ពីយុវសិស្សដែលចូលចិត្តលេងហ្គេម និងមើលភាពយន្តវិទ្យាសាស្រ្តក្លាយជាវិចិត្រករឌីជីថល
NEWS 4 years agoគំនូរគូរលើកុំព្យូទ័រ ឬ ហៅថា គំនូរបែបឌីជីថលចំនួន០៨ផ្ទាំងត្រូវបានផ្សព្វផ្សាយនិងចែករំលែកផ្ទុះល្បីខ្លាំងលើបណ្តាញសង្គមហ្វេសប៊ុក ហើយត្រូវបានអ្នកប្រើប្រាស់បណ្តាញសង្គមចុចចូលចិត្តនិងចែករំលែកតៗគ្នារហូតរាប់ពាន់ដង។ គំនូរបែបសហសម័យរូបស្រ្តីអប្សរា និង តួអង្គហនុមានក្នុងរឿងរាមកេរ្តិ៍ ត្រូវបានរចនាឡើងផ្អែកតាមចម្លាក់នៅលើជញ្ជាំងប្រាសាទបុរាណខ្មែរ និង សៀវភៅឯកសារសិល្បៈ ប្រវត្តិសាស្រ្តជាច្រើនក្រោមទឹកដៃយ៉ាងប៉ិនប្រសប់របស់យុវជន សំ ដារ៉ូ ដែលបច្ចុប្បន្នមានតួនាទីជាអ្នកគ្រប់គ្រងផ្នែកសិល្បៈ (Art Director) នៃក្រុមហ៊ុនបង្កើតហ្គេមទូរសព្ទដ៏ល្បីឈ្មោះតែមួយគត់នៅកម្ពុជាដែលមហាជនជាច្រើនស្គាល់ថា អស្ចារ្យស្ទូឌីយ៉ូ (Orsja Studio)។
ផ្តើមចេញពីអតីតកាលជាយុវសិស្សនៃវិទ្យាល័យឥន្រ្ទទេវីមួយរូបដែលមានចំណង់ចំណូលចិត្តលេងហ្គេម និង ទស្សនាភាពយន្តបរទេសបែបវិទ្យាសាស្រ្តដែលមានតួអង្គប្លែកៗ យុវជន សំ ដារ៉ូ ចាប់ផ្តើមចង់សិក្សាជំនាញជាវិចិត្រករគំនូរឌីជីថលតែពីពេលនោះមកម្ល៉េះ ប៉ុន្តែដោយសារតែកត្តាគ្រួសារ ទើបលោកសម្រេចចិត្តសិក្សាជំនាញស្ថាបត្យកម្មនៅវិទ្យាស្ថានស៊ីតិក (SETEC) ក្រោយពេលលោកបានបញ្ចប់ការសិក្សាថ្នាក់មធ្យមសិក្សាទុតិយភូមិនៅវិទ្យាល័យឥន្រ្ទទេវី រាជធានីភ្នំពេញ ឆ្នាំ២០១០។ ទោះបីជាត្រូវបាន ហាមឃាត់ពីសំណាក់ឪពុកម្តាយដោយសារការព្រួញបារម្ភចំពោះបញ្ហាទីផ្សារការងារក្នុងស្រុកក៏ដោយក៏ ការសិក្សាជំនាញស្ថាបត្យកម្មមិនបានធ្វើឲ្យរូបគេបំភ្លេចគំនូរឌីជីថលដែលជាចំណង់ចំណូលចិត្តផ្ទាល់ខ្លួនបានដែរ។
ជាលទ្ធផល ដារ៉ូបានតស៊ូចូលប្រឡូកក្នុងការងារគំនូរឌីជីថលនៅក្រុមហ៊ុន Digital Works Khmer(DWK) អស់រយៈពេល៣ឆ្នាំ រហូតបានទទួលតំណែងជាប្រធានក្រុមវិចិត្រករគំនូរ 2D (2D Leader Artist) ហើយក្រោយមក ដារ៉ូបានព្យាយាមអភិវឌ្ឍសមត្ថភាពខ្លួនឯងរហូតឈានឡើងដល់តំណែងជានាយកគ្រប់ គ្រងផ្នែកសិល្បៈនៃក្រុមហ៊ុនស្លឹករឹតភាពយន្ត។ ធ្វើការនៅទីនោះបានរយៈពេលមួយឆ្នាំ លោកក៏បានបន្តការងារតំណែងដដែលនៅក្រុមហ៊ុន អស្ចារ្យស្ទូឌីយ៉ូ (Orsja Studio) រហូតមកដល់ពេលសព្វថ្ងៃ។
ក្នុងពេលបច្ចុប្បន្ន សំ ដារ៉ូ បានចូលប្រឡូកការងារផ្ទាល់ខ្លួនមួយទៀត គឺអ្នកផ្តល់សេវាកម្មក្រាហ្វិក ឌីហ្សាញដែលមានឈ្មោះថា “ក្រមួន Kramuon” ដែលជាជោគជ័យការងារមួយជំហានទៀតបន្ទាប់ពីដារ៉ូបានបម្រើការឲ្យក្រុមហ៊ុនល្បីជាច្រើនឆ្នាំកន្លងមក។ ដារ៉ូ បានពន្យល់ប្រាប់ថា “ក្រមួន Kramuon” ផ្តោតសំខាន់លើសេវាកម្មឌីហ្សាញរូបគំនូរព្រីនលើអាវយឺត និងកាតាប ស្ទីកឃ័ររូបភាព កាតប៉ូស្តាល់ ផ្ទាំងឃោសនា(Poster) គំនូរជីវចល ។ល។ ជាទូទៅ ផលិតផលស្នាដៃសិល្បៈទាំងនោះត្រូវបានអតិថិជនបញ្ជាទិញដោយផ្ទាល់ និង មានដាក់តាំងបង្ហាញខ្លះនៅវិចិត្រសាលនៃសារមន្ទីរជាតិ។ បើនិយាយអំពីស្នាដៃរូបគំនូរកន្លងមកវិញ ម្ចាស់ស្នាដៃសង្កេតឃើញថា មានការគាំទ្រនិងចាប់អារម្មណ៍ខ្លាំងពីអ្នកប្រើប្រាស់បណ្តាញសង្គមហ្វេសប៊ុក និងអ៊ីនស្តាក្រាម ដែលក្នុងចំណោមស្នាដៃទាំងអស់នោះ មានស្នាដៃខ្លះទទួលបានការចុចចូលចិត្តរហូតជាងពីរពាន់ដងឯណោះ។
ដោយសារតែមានទេពកោសល្យពីធម្មជាតិលើជំនាញសិល្បៈគំនូរ យុវជន សំ ដារ៉ូ មានសមត្ថភាពអាចនឹកឃើញគំនិតគូរចេញជាគំនូរបានរហូត៥-៦តួអង្គ។ ប៉ុន្តែក្នុងនាមជាវិចិត្រករបែបឌីជីថល រូបគេក៏ជួបបញ្ហាប្រឈមជាច្រើនដែរទម្រាំសម្រេចបានស្នាដៃគំនូរនីមួយៗ ព្រោះគំនូររូបតួអង្គបែបបុរាណលាយសហសម័យទាមទារឲ្យគេចំណាយពេលច្រើនសិក្សាលម្អិតអំពីតួអង្គនីមួយៗទៅតាមសម័យកាល។ ក្នុងករណីខ្លះ គេត្រូវចំណាយពេលទៅតាមខេត្តដើម្បីផ្តិតយករូបភាពគម្រូនៅតាមជញ្ជាំងប្រាសាទ គួបផ្សំនឹងរូបភាពឯកសារនៅក្នុងសៀវភៅភាសាជាតិនិងអន្តរជាតិផ្សេងៗផងដែរ មុននឹងយកមកកែសម្រួលទៅតាមការស្រមើស្រមៃរបស់ខ្លួនឲ្យចេញជាស្នាដៃសិល្បៈផ្ទាល់ខ្លួនខុសពីស្នាដៃរបស់អ្នកដទៃ។ លោកបានអះអាងថា រូបខ្លះត្រូវស្វែងរកឯកសារភស្តុតាងរហូតដល់មួយឆ្នាំក៏មាន។
ស្នាដៃរបស់ដារ៉ូកាន់តែមានគេទទួលស្គាល់ច្រើនឡើងៗ រហូតដល់មានក្រុមហ៊ុនបរទេសធ្លាប់មកទាក់ទងសុំសិទ្ធិយកទៅធ្វើជាគម្រូតុបតែងកាយតួអង្គនៅក្នុងកម្មវិធីសិល្បៈរបស់ថែមទៀតផង។ ជាចុងក្រោយ ដារ៉ូសូមឲ្យវិចិត្រករខ្មែរជំនាន់ក្រោយស្រាវជ្រាវនិងប្រើរចនាបទសម័យមុនជាពិសេសសម័យអង្គរមកប្រើឡើងវិញឲ្យបានច្រើន ហើយសូមឲ្យមហាជនសម្លឹងមើលលើគុណភាពស្នាដៃសិល្បៈជាជាងចង់បានតែតម្លៃថោក៕
Aritcle by SOVRIN