ភោជនីយដ្ឋាន ហាងកាហ្វេ បារ ឬឡោញមួយចំនួនស្ថិតនៅក្នុងរាជធានីភ្នំពេញភាគច្រើនតែងមានការរៀបចំតុបតែង ការដេគ័រ យ៉ាងស្រស់ស្អាតល្អប្រណិត រីឯខ្លះទៀតមានការរៀបចំតុបតែងបែបអេឡេហ្គង់លំដាប់អន្តរជាតិអមជាមួយនឹងគំនូរលើជញ្ជាំងបន្ថែមទៀតនោះរឹតតែធ្វើឲ្យបរិយាកាសមានសោភ័ណភាពបន្ថែមទៀតផងដែរ។ ជាមួយគ្នានេះដែរ ប្រិយមិត្តមួយចំនួនប្រាកដជាពុំបានដឹងពីអត្តសញ្ញាណនៃវិចិត្រករដែលបានគូរគំនូរនៅឡើយនោះទេ ហេតុដូចនេះ សូវរីន នឹងបង្ហាញអ្នកមកស្គាល់ពីអត្តសញ្ញាណពិតប្រាកដនៃវិចិត្រកររូបនេះ។
ជំនួបជាមួយនឹង កញ្ញា ឆាយ សវនិយ ដែលមានរហ័សនាម សូកូឡា (Sokola) សិក្សានាសាកលវិទ្យាល័យ លីមកុកវីង លើមុខជំនាញស្ថាបត្យកម្ម ជាវិចិត្រករស្រីដែលគូរគំនូរលើជញ្ជាំងដ៏មានប្រជាប្រិយភាព។ ទន្ទឹមនឹងនេះផងដែរ កញ្ញាបានឲ្យដឹងផងដែរថា ការគូររបស់កញ្ញាលើកដំបូងទទួលបានលទ្ធផលមិនល្អទាល់តែសោះ ប៉ុន្តែដោយក្តីស្រឡាញ់ និងការព្យាយាមរបស់កញ្ញាបានជំរុញនូវការគូរគំនូរទទួលបានភាពជោគជ័យដែលធ្វើឲ្យមនុស្សជាច្រើនទទូលស្គាល់នូវស្នាដៃរបស់កញ្ញា។ ជាមួយគ្នានេះ កញ្ញាបានបង្ហាញផងដែរថា «ក្រោយពីខ្ញុំបានហ្វឹកហាត់លើជំនាញនោះស្ទាត់ហើយ ខ្ញុំចាំបានថាស្នាដៃលើកដំបូងបំផុតនោះខ្ញុំត្រូវបានគេឲ្យគំនូរលើពិដាននៅក្នុងបណ្ណាគារសម្រាប់កុមារនៃសាលា CIA កោះពេជ្រ កាលពី៤ឆ្នាំមុន ហើយនេះជាគម្រោងដ៏ធំ និងលើកទី១សម្រាប់ខ្ញុំ»។ បន្ទាប់ពីបានបញ្ចប់នូវគម្រោងរបស់កញ្ញាលើកដំបូងរួច កញ្ញាត្រូវបានស្ថាបនិក ស្ថាបនិកា នៃភោជនីយដ្ឋាន ហាងកាហ្វេ បារ ឡោញ ដើម្បីបង្ហាញនូវការគូរគំនូរជាថ្មីម្តងទៀត តួយ៉ាង ហាងប្រជាប្រិយ ដែលមានគំនូរខ្ជូតៗ ហាងកាហ្វេផ្លូវលំ២ ភោជនីយដ្ឋាន Lousiana Chicken Fried Lotus ឡោញ ភោជនីយដ្ឋានរៀតណាមដែលមានឈ្មោះថា Ganh ស្ថិតក្នុងផ្សារទំនើបជីបម៉ុងនរោត្តម Shades ឡោញ Forgotten បារ វីទ្ធីកាហ្វេជាដើម។ ជាក់ស្តែង សម្រាប់ទីកន្លែងទាំងនេះមានការគូររូបលើជញ្ជាំងពឹងផ្អែកលើបរិយាកាសការរៀបចំនៃហាងទាំងអស់ ប៉ុន្តែសម្រាប់ Forgotten បារវិញ ត្រូវបានគេសង្កេតឃើញថាមានការគូរខុសប្លែកពីហាងដទៃ ក៏ព្រោះតែគំនូរនោះជារូបភាពនៃតារាចម្រៀងដ៏ល្បីៗជាច្រើនរូក្នុងទសវត្សរ៍ទី៦០ និង៧០ផងដែរ។
កញ្ញា ឆាយ សវនិយ
កញ្ញា សវនិយ បានបង្ហាញនូវចំណាប់អារម្មណ៍ និងបទពិសោធន៍ផ្ទាល់ខ្លួន ក៏ដូចជាសិស្សប្អូនជំនាន់ក្រោយដែលមានទេពកោសល្យនៃសិល្បៈគំនូរយ៉ាងដូច្នេះថា «ត្រូវតែព្យាយាមខិតខំអនុវត្តន៍នូវអ្វីដែលយើងមានទំនោរ និងទេពកោសល្យសិល្បៈគំនូរឲ្យបានច្រើន ទោះបីមនុស្សជុំវិញខ្លួននិយាយថាអ្វីដែលយើងធ្វើមិនល្អពិតមែន ប៉ុន្តែខ្ញុំជឿជាក់ថាអ្វីដែលយើងបានព្យាយាមនឹងផ្តល់ផលនូវថ្ងៃក្រោយ»៕
Article PAN SIVLY
Image Courtesy: ឆាយ សវនិយ