ប្លែកភ្នែកចម្លែកអារម្មណ៍ជាមួយទស្សនាវដ្តីសូវរីនឌីជីថលដំបូងប្រចាំខែមេសា
NEWS 4 years agoក្នុងឱកាសអន្តរកាលនេះដែលត្រូវនឹងពិធីបុណ្យចូលឆ្នាំថ្មីប្រពៃណីជាតិ ព.ស. ២៥៦៣ ត្រៀមឆ្លងចូល ព.ស. ២៥៦៤ ខាងមុខនេះទស្សនាវដ្តីសូវរីនពិតជាមានសេចក្តីសោមនស្សរីករាយជាពន់ពេកដែលបានពាំនាំមកនូវមាតិកាទស្សនាវដ្តីឌីជីថលដំបូងបង្អស់ក្នុងប្រវត្តិសាស្រ្តប្រចាំខែមេសានេះដើម្បីឆ្លើយតបឆាប់រហ័សទៅនឹងរបត់បរិបទសង្គមជាក់ស្តែង។ ទស្សនាវដ្តីឌីជីថលលេខចេញផ្សាយទី១០៣ នេះនឹងធ្វើឲ្យអស់លោក លោកស្រី អ្នកនាង កញ្ញា រំភើបអារម្មណ៍តាមរយៈអត្ថបទរឿងរ៉ាវនានាទាំងផ្នែកសម្ភាសន៍ផ្នែកប្រពៃណីទំនៀមទម្លាប់ផ្នែកសម្ផស្សនិងសុខភាព ព្រមទាំងមាតិកាល្អៗជាច្រើនទៀត។ តោះ! មកឈ្វេងយល់អំពីមាតិកាឌីជីថលរបស់សូវរីនប្រចាំខែមេសានេះទាំងអស់គ្នា!
ដោយសារខែមេសា ប្រជាជនកម្ពុជាយើងនឹងប្រារព្ធធ្វើពិធីបុណ្យចូលឆ្នាំខ្មែរនៅតាមលំនៅស្ថានរៀងៗខ្លួនតាមបវេណីតពីបុរាណកាល សូវរីនបានបង្កើតមាតិកាពិសេសៗទាក់ទងនឹងសិល្បៈវប្បធម៌ដ៏រុងរឿងរបស់ជាតិសាសន៍យើង ក្នុងនោះរួមមាន ជាអាទិ៍ បទសម្ភាសន៍ជាមួយស្ថាបត្យករខ្មែរជំនាន់ថ្មីពុំមាសបណ្តូលក្រោមប្រធានបទស្តីពីគំនូរឌីថីថលឆ្លុះបញ្ចាំងអំពីស្ថាបត្យកម្មខ្មែរពីអតីតកាលយុគមាស, លោក បូរ ហាក់ ស្ថាបនិកសិល្បៈគំនូរប្រភេទថ្មី “គំនូរឈើឆេះ” ជាសិល្បករប្រចាំនៅវិចិត្រសាលសិល្បៈរំចេក៥ និង អ្នកបង្កើតគំនូរជីវចលប្រចាំ Phare Creative Studio នៅក្រុងបាត់ដំបង និងលោកឡាយប៊ុនឡេងយុវជនម្នាក់ដែលបង្កើតវីដេអូយូធូបផ្សារភ្ជាប់ទៅនឹងបរិបទសង្គមខ្មែរហើយទទួលបានការគាំទ្រយ៉ាងច្រើនសន្ធឹកសន្ធាប់ពីមិត្តយុវវ័យកម្ពុជាក្នុងពេលបច្ចុប្បន្ន។
ក្រៅពីបទសម្ភាសន៍នានាយើងក៏បានសរសេរចុះផ្សាយអំពីអត្ថន័យនៃគ្រឿងរណ្តាប់ទទួលសាទរ ទេវតាឆ្នាំថ្មីដែលខ្មែរតែងតែរៀបចំធ្វើមិនដែលខកខានឡើយតាំងពីដើមរៀងមក លើកលែងតែសម័យកម្ពុជាប្រជាធិបតេយ្យ បីឆ្នាំ ប្រាំបីខែ ម្ភៃថ្ងៃ ព្រមទាំងរឿងរ៉ាវផ្សេងៗអំពីមុខម្ហូបអត្តសញ្ញាណជាតិខ្មែរមួយមុខដ៏ល្បីឈ្មោះជាសកល គឺ “ហហ្មុក” ដែលប្រជាជនភាគច្រើននាំគ្នាហៅខុសក្លាយទៅជា “អាម៉ុក” និងជ្រក់បន្លែចម្រុះមុខដែលដូនតាខ្មែរបានបន្សល់ទុកជាកេរដំណែលរហូតមកដល់សព្វថ្ងៃ។ ជាចុងក្រោយ លោកអ្នកក៏នឹងបានបណ្តែតអារម្មណ៍ជាមួយក្រុមការងារយើងទៅដល់រមណីយដ្ឋានផ្ទះកសិដ្ឋានមួយកន្លែងដ៏សែនមនោរម្យកំពុងលាក់ខ្លួននៅលើទឹកដីខេត្តកំពង់ឆ្នាំង មិនឆ្ងាយប៉ុន្មានពីរាជធានីភ្នំពេញ។