សតវត្សរ៍ទី២១បានចូលមកដល់ អ្វីៗត្រូវបានផ្លាស់ប្តូរអភិវឌ្ឍរីកចម្រើនយ៉ាងឆាប់រហ័សនឹកស្មានមិនដល់។ បើនិយាយអំពីសម័យមុន ស្រ្តីនិងបុរសទូទាំងពិពលោកមានគម្លាតវិសមភាពយ៉ាងខ្លាំងចំពោះការសិក្សារៀនសូត្រ ការចូលប្រឡូកក្នុងវិស័យការងារ ការចូលរួមការងារសង្គម និង ការរួមចំណែកក្នុងការអភិវឌ្ឍសេដ្ឋកិច្ចជាតិ។ ដោយឡែកក្នុងសង្គមកម្ពុជាបច្ចុប្បន្នវិសមភាពខាងផ្នែកយេនឌ័រខាងលើត្រូវបានកាត់បន្ថយគួរឲ្យកត់សម្គាល់។ នៅក្នុងវិស័យការងារ ស្រ្តីមានឱកាសប្រកួតប្រជែងប្រដំប្រសងជាមួយនឹងបុរស ហើយថែមទាំងទទួលបាននូវជោគជ័យត្រចះត្រចង់គួរជាទីមោទនភាពថែមទៀតផង។ ពិភាក្សាជុំវិញប្រធានបទនេះ សូវរីន បានជួបជាមួយនឹងបុគ្គលដែលមានស្នាដៃ និងជោគជ័យក្នុងជីវិតការងារ ព្រមទាំងបរិយាយប្រាប់ពីបទពិសោធន៍ក្នុងការដឹកនាំដ៏មានតម្លៃរបស់ពួកគាត់។
លោកស្រីឧកញ៉ា កែវ មុំ
លោកស្រីឧកញ៉ា កែវ មុំ សហគ្រិនស្ត្រីដែលមានជោគជ័យក្នុងការបង្កើតនិងគ្រប់គ្រងក្រុមហ៊ុនលីលីផលិតនំស្រួយ បានលើកឡើងថា ទម្រាំបានក្លាយជាសហគ្រិនគ្រប់គ្រងជំនួញដ៏ធំដូចនេះ លោកស្រីបានចាប់ផ្តើមប្រឡូកពីការងារតូចតាចឡើងទៅ ពោលគឺផ្តើមចេញពីជីវិតជាអាជីវករសាមញ្ញម្នាក់ ហើយក្រោយមកក៏ឈានទៅចាប់អាជីពជាបុគ្គលិកផ្នែកទីផ្សារបម្រើការឲ្យក្រុមហ៊ុនបរទេសមួយនៅក្នុងស្រុក។ ដោយសារតែមានបទពិសោធន៍លើមូលដ្ឋានគ្រឹះផ្នែកទីផ្សារដ៏រឹងមាំ លោកស្រីបានខិតខំព្យាយាមបន្តអភិវឌ្ឍសមត្ថភាពការងារផ្ទាល់ខ្លួនរហូតទាល់តែអាចបង្កើតជំនួញបានដោយខ្លួនឯង។ លោកស្រីបានបង្ហើបប្រាប់អំពីកត្តាកំណត់ជោគជ័យការងាររបស់លោកស្រីថា “ដើម្បីឈានទៅរកភាពជោគជ័យ សំខាន់យើងត្រូវយកចិត្តទុកដាក់រៀបចំយុទ្ធសាស្រ្តពង្រឹងស្តង់ដារគុណភាពផលិតផលរបស់យើងឲ្យមានលក្ខណៈប្រកួតប្រជែងខ្ពស់នៅក្នុងទីផ្សារ។ ទន្ទឹមនឹងនេះ ក្នុងនាមជាសហគ្រិន យើងត្រូវចេះស្វែងយល់ពីតម្រូវការទីផ្សារ និងសក្តានុពលដែលយើងមាន។ ជាក់ស្តែង ខ្ញុំបានបង្កើតក្រុមហ៊ុនលីលីនេះឡើង ក៏ដោយសារកាលនោះតែខ្ញុំមើលឃើញនូវតម្រូវការចំណីអាហារចំនួនច្រើនក្នុងមួយថ្ងៃៗរបស់ប្រជាជនក្នុងស្រុក ដែលតម្រូវអោយមានការនាំចូលច្រើនពីប្រទេសជិតខាង។ ខ្ញុំយល់ថាយើងមានវត្ថុធាតុដើមគ្រប់គ្រាន់សម្រាប់បម្រើការកែច្នៃ និងផ្គត់ផ្គង់តម្រូវការទាំងនោះ។ យើងចង់ឲ្យប្រជាពលរដ្ឋខ្មែរប្រើប្រាស់ចំណីអាហារស្រស់ៗដែលផលិតនៅក្នុងស្រុក”។
លោកជំទាវ ភឿង សកុណា
ដោយឡែក លោកជំទាវ ភឿង សកុណា ស្រ្តីដ៏ឆ្នើមមួយរូបដែលដឹកនាំ និងគ្រប់គ្រងក្រសួងវប្បធម៌និងវិចិត្រសិល្បៈនៃព្រះរាជាណាចក្រកម្ពុជាឲ្យមានមុខមាត់ទាំងនៅក្នុងស្រុក និងនៅលើឆាកអន្តរជាតិ ក៏បានយកចិត្តទុកដាក់អភិរក្សនិងអភិវឌ្ឍវប្បធម៌ជាតិខ្មែរដ៏ល្អផូរផង់តាមរយៈសកម្មភាពផ្សេងៗជាបន្តបន្ទាប់ឈានទៅបង្កើនកិត្យានុភាពជាតិឲ្យពិភពលោកកាន់តែស្គាល់ខ្មែរច្បាស់។ ក្នុងនាមជាថ្នាក់ដឹកនាំស្រ្តីតំណាងក្រសួងវប្បធម៌ លោកជំទាវធ្លាប់មានប្រសាសន៍ប្រកបដោយគតិអប់រំថា “ដើម្បីអភិវឌ្ឍខ្លួនជាជំហានដំបូង យើងត្រូវស្គាល់ខ្លួនឯងជាមុនសិន ទើបអ្នកដទៃយល់ពីតម្លៃយើង មិនមើលងាយយើង។ យើងត្រូវមានមធ្យោបាយផ្សព្វផ្សាយឲ្យបានទូលំទូលាយនូវសកម្មភាព (ការងារ) របស់យើង ដើម្បីបញ្រ្ជាបព័ត៌មាននិងទទួលមតិ(រិះគន់កែលម្អ)សាធារណៈមកវិញ។”
លោកស្រី សេង តក្កនារី
ចំណែកឯ លោកស្រី សេង តក្កនារី សហគ្រិនក្រុមហ៊ុនផលិតផលតម្បាញសូត្រ Sentosa Silk ដែលត្រូវបានមហាជនស្គាល់ថាជានារីលេចធ្លោមួយរូបក្នុងវិស័យភាពជាសហគ្រិនក្នុងស្រុកប្រចាំសតវត្សរ៍ទី២១នេះ បានចែករំលែកបទពិសោធន៍ការងារល្អៗខ្លះដល់បងប្អូនស្រ្តីនៅគ្រប់មជ្ឈដ្ឋានទាំងអស់ថា “នៅពេលអ្នកកាន់តែសម្រេចបំណងប្រាថ្នារបស់អ្នក អ្នកកាន់តែមានមនុស្សព្យាយាមទាញអ្នកចុះ។ ត្រូវជឿជាក់ចំពោះខ្លួនឯងនិងអ្វីដែលខ្លួនធ្វើជានិច្ចដើម្បីភាពជោគជ័យ ហើយត្រូវបញ្ចេញចំណង់របស់ខ្លួនមកក្រៅបញ្ចូលទៅក្នុងអ្វីដែលអ្នកកំពុងធ្វើនោះ។” សហគ្រិនស្រ្តីដ៏រឹងមាំម្នាក់នេះបានប្រកាន់ជំហរទស្សនៈធំៗចំនួនបីដើម្បីដណ្តើមយកនូវជោគជ័យក្នុងឆាកជីវិតរបស់ខ្លួនដែលតាងដោយអក្សរ “P” បី នោះគឺចំណង់ (Passion) ការតស៊ូព្យាយាម (Persistence) និងភាពអត់ធ្មត់ (Patience)។ “បណ្តោយឲ្យចំណង់របស់អ្នកក្លាយជាមូលហេតុនៃវត្តមានរបស់អ្នក ហើយជោគជ័យរបស់អ្នកជាផលិតផលនៃការតស៊ូព្យាយាមនិងភាពអត់ធ្មត់” លោកស្រី តក្កនារី បានអះអាង។ ផ្អែកលើគោលជំហរទស្សនៈទានខាងលើ នេះហើយដែលជំរុញឲ្យក្រុមហ៊ុនសូត្ររបស់អ្នកស្រីមានកិត្តិយសទទួលបានវិញ្ញាបនប័ត្របញ្ជាក់គុណភាពកម្រិតស្តង់ដារ “5s Practitioners” ប្រគល់ដោយរដ្ឋមន្រ្តីក្រសួងឧស្សាហកម្ម និងសិប្បកម្មដោយផ្ទាល់។
អ្នកនាង យុគ ចិន្តា
ពិតណាស់ ស្រ្តីខ្មែរមានសមត្ថភាពវិជ្ជាជីវៈច្បាស់លាស់ និងហ៊ានចូលប្រឡូកក្នុងសង្គមមិនចាញ់បុរសឡើយ។ អ្វីដែលបុរសធ្វើបានស្រ្តីក៏អាចធ្វើបានដែរបើទោះបីជាការងារលំបាកកម្រិតណាក៏ដោយ។ ជាក់ស្តែងអ្នកនាង យុគ ចិន្តា ពិធីការិនីជើងចាស់ក្នុងដួងចិត្តមិត្តអ្នកស្តាប់គ្រប់វ័យ ដែលធ្លាប់មានប្រវត្តិតស