ភ្លក្សរសជាតិអាហារ ជាមួយនឹងម្រេចកំពតដ៏មានឱជារស ក្នុងអគារបេតិកភណ្ឌសម័យអាណានិគមបារាំង
TRAVEL & LIVING 6 years agoកំពតជាខេត្តមួយដែលមានភូមិសាស្ត្រសមប្រកបសម្រាប់ដំណើរទេសចរណ៍របស់ភ្ញៀវជាតិ និងអន្តរជាតិ ដោយសម្បូរទៅដោយរមណីយដ្ឋានធម្មជាតិជាច្រើន ព្រមជាមួយនឹងទីប្រជុំនៃហេដ្ឋារចនាសម្ព័ន្ធទំនើប និងអរិយធម៌ដែលបន្សល់ទុកតាំងពីសម័យអាណានិគមបារាំង តួយ៉ាងបេតិកភណ្ឌសំណង់អគារបុរាណបែបអាណានិគមនិយមបារាំងដ៏ទាក់ទាញ។ ទៀតសោត ខេត្តកំពតក៏មានចម្ងាយមិនឆ្ងាយពីរាជធានីភ្នំពេញ ដូច្នេះបង្កជាភាពងាយស្រួលសម្រាប់ទេសចរពីភ្នំពេញ ពិសេសការសម្រាកលម្ហែចុងសប្ដាហ៍តែម្ដង។
អាទើលីយេកំពត គឺជាសក្ខីភាពមួយក្នុងការថែរក្សាបេតិកភណ្ឌសំណង់បុរាណនេះឯង។ ស្ថិតក្នុងរូបភាពអគារចាស់បែបអាណានិគមបារាំងតាំងពីឆ្នាំ១៩៤៥ ដែលស្ថិតនៅប្របដងស្ទឹងកំពត អាទើលីយេ ត្រូវបានកែច្នៃឲ្យក្លាយទៅជាហាងដាក់តាំងបង្ហាញ និងលក់នូវគ្រាប់ម្រេចកំពតដែលមានគុណភាពលំដាប់ពិភពលោក។ ម្រេចកំពតនៅទីនេះត្រូវបានវេចខ្ចប់ក្នុងកញ្ចប់ពណ៌គគីរ មានប្រឡោះថ្លាបង្ហាញនូវប្រភេទគ្រាប់ម្រេចជាក់ស្ដែង និងមាននិមិត្តសញ្ញាណត្រឹមត្រូវ ប្រកបទៅដោយគុណភាព ហើយត្រូវបានវេចខ្ចប់ក្នុងកែវកញ្ចក់យ៉ាងមានសោភ័ណភាពបំផុត ដែលរៀបដាក់ក្នុងប្រអប់ដ៏ប្រណីត។ ផ្កាអំបិល ក៏ជាផលិតផលមួយប្រភេទទៀតដែលមានដាក់លក់នៅទីនេះផងដែរ។ គួរបញ្ជាក់ដែរថា ផ្កាអំបិល គឺជាប្រភេទអំបិលល្អិតៗសក្បុសដែលកកលើផ្ទៃខាងលើនៃស្រែអំបិល ភ្លឺផ្លេកហាក់បីដូចជាគ្រីស្តាល់ នៅពេលស្រែអំបិលរីងហួត។ ដោយសារតែអំណោយផលភូមិសាស្ត្រ អ្នកកំពតនិយមធ្វើស្រែអំបិល ដែលរមែងផ្គត់ផ្គង់តម្រូវការទីផ្សារក្នុងស្រុក និងក្រៅស្រុក ហើយផលិតផលផ្កាអំបិលនេះទៀតសោត ក៏បានក្លាយជាផលិតផលប្រចាំតំបន់មួយទៀតបន្ទាប់ពីដំណាំម្រេច។
ប្រិយមិត្តមិនត្រឹមតែអាចជាវនូវផលិតផលប្រចាំតំបន់មួយតែប៉ុណ្ណឹងនោះទេ លើសពីនេះទៅទៀត អាទើលីយេ ក៏បើកបម្រើជាលក្ខណៈអាហារដ្ឋាន និងបារ (Bistro) ផងដែរ។ លោកអ្នកនឹងទទួលបានឱជារសដ៏ជាប់មាត់ជាប់ចិត្តនៅឯ អាទើលីយេ អមជាមួយនឹងការរចនាហាងប្រកបដោយភាពច្នៃប្រឌិត ដែលរក្សាឥដ្ឋការ៉ូម៉ូដបុរាណ ហើយបន្ថែមនូវធាតុផ្សំបែបទំនើប នេះហាក់បង្កើនភាពរស់រវើកដល់អាគារបុរាណមួយនេះ។ រីឯមុខម្ហូបវិញមានបម្រើជារសជាតិបែបអាស៊ី និងអឺរ៉ុប។ តាមប្រសាសន៍របស់អ្នកគ្រប់គ្រងហាងផ្ទាល់ មុខម្ហូបដែលអតិថិជននិយមជាងគេនោះ គឺត្រីចៀនបែបម៉ូនញ៉េ (ជាមួយនឹងដំឡូងកិន និងបន្លែឆា) ក្តាមឆាម្រេចខ្ចី (និងបាយស) និងសាច់គោអាំងស្រោចទឹកម្រេច (ជាមួយដំឡូងជ្វាដុត និងផ្សិតចំបើង)។ ភ្លក់មុខម្ហូបប្រចាំហាងនេះ ដែលមានបន្ថែមនូវម្រេចកំពតកិនថ្មីៗដែលមានក្លិនប្រហើរឈ្ងុយ បានបន្ថែមរសជាតិអាហាររបស់យើងឲ្យរឹតតែមានឱជារសថែមមួយកម្រិតទៀត។ អាហារនៅទីនេះត្រូវបានរៀបចំតាមបែបផែនបស្ចិមប្រទេស វាមើលទៅពិតជាមានសោភ័ណភាព ហើយរសជាតិទៀតសោតក៏ឆ្ងាញ់ពិសា មិនចាញ់ភោជនីយដ្ឋាននៅភ្នំពេញឡើយ។
បរិយាកាសនៅទីនេះ ប្រណីតបែបលម្ហែកាយ ដែលធ្វើឲ្យលោកអ្នកអាចស្រាកស្រាន្ដអារម្មណ៍សៅហ្មងទាំងឡាយ ដោយលោកអ្នកអាចអង្គុយនៅផ្នែកខាងក្រៅ ទស្សនាទិដ្ឋភាពដងស្ទឹងកំពត និងភ្នំបូកគោដ៏ស្រស់ត្រកាលនារសៀលថ្ងៃរៀបអស្ដង្គត អមដោយខ្យល់ត្រសៀកៗដ៏សែនរមនា។ វាពិតជាក់ជាបន្ថែមនូវភាពរ៉ូមែនតិចមួយបែបទៀតសម្រាប់ការលម្ហែកាយនៅឯខេត្តកំពតនេះ បើលោកអ្នកអង្គុយទទួលទានអាហារពេលល្ងាច និងក្រេបសុរានាពេលរាត្រីវិញនោះ។ ម្ល៉ោះណាតែបានមកលម្ហែនៅខេត្តកំពតនេះហើយ គួរកុំរំលងទីឋានដ៏ប្រណីតក្នុងខេត្តទេសចរណ៍មួយនេះ ដើម្បីទទួលយកបទពិសោធន៍ដ៏ល្អប្លែកប្រចាំតំបន់នេះ៕
Article by LENG CHANREASEY