ទំនោរនៃការច្រៀងលំនាំបទចម្រៀងទាន់សម័យ ស្នេហាយុវវ័យនិងមនោសញ្ជេតនា លន្លង់លន្លោចបង្ហោះក្នុងបណ្ដាញសង្គមពីសំណាក់យុវវ័យជំនាន់ថ្មីកាន់តែមានការផុសផុលឡើង ខណៈដែលចម្រៀងអូរីជីណលជាច្រើនក៏បានបង្កើតឡើងតាមតម្រូវការ និងបរិបទសង្គមនេះ។ បើទោះបីជាចម្រៀងសម័យមានការវាយលុកក្នុងបណ្តាញសង្គមយ៉ាងណាក្តី ក៏គេឃើញមានទំព័រហ្វេសប៊ុក និង យូធូបមួយដែលមានឈ្មោះថា «ដំរីភ្លោះ» មានម្ចាស់ជាបងប្អូនស្រីមួយគូបានច្រៀងលំនាំបទប្រពៃណី អមជាមួយនឹងឧបករណ៍ចាប៉ីខ្មែរមកជាមួយផងដែរ។ ព្រោះតែស្រលាញ់និងចង់អភិរក្សនូវវប្បធម៌ ប្រពៃណីដែលដូនតាខ្មែរបានបន្សល់ទុកឲ្យបានធ្វើឲ្យអ្នកស្រី អ៊ូចសាវឿន និងប្អូនស្រី អ៊ូច សាវី ដែលជាកូនស្រីរបស់សិល្បករអាយ៉ៃជើងចាស់ លោក អ៊ូ ឆេង ហៅស្មៀន ឆេង និង លោកស្រី ព្រហ្ម ចាន់ថុល បានច្រៀងបទប្រពៃណីខ្មែរបង្ហោះក្នុងបណ្តាញសង្គមនៃប្រព័ន្ធឌីជីថល។
បើទោះបីជាខ្លួនមានសមត្ថភាពអាចច្រៀងរហូតដល់បទបរទេសជាភាសាអង់គ្លេសក៏ដោយ ក៏អ្នកនាង អ៊ូច សាវី ហៅដំរីតូច នៅតែមានអារម្មណ៍ដក់ជាប់ជាមួយនឹងបទប្រពៃណីខ្មែរ ម្យ៉ាងដោយសារតែជាប់ខ្សែស្រឡាយជាអ្នកសិល្បៈផងនោះ ទើបធ្វើឲ្យអ្នកនាងនិងបងស្រីសម្រេចចិត្តបង្កើតនូវទំព័រហ្វេសប៊ុក និងយូធូបនៅដើមឆ្នាំ ២០១៩ ដោយមានការជួយខាងផ្នែកបច្ចេកទេសឌីជីថលពីក្មួយប្រុស ។ មួយវិញទៀតព្រោះដោយសារតែអ្នកទាំងពីរចង់ផ្សព្វផ្សាយនូវសិល្បៈប្រពៃណីខ្មែរតាមបណ្តាញសង្គមផងនោះទើបអ្នកនាង អ៊ូច សាវី បានលើកឡើងថា៖ «កាលណាប្រសិនបើយើងចេះ យើងទុកវាចោរ វានឹងអាចកប់បាត់ អ៊ីចឹងទាន់យើងមានពេលវេលា មានកម្លាំងអាចធ្វើបាន មានលទ្ធភាពអាចធ្វើបាន យើងធ្វើឲ្យហើយ»។
បទចម្រៀងដំបូងរបស់អ្នកទាំងពីរដែលមានចំណងជើងថា «ទេសភាពនារដូវភ្ជុំ» ដែលមាន អ្នកស្រី អ៊ូច សាវឿន ហៅដំរីធំ ជាអ្នកច្រៀង និង អ្នកស្រី អ៊ូច សាវី ហៅដំរីតូច ជាអ្នកប្រគំចាប៉ី បានទាក់ទាញអ្នកមើលរហូតដល់រាប់ពាន់នាក់។ កាលដែលអ្នកទាំងពីរបានយកឧបករណ៍ចាប៉ីខ្មែរមកប្រគំលេងជាមួយនឹងបទចម្រៀងប្រពៃណីនេះក៏បានធ្វើឲ្យមហាជនទូទៅមានការភ្ញាក់ផ្អើលផងដែរ។ អ្នកស្រី អ៊ូចសាវឿន៖ «គេភ្ញាក់ព្រោះគេឃើញចាប៉ីអាចលេងជាមួយនឹងបទប្រជាប្រិយសម័យបាន