ភេសជ្ជៈ Kombucha គឺជាតែមួយប្រភេទដែលល្បីឈ្មោះទូទាំងពិភពលោក ត្រូវបានគេអះអាងថាមានប្រភពកំណើតចេញពីប្រទេសចិនតាំងពី២០ឆ្នាំមុនម្ល៉េះ ផ្សំពីតែបៃតង ឬ តែខ្មៅ ឬ ទាំងពីរមុខលាយបញ្ចូលគ្នា រួមជាមួយស្ករសនិងមេដំបែរមួយប្រភេទឈ្មោះថា SCOBY ដែលមានប្រយោន៍ល្អចំពោះសុខភាពរាងកាកាយ។ គ្រឿងផ្សំទាំងអស់នេះត្រូវបានត្រាំទុករយៈពេលពីរបីសប្តាហ៍រហូតចេញជាតិជូរអែមតិចៗ។ នៅពេលលោកអ្នកទទួលទានភេសជ្ជៈនេះ វាផ្តល់នូវអត្ថប្រយោជន៍ជាច្រើនដូចខាងក្រោមៈ
១. ជាប្រភពនៃពពួកផ្សិតឬបាក់តេរីល្អ (Probiotics)
នៅពេលត្រាំតែនេះទុកជាច្រើនសប្តាហ៍ ពពួកបាក់តេរីល្អនឹងបង្កជាភិនភាគស្រដៀងនឹងផ្សិតនៅលើផ្នែកខាងលើនៃទឹកតែ ដែលធ្វើឲ្យអ្នកខ្លះហៅតែនេះថា “តែដុះផ្សិត” ។ តែតម្រាំប្រភេទនេះបង្កើតបានជាអាស៊ីតអាសេទិក (acetic acid) ដែលត្រូវបានរកឃើញដូចគ្នានៅក្នុងទឹកខ្មេះ រួមជាមួយបណ្តុំអាស៊ីតមួយចំនួនទៀត ព្រមទាំងកម្រិតជាតិអាល់កុលនិងជាតិហ្គាសដែលធ្វើឲ្យវាមានលក្ខណៈដូចទឹកកាបូណាត។ ស្របជាមួយគ្នានេះដែរ វាមានផ្ទុកអាស៊ីតឡាក់ទិកមួយចំនួនដែលអាចជួយដល់ដំណើរការប្រូបាយអូទិកល្អនៅក្នុងរាងកាយយើងដូចជាពង្រឹងប្រព័ន្ធរំលាយអាហារ ប្រព័ន្ធភាពស៊ាំនឹងការរលាក និងជួយសម្រកទម្ងន់។
២. ផ្តល់នូវអត្ថប្រយោជន៍ដែលមានក្នុងតែបៃតង
តែត្រាំដំបែរផ្សំចេញពីតែបៃតងដែលផ្តល់នូវអត្ថប្រយោជន៍ដូចគ្នានៅពេលលោកអ្នកទទួលទានភេសជ្ជៈតែបៃតងយ៉ាងដូច្នោះដែរ។ ការស្រាវជ្រាវបែបវេជ្ជសាស្រ្តបរទេសបានបង្ហាញថាការទទួលតែបៃតងជាប្រចាំអាចជួយបង្កើនអត្រានៃការដុតបំផ្លាញកាឡូរី កាត់បន្ថយខ្លាញ់ក្បាលពោះ ពង្រឹងកម្រិតកូឡេស្តឺរ៉លល្អ និងជួយទប់ស្កាត់កម្រិតជាតិស្ករក្នុងឈាម។ ជាទូទៅ អ្នកទទួលទានតែបៃតងនឹងជួបបញ្ហាហានិភ័យក្រពេញ ប្រូស្តាត បញ្ហាជំងឺសុដន់ និង មហារីកក្នុងកម្រិតទាប។
៣. ផ្ទុកសារធាតុប្រឆាំងអុកស៊ីតកម្ម
សារធាតុប្រឆាំងអុកស៊ីតកម្មគឺជាសារធាតុទាំងឡាយណាដែលជួយប្រឆាំងម៉ូលេគុលរ៉ាឌីកាល់ដែលបំផ្លាញមុខងារកោសិការាងកាយមនុស្ស។ អ្នកវិទ្យាសាស្រ្តជាច្រើនជឿជាក់ថា សារធាតុប្រឆាំងអុកស៊ីតកម្មដែលមានស្រាប់នៅក្នុងផ្លែឈើ និង ភេសជ្ជៈចម្រាញ់ពីធម្មជាតិមានលក្ខណៈល្អជាងប្រភេទអាហារបំប៉នដែលមានផ្ទុកសារធាតុនេះ។ តែត្រាំដំបែរ ជាពិសេសនៅពេលផ្សំពីតែបៃតងសុទ្ធទំនងជាផ្តល់ផលប៉ះពាល់វិជ្ជមានទៅលើមុខងារថ្លើម។ ជាក់ស្តែង ការពិសោធន៍ទៅលើសត្វកណ្តុរដែលផឹកតែនេះជាប្រចាំត្រូវបានរកឃើញលទ្ធផលថា ជួយកាត់បន្ថយជាតិពុលក្នុងថ្លើមដែលកើតឡើងពីសារធាតុគីមីបានយ៉ាងតិច៧០%។
៤. អាចជួយបំផ្លាញបាក់តេរីអាក្រក់ក្នុងខ្លួន
តែនេះមានផ្ទុកអាស៊ីតអាសេទិកដូចទឹកខ្មេះ។ មានអត្ថប្រយោជន៍ដូចគ្នានឹងជាតិប៉ូលីប៉េណុលនៅក្នុងទឹកតែដែរ អាស៊ីតអាសេទិកមានសមត្ថភាពអាចសម្លាប់ពពួកមីក្រូសរីរាង្គដែលបង្កគ្រោះថ្នាក់ដល់សុខភាព។ វាផ្សំចេញពីតែខ្មៅ ឬ តែបៃតង ដែលមានគុណសម្បត្តិផ្នែកប្រឆាំងបាក់តេរីកម្រិតខ្ពស់ ជាពិសេសគឺ ប្រឆាំងនឹងបាក់តេរីដែលចម្លងជំងឺ និងផ្សិតអាក្រក់ឈ្មោះ Candida ។ សមត្ថភាពប្រឆាំងខាងលើមានតួនាទីជួយរាំងស្ទះដល់ការរីកលូតលាស់របស់ពពួកបាក់តេរី ឬ ផ្សិតអាក្រក់ ហើយរក្សាទុកតែពពួកបាក់តេរីណាដែលល្អ។
៥. អាចជួយកាត់បន្ថយអត្រាជំងឺបេះដូង
ការសិក្សាទៅលើសត្វកណ្តុរបានបង្ហាញថា តែត្រាំដំបែរមានឥទ្ធិពលទៅលើមុខសញ្ញាពីរសំខាន់ពាក់ព័ន្ធនឹងជំងឺបេះដូង គឺ កូឡេស្តឺរ៉ល LDL និង HDL នៅក្នុងរយៈពេល៣០ថ្ងៃ។ លើសពីនេះទៅទៀត តែបៃតងជួយការពារកូឡេស្តឺរ៉ល LDL ពីអុកស៊ីតកម្មដែលអាចបណ្តាលឲ្យយើងកើតជំងឺបេះដូង។ ជាក់ស្តែង អ្នកទទួលទានតែបៃតងកើតជំងឺបេះដូងក្នុងអត្រាទាបត្រឹមតែ ៣១% ប៉ុណ្ណោះ។
Article by SRINSOKMEAN