×

រៀន​​ធ្វើ​​នំជាល​​បែប​​សាមញ្ញ​ៗ​​តាម​​ក្បួន​​ពី​បុរាណ​​

TRAVEL & LIVING 4 years ago
 
 

          ដល់​ខែ​ភ្ជុំបិណ្ឌ​ហើយ​! ​ក្នុង​រដូវ​នេះ​ ​អ្នក​ច្បាស់ជា​នឹកឃើញ​ដល់​នំអន្សម​ ​នំគម​ ​នំបត់​ ​ដែល​មាន​វត្តមាន​ជាហូរហែ​នៅ​តាម​ទី​វត្តអារាម​ ​និង​ ​ភូមិ​ស្រុក​នានា​ទូទាំង​ប្រទេស​ ​ប៉ុន្តែ​ក្រៅពី​នំ​ទាំងនេះ​ ​អ្នក​អាច​សាកល្បង​ធ្វើ​នំជាល​ដែល​ជា​នំ​បុរាណ​មួយ​ប្រភេទ​ទៀត​មិនសូវ​សម្បូរ​នៅ​តាម​ទីក្រុង​យកទៅ​វត្ត​ប្រគេន​លោក​ ​ឬ​ ​ទុក​ទទួល​ ​ទាន​លេង​ជួបជុំ​ក្រុម​គ្រួសារ​ក្នុង​រដូវ​ខែ​បុណ្យទាន​នេះ​ក៏បាន​។​

          នំជាល​ច្រើន​ធ្វើ​ពី​ម្សៅ​ដំណើប​លាយ​ស្ក​រដាក់​ក្នុង​ជាល​តូច​ៗ​ដែល​ទ្រាប់​ស្លឹក​ចេក​នៅ​បាត​និង​នៅ​រង្វង់​ជុំវិញ​ថាស​ច​ម្អិ​ន​ដោយ​ចំហុយ​។​ ​នំ​នេះ​ជា​ប្រភេទ​នំ​សាមញ្ញ​បំផុត​ ​គ្រាន់តែ​ជា​នំ​ម្សៅ​អង្ករ​ដែល​មាន​រសជាតិ​ផ្អែម​ឡែមៗ​។​ ​មូលហេតុ​បានជា​គេ​ហៅ​វា​ថា​ ​នំជាល​ ​ព្រោះ​នំ​នេះ​អាច​​​រក្សាទុក​បាន​រយៈពេល​យូរ​រហូត​រាប់​ខែ​ ​ដោយ​ទុកចោល​ក្នុង​ជាល​។​ ​ចំពោះ​គ្រឿងផ្សំ​សំខាន់​ៗ​ ​រួម​មាន​ ​អង្ករដំណើប​ (​ឬ​លាយ​អង្ករខ្សាយ​ខ្លះ​) ​១​គីឡូក្រាម​ ​ស្ករត្នោត​ ​៣​ខាំ​ ​អំបិល​មួយ​ស្លាបព្រា​ ​ល្ង​ស​ ​ឬ​ល្ង​ខ្មៅ​ ​មួយ​កូនចាន​ ​ទឹក​ ​០​.​៧​៥​ ​លីត្រ​ ​និង​ស្លឹក​ចេក​ (​សម្រាប់​កាច់​ធ្វើ​កន្ទោង​)​។​

          ដំបូង​ ​ត្រូវ​កាច់​ស្លឹក​ចេក​ជា​កន្ទោង​ស្រដៀង​កន្ទោង​ដាក់​ហហ្មុក​ដែរ​ទៅតាម​ចំនួន​នំជាល​ដែល​ត្រូវការ​ ​រួច​ទុក​វា​មួយអន្លើ​។​ ​បន្ទាប់មក​ ​យក​អង្ករ​ទៅ​ត្រាំទឹក​ទុកចោល​មួយ​យប់​ (​តាម​ក្បួន​បុរាណ​) (​អាច​កាត់​ត្រឹម​មួយម៉ោង​ក៏បាន​)​។​ ​បន្ទាប់មក​យក​អង្ករ​ដែល​ត្រាំ​រួច​ ​ទៅ​កិន​ជា​ម្សៅ​ ​ហើយ​យក​ម្សៅ​នោះ​ទៅ​លាយ​ជាមួយ​ស្ករត្នោត​ ​ល្ង​ ​និង​ ​ទឹក​។​ ​លោកអ្នក​គួរ​បន្ថែម​អំបិល​បន្តិច​ដើម្បីឲ្យ​រសជាតិ​នំ​មុត​ឆ្ងាញ់​ ​ហើយ​កូរ​ល្បាយ​ម្សៅ​និង​គ្រឿងផ្សំ​ខាងលើ​ឲ្យ​សព្វ​ចូលគ្នា​។​ ​បន្ទាប់មក​ទៀត​យក​វា​ទៅ​ចាក់​ចូលក្នុង​កន្ទោង​ស្លឹក​ចេក​ហើយ​ចំហុយ​ក្នុង​ឆ្នាំង​ពីរ​ជាន់​ដែល​ខ្មែរ​ហៅថា​ ​ហួត​ ​ឬ​ ​ចិន​ហៅថា​ ​ឡាំង​ស៊ឹង​ ​។​ ​ប្រសិនបើ​គ្មាន​ឆ្នាំង​ហួត​ឬ​ឡាំង​ស៊ឹង​ ​លោកអ្នក​អាច​ប្រើ​ឆ្នាំង​ធម្មតា​ដាក់​បន្ទះ​ប្ញស្សី​នៅ​ផ្នែក​កណ្តាល​ដើម្បី​ចំហុយ​ក្នុងរយៈពេល​មួយម៉ោង​។​ ​ដើម្បី​រក្សា​នំ​នេះ​ឲ្យ​មានគុណ​ភាព​បាន​យូរ​ ​ត្រូវ​យក​នំ​ដែល​ចំហុយ​រួច​ទៅ​ហាលថ្ងៃ​បន្ថែម​ឲ្យ​ស្ងួត​ល្អ​ច្រក​ថង់​ទុក​។​

          ​ជាទូទៅ​ ​នំជាល​ដែល​ចំហុយ​ឆ្អិន​ ​អាច​​​យកមក​ទទួលទាន​បានហើយ​ ​ប៉ុន្តែ​ខ្មែរយើង​និយម​យកទៅ​វា​ទៅ​ចិត​ជា​បន្ទះ​ស្តើង​ល្មម​ហើយ​ចៀន​នឹង​ខ្លាញ់​ ​ដើម្បីឲ្យ​មាន​រសជាតិ​ឆ្ងាញ់​មួយ​បែប​ទៀត​។​ ​គេ​ក៏​អាច​អាំង​វា​បាន​ដែរ​អាស្រ័យ​តាម​ការ​និយម​ចូលចិត្ត​របស់​គ្រួសារ​នីមួយៗ​។​

Article by SRINSOKMEAN


SUGGESTIONS