ក៏ប៉ុន្តែគ្រាន់តែមិនសូវមានអ្នកយកមកលេងច្រើន អ្នកខ្លះក៏គាំទ្រ អ្នកខ្លះក៏មិនគាំទ្រ គេថាប្លែកពេកទេហី ហួសហេតុពេកទេហី។ ប៉ុន្តែសម្រាប់ពួកខ្ញុំវិញ យើងគិតថាល្អពីព្រោះឧបករណ៍បុរាណដូនតាខ្មែរយើងបានបង្កើតមក ហើយយើងអាចលេងជាមួយឧបករណ៍សម័យបាន មានន័យថាវា (ចាប៉ី) អស្ចារ្យណាស់ ហើយសូមឲ្យពួកគាត់ចូលរួមគាំទ្រទាំងអស់គ្នា»។
អ្នកស្រី អ៊ូច សាវឿន ហៅដំរីធំ
អ្នកស្រី អ៊ូច សាវី ហៅដំរីតូច
ដោយសារតែសម័យមានទីផ្សារជាងបុរាណ យុវជនជំនាន់ក្រោយហាក់ពុំសូវចាប់អារម្មណ៍ជាមួយនឹងវប្បធម៌ប្រពៃណី ក៏ប៉ុន្តែវប្បធម៌គឺជាអត្តសញ្ញាណមួយដែលជួយឲ្យពិភពលោកបានស្គាល់យើងផងដែរ។ ជាមួយគ្នានេះ តារាចម្រៀងប្រពៃណីទាំងពីររូបក៏បានផ្ដល់ជាគំនិតមួយដើម្បីឲ្យយុវជនជំនាន់ក្រោយបានទាំងអភិរក្សនិងអភិវឌ្ឍទៅទន្ទឹមថា៖ «ប្រសិនបើយើងចង់អភិរក្ស និងអភិវឌ្ឍជាមួយគ្នាយើងគួរតែចាប់ផ្តើមពីខ្លួនយើងជាមុនសិន។ ប្រសិនបើមិនបានជួយអភិរក្សក៏យើងគួរតែរៀនស្គាល់ ពីឧបករណ៍ប្រពៃណី រៀនស្គាល់ពីចម្រៀងប្រពៃណីផ្សេងៗជាដើម ហើយប្រសិនបើយើងមានចំណង់ចំណូលចិត្តយើងគួរតែឆ្លៀតរៀន ដើម្បីជួយអភិរក្ស។ ប្រសិនបើយើងអាចច្រៀងតាមលំនាំបទប្រពៃណីក្នុងបណ្តាញសង្គមក៏កាន់តែប្រសើរ។
ទោះជាយ៉ាងនេះក្ដីក៏នៅមានទស្សនអវិជ្ជមានជាច្រើនដែលមនុស្សមួយចំនួនមានការយល់ច្រលំ ដោយនាំគ្នាគិតថា ការលេងចាប៉ីធ្វើឲ្យងងឹតភ្នែកទៅវិញ។ សម្រាប់ ដំរីភ្លោះ ក្នុងន័យនេះគឺស្មើរនឹងការបំផ្លិចបំផ្លាញនូវឧបករណ៍សិល្បៈដែលជាមត៌កពីដូនតាដែលបានបន្សល់ទុកឲ្យ។ ឆ្លៀតក្នុងឳកាសនេះ អ្នកស្រី អ៊ូចសាវឿន និង អ៊ូចសាវី សូមសំណូមពរ ពុកម៉ែ បងប្អូន ទាំងប្អូនប្រុសប្អូនស្រី ទូទាំងសកលលោកជាជាតិខ្មែរទាំងអស់ បញ្ឈប់នូវគំនិតថា ការរៀនចាប៉ីធ្វើឲ្យងងឹតភ្នែកនេះតទៅទៀត ព្រោះថាប្រសិនបើយើងគិតដូច្នេះវាហាក់បីដូចជាយើងបំផ្លាញសិល្បៈមួយនេះ ទម្រង់ឧបករណ៍មួយនេះជាប្រយោល។ បើទោះថាយើងនិយាយលេងធម្មតាក៏យើងពុំគួរដែរ ព្រោះថាឧបករណ៍សិល្បៈមួយនេះវាកាន់តែហោចទៅហើយ ដូច្នេះប្រសិនបើយើងទាំងអស់គ្នានៅតែបន្តទៀតនោះ ដូចយើងបំផ្លាញខ្លួនឯងដូច្នោះដែរ៕
Article by KEO SONG