Sovrin
Sovrin
ការលេចមុខមាត់នៃវិស័យអេកូហ្វេហ្សិន (Eco-fashion) នៅក្នុងសង្គមខ្មែរបច្ចុប្បន្ន
FASHION & BEAUTY 6 years ago
អ្វីទៅជាអេកូហ្វេហ្សិន (Eco-fashion)? អេកូហ្វេហ្សិន គឺការផលិតម៉ូដសម្លៀកបំពាក់ទាំងឡាយណា ដែលចូលរួមចំណែកគាំពារនិរន្តរភាពនៃបរិស្ថាន ឬកាត់បន្ថយផលប៉ះពាល់អវិជ្ជមានចំពោះផ្នែកបរិស្ថាន។ កាលបើនិយាយអំពី អេកូហ្វេហ្សិន ឬអាចហៅបានម្យ៉ាងទៀតថា Sustainable Fashion (ការច្នៃម៉ូដសម្លៀក បំពាក់ប្រកបដោយនិរន្តរភាព) នោះគេផ្តោតសំខាន់ទៅលើចំណុចធំៗចំនួនពីរគឺ វត្ថុធាតុដើមសម្រាប់បម្រើ ការផលិត និងសង្វាក់ផលិតកម្មផ្ទាល់។ វត្ថុធាតុដើមសម្រាប់ការផលិតសម្លៀកបំពាក់បែបអេកូហ្វេហ្សិន គឺជាប្រភេទវត្ថុធាតុដើមបែបសរីរាង្គដែលសំដៅលើសរសៃអំបោះដែលចម្រាញ់ចេញពីរុក្ខជាតិ (ឧទាហរណ៍៖ សំឡី កប្បាស គ ធ្មៃ ក្រចៅ) សរសៃអំបោះដែលចម្រាញ់ចេញពីរោមសត្វ (សរសៃសូត្រ រោមចៀម) និង កាកសំណល់កែច្នៃផ្សេងៗ។ ដោយឡែកចំពោះសង្វាក់ផលិតកម្មសម្លៀកបំពាក់បែបអេកូហ្វេហ្សិនវិញគឺធ្វើ យ៉ាងណាជំរុញកាត់បន្ថយកាកសំណល់ដែលប៉ះពាល់ដល់សុខភាព និងបរិស្ថាន ហើយដែលភាគច្រើនជាការងារហត្ថកម្ម (ធ្វើដោយដៃ ឬប្រើម៉ាស៊ីនខ្នាតតូចបន្តិចបន្តួច)។ តើការផលិតសម្លៀកបំពាក់តាមបែបអេកូ ហ្វេហ្សិនមានគុណប្រយោជន៍ដូចម្តេចខ្លះចំពោះសង្គមជាតិ?
យើងសង្កេតឃើញថា ដោយសារពិភពលោកសព្វថ្ងៃកំពុងចាប់អារម្មណ៍ខ្លាំងចំពោះកត្តាបរិស្ថាន អេកូ ហ្វេហ្សិនក៏ត្រូវបានចាប់ផ្តើមដំណើរការនៅតាមបណ្តាប្រទេសជាច្រើនដើម្បីចូលរួមចំណែកយ៉ាងសកម្មក្នុងការការពារបរិស្ថានដែលយើងកំពុងរស់នៅ។ យីហោសម្លៀកបំពាក់បែបអេកូហ្វេហ្សិនកាន់តែមានកំណើនគួរឲ្យកត់សម្គាល់។ យោងតាមគេហទំព័របរទេសមួយឈ្មោះថា ហ្វេស្សិនីស្តា (FASHIONISTA) យីហោផលិតផលសម្លៀកបំពាក់ដែលជួយដល់ផ្នែកបរិស្ថានល្អបំផុតទាំង ១០ ម៉ាក រួមមានម៉ាក Study NY, Alabama Chanin, Titania Inglis, Feral Childe, Awamaki Lab, Carrie Parry, Loomstate, M. Patmos, 100%NY និង Elroy ។ 
ផលិតផលអេកូហ្វេហ្សិនមានអត្ថប្រយោជន៍ជាច្រើនដល់សង្គមជាតិ ពីព្រោះវាជាផលិតផលដែលកែច្នៃចេញពីធម្មជាតិ ពីអ្វីៗដែលអាចរកបាននៅជុំវិញខ្លួនយើង ដូចជាកាកសំណល់ថង់ផ្លាស្ទិក កំទេចក្រណាត់ និងរបស់របរប្រើប្រាស់ចាស់ៗជាដើម។ ការកែច្នៃកាកសំណល់យកទៅធ្វើជាអេកូហ្វេហ្សិនបានជួយកាត់ បន្ថយកាកសំណល់មួយភាគ និងធ្វើឲ្យបរិស្ថានមានភាពស្រស់ស្អាតជាងមុន។ មិនត្រឹមតែប៉ុណ្ណោះ វាធ្វើឲ្យ អ្នកច្នៃម៉ូដកាន់តែមានគំនិតច្នៃប្រឌិតខ្ពស់ ដោយសារពួកគេត្រូវកែច្នៃវត្ថុធាតុដើមដែលគេរកបានឲ្យក្លាយជា ម៉ូដសម្លៀកបំពាក់ដែលកាន់តែថ្មីប្លែកនិងទាក់ទាញ។ ជាពិសេស ទស្សនទានអេកូហ្វេហ្សិនជួយបណ្តុះគំនិត មហាជនទូទៅឲ្យយល់ដឹងពីផលប៉ះពាល់ខាងផ្នែកបរិស្ថាន និងចូលរួមចំណែករួបរួមអភិរក្សបរិស្ថានទាំងអស់គ្នា។ 
លោក Jean Benoit សញ្ជាតិបារាំង អ្នកច្នៃម៉ូដសម្លៀកបំពាក់យីហោ Colorblind បានបង្ហាញចំណាប់ អារម្មណ៍ថា “អេកូហ្វេហ្សិនគឺយន្តការទីផ្សារថ្មីមួយ ព្រោះអ្នកប្រើប្រាស់កាន់តែយល់ដឹងច្រើនឡើងពីអ្វី ដែលពួកគេអាចរំពឹងពីហ្វេហ្សិន។ ឥឡូវ ប្រជាជនជាច្រើនបានយល់ដឹងកាន់តែខ្លាំងពីល័ក្ខខ័ណ្ឌនៃការផលិត សម្លៀកបំពាក់ ដូច្នេះខ្ញុំគិតថាអេកូហ្វេហ្សិនគឺជាជំហានថ្មីមួយទៀតនៃការយល់ដឹង(របស់ប្រជាជន) ប្រៀបបានដូចជាទំនោរនៃការប្រើប្រាស់អាហារសរីរាង្គ ឬអាហារធម្មជាតិដូច្នេះដែរ ដែលធ្វើឲ្យអ្នកប្រើប្រាស់មានជម្រើសកាន់តែច្រើន។” 
ស្របជាមួយគ្នានេះដែរ លោក អ៊ិត សុវណ្ណារាជ និស្សិតសកលវិទ្យាល័យភូមិន្ទវិចិត្រសិល្បៈ និងជាស្ថាបនិកក្រុមរចនាម៉ូដសម្លៀកបំពាក់កែច្នៃឈ្មោះថា ឡាឈូក (La Chhouk) បានបញ្ជាក់ប្រាប់សូវរីនថា ក្រុមលោកបានរចនាម៉ូដសម្លៀកបំពាក់ដែលច្នៃចេញពីកាកសំណល់ ពីព្រោះលោកចង់បង្ហាញទេពកោសល្យក្នុងការច្នៃម៉ូដរបស់ខ្លួន និងចង់ចូលរួមជួយបរិស្ថានក្នុងស្រុក។ លោកយល់ថាការរចនាម៉ូដតាមបែបអេកូហ្វេហ្សិនកំពុងទទួលបានការចាប់អារម្មណ៍ខ្លាំងពីមហាជនទូទៅ ព្រោះតាំងពីពេលចាប់ផ្តើមរហូតមកទល់ពេលបច្ចុប្បន្ននេះ ស្នាដៃកែច្នៃរបស់ក្រុមលោកទទួលបាននូវការគាំទ្រកើនឡើងជាលំដាប់។ គួរបញ្ជាក់ផងដែរថា សម្លៀកបំពាក់ដែលក្រុមលោកធ្លាប់បានផលិតរួមមាន រ៉ូបស្រ្តី ខោអាវបុរស សម្លៀកបំពាក់អាពាហ៍ពិពាហ៍ -ល- ដែលកែច្នៃចេញពីវត្ថុធាតុដើមផ្សេងៗ ដូចជា ក្រដាសជូតមាត់ ជ័រកាវ ដបទឹកសុទ្ធ បាវ បំពង់បឺត ក្រដាសកាសែត កំទេចកំទីកាកសំណល់ផ្សេងៗ ជាដើម។ 
សរុបសេចក្តីមក អ្នកដែលគាំទ្រអេកូហ្វេហ្សិនកំពុងដើរតួនាទីជាពលរដ្ឋល្អចូលរួមចំណែកជួយការពារបរិស្ថាន ថ្វីត្បិតតែទស្សនទានអេកូហ្វេហ្សិនមានវ័យក្មេងខ្ចីនៅឡើយសម្រាប់ប្រជាពលរដ្ឋកម្ពុជា។ ប៉ុន្តែវាត្រូវបានទទួលការគាំទ្រយ៉ាងច្រើន ជាពិសេសពីសំណាក់មិត្តយុវវ័យ ព្រោះពួកគេនិយមអ្វីដែលថ្មី ប្លែក ទាន់សម័យ ប្រកបដោយគំនិតច្នៃប្រឌិត ហើយមិនបង្កគ្រោះថ្នាក់ដល់បរិស្ថានរបស់ពួកគេដែរ៕
Article by SRIN SOKMEAN
