល្បៈសហសម័យកាន់តែមានប្រជាប្រិយភាពមួយកម្រិតទៀតផងដែរ។
គួរជម្រាបផងដែរថា ព្រឹត្តិការណ៍ដែលត្រូវបានប្រារព្ធ «ជំនោរ art» បានផ្តោតសំខាន់ទៅលើការរួមសហការទំនាក់ទំនងគ្នារវាងសិល្បករនឹងសិល្បករប្រមាណជាង ២១នាក់ ក្នុងការសម្រេចនូវគោលដៅរួមជាមួយគ្នាដែលមានការបង្ហាញនូវស្នាដៃផ្សេងៗនៃសិល្បករគ្រប់រូប៕
Article by PAN SIVLY