ពាន់ ភួងបុប្ផា ជ័យលាភីពានរង្វាន់អ្នកនិពន្ធភាពយន្តឆ្នើមប្រចាំឆ្នាំ២០១៧
NEWS 6 years agoក្រោមសម្លេងជ័យឃោសអបអរសាទរយ៉ាងកងរំពងពីសំណាក់ភ្ញៀវកិត្តិយសដែលមានវត្តមានក្នុងកម្មវិធី បិទមហោស្រពភាពយន្តជាតិលើកទី៥ ដែលត្រូវបានប្រារព្ធធ្វើឡើងនៅសាលសន្និសីទចតុមុខ រាជធានីភ្នំពេញ កាលពីរាត្រីថ្ងៃទី១០ ខែធ្នូ ឆ្នាំ២០១៧ កន្លងទៅនេះ ពិធីករ ពិធីការិនីបានប្រកាសឈ្មោះជ័យលាភីម្ចាស់ពានរង្វាន់ ទាំង៩រូបដែលបានទទួលការវាយតម្លៃវិនិច្ឆ័យយ៉ាងល្អិតល្អន់ពីគណៈកម្មការជំនាញតាមរយៈស្នាដៃភាពយន្តដែលបានដាក់ចូលរួមក្នុងការប្រកួតប្រជែង។ ក្នុមចំណោមខ្សែភាពយន្តទាំងនោះ រឿងដែលទទួលបានពានរង្វាន់ ខ្សែភាពយន្ត ដែលទទួលបានអ្នកទស្សនាច្រើនជាងគេ នោះគឺបានទៅលើខ្សែភាពយន្តរឿង “ទឹកចិត្តម្តាយសម័យថ្មី” ដែលបានចាក់បញ្ចាំងគ្រប់រោងភាពយន្តនៅរាជធានី និងតាមបណ្តាខេត្តធំៗមួយចំនួនកាលពីដើមឆ្នាំនេះ ហើយសាច់រឿងនេះ ក៏ត្រូវបានទស្សនិកជនទាំងឡាយស្គាល់យ៉ាងច្បាស់ថាជាស្នាដៃដ៏លេចធ្លោបំផុតក្នុងឆ្នាំនេះរបស់ផលិតករ ពាន់ ភួងបុប្ផា របស់ផលិតកម្មថោន។ ទន្ទឹមនឹងនេះដែរ អ្នកស្រីក៏ទទួលបានពានរង្វាន់អ្នកនិពន្ធឆ្នើមតាមរយៈខ្សែភាពយន្តនេះផងដែរ។ តើអ្នកស្រីមានចំណាប់អារម្មណ៍ និងពាក្យពេចន៍អ្វីខ្លះនិយាយទៅកាន់មហាជនក្រោយទទួលពានរង្វាន់យ៉ាងត្រចះត្រចង់នេះ?
ជាមួយទឹកមុខស្រស់ស្រាយ ញញឹមញញែម អ្នកស្រីពាន់ ភួងបុប្ផា អ្នកនិពន្ធខ្សែភាពយន្តឆ្នើមប្រចាំឆ្នាំ បានបង្ហាញទឹកចិត្តថា “ថ្ងៃមុនដែលបានពានរង្វាន់ហ្នឹង ខ្ញុំមិនគិតថាតម្លៃនៃពានហ្នឹងប៉ុន្មានទេ តែសម្រាប់ខ្ញុំ នៅក្នុងចិត្តខ្ញុំ ខ្ញុំគិតថាវាដូចជាការសង្ខេបជីវិតការងាររបស់ខ្ញុំ៣០ឆ្នាំនេះនៅក្នុងពានមួយហ្នឹង (ពានអ្នកនិពន្ធឆ្នើម)។ ខ្ញុំសប្បាយចិត្ត ដោយសារវាជាការឆ្លុះបញ្ចាំង ជាសាក្ខីភាព ប៉ុន្តែអ្វីដែលសំខាន់បំផុតនោះគឺនៅក្នុងចិត្តអ្នកមើល គេយល់ គេដឹង គេចូលតួ ទោះបីគេមិនចូលចិត្តកុនខ្មែរក៏ដោយ!”
អ្នកនិពន្ធរឿងជើងចាស់រូបនេះបានរៀបរាប់អំពីជោគជ័យនៃការបញ្ចាំងរឿង “ទឹកចិត្តម្តាយសម័យថ្មី” ដែលលើសពីការរំពឹងទុករបស់អ្នកស្រីថា “អ្វីក៏ដោយមិនដូចការជាក់ស្តែងទេ! យើងរំពឹងទុកថា យើងនឹងអូសទាញ មនុស្សចាប់ពីអាយុ៣០ឆ្នាំឡើងទៅ។ ស្រាប់តែដល់ពេលកុនហ្នឹងបញ្ចាំង វាមកតាំងពីកុមារា កុមារី អាយុ៥-៦ឆ្នាំ ក៏គាត់ចេះមើលដែរ គាត់ថាគាត់ទទួលយកបាន! ឪពុកម្តាយគាត់នាំមក គាត់អាចសង្ខេបខ្លឹមសាររឿង គាត់យល់ថា ធ្វើម៉េចល្អ ម៉េចមិនល្អ។” អ្នកស្រីបានបន្ថែមទៀតថា ជាទូទៅទស្សនិកជនគោលដៅដែលទៅមើលកុន គឺមានតែ ចន្លោះពី២០ឆ្នាំ ទៅ៤០ឆ្នាំតែប៉ុណ្ណោះ ប៉ុន្តែសម្រាប់ស្នាដៃរឿង “ទឹកចិត្តម្តាយសម័យថ្មី” គឺមានអាយុបន្តពី៤០ទៅ ៨០ឆ្នាំ សូម្បីតែជនក្រីក្រ និងជនពិកាក៏បាននាំគ្នាទៅទស្សនាខ្សែភាពយន្តនេះយ៉ាងគគ្រឹកគគ្រេងដែរ។
អ្នកស្រីបានលើកឡើងអំពីមូលហេតុដែលជំរុញឲ្យមានការសរសេរររឿងនេះឡើងថា “ខ្ញុំគ្រាន់តែចង់ឲ្យកូនខ្មែរបានមើលរឿងនេះ។ នៅពេលវ័យចាស់ យើងចេះតែមានអារម្មណ៍ចង់ឲ្យកូនៗយល់អំពីម្តាយ ហើយចង់ឲ្យម្តាយយល់ពីកូន ធ្វើឲ្យសង្គមយើងល្អ។ ក្នុងនាមជាអ្នកសរសេរ មិនមែនដើម្បីតែលុយមួយមុខទេ គឺខ្ញុំមានឧត្តមគតិ ជួយសង្គមបែបហ្នឹង ទើបខ្ញុំតស៊ូរហូត៣០ឆ្នាំ។”
គួររំឭកផងដែរថា នេះមិនមែនជាលើកទី១ទេ ដែលអ្នកស្រី ពាន់ ភួងបុប្ផា ទទួលបានពានរង្វាន់ក្នុង វិស័យសិល្បៈទី៧នេះ។ កន្លងមក អ្នកស្រីធ្លាប់ទទួលបានជោគជ័យជាច្រើន ដូចជា ពានរង្វាន់អាណាចក្រតារា អ្នកដឹកនាំរឿងឆ្នើម (ឆ្នាំ២០១៣) ពានរង្វាន់ភាពយន្តលេចធ្លោរឿង “កុមារី២៥ឆ្នាំ” (ឆ្នាំ២០១៣) ពានរង្វាន់មហោស្រព ភាពយន្តថ្នាក់ជាតិ ខ្សែភាពយន្តដែលមានទស្សនិកជនគាំទ្របំផុតរឿង “កុមារី២៥ឆ្នាំ” (ឆ្នាំ២០១៥) ជាដើម។ ចំណែកខ្សែភាពយន្តល្បីៗរបស់អ្នកស្រីក្នុងរយៈពេលជាង១០ឆ្នាំនេះមានជាអាទិ៍ រឿងទឹកចិត្តម្តាយ រឿងទឹកចិត្តឪពុក រឿងទឹកចិត្តគ្រូបង្រៀន រឿងស្នាមស្នេហ៍សមុទ្ររាម រឿងកូនប្រសារស្រី រឿងចំណងប្រាំប្រការ រឿងកុមារី២៥ឆ្នាំភាគ១ និងភាគ២ និងរឿងទឹកចិត្តម្តាយសម័យថ្មី ហើយនៅមានខ្សែភាពយន្តចំនួនពីរទៀតដែលត្រៀមនឹងបញ្ចាំងក្នុងពេលឆាប់ៗនេះ គឺរឿងសម្បត្តិបុរស និងរឿងរៃមាស។
ជាចុងក្រោយ ក្នុងនាមជាផលិតករក្នុងស្រុកមួយរូប អ្នកស្រី ពាន់ ភួងបុប្ផា បានផ្តល់សារជុំវិញវិស័យ ភាពយន្តនៅកម្ពុជាថា “លំហូរចូលនៃកុនបរទេសច្រើន អ៊ីចឹងទស្សនិកជនមានជម្រើសច្រើនក្នុងការទស្សនា! សូមឲ្យ យោគយល់ដល់ភាពយន្តខ្មែរយើង។ ខ្ញុំគិតថា ទស្សនាភាពយន្តខ្ញុំមានប្រយោជន៍ជាងទស្សនាភាពយន្តបរទេស!” អ្នកស្រីក៏សូមសំណូមពរដល់អ្នកនិពន្ធ និងផលិតករភាពយន្តជាតិទាំងអស់មេត្តារួបរួមគ្នាលើកស្ទួយពង្រឹងគុណភាព ភាពយន្តខ្មែរឲ្យដល់កម្រិតដែលទស្សនិកជនទទួលយកបាន៕
Article by SRIN SOKMEAN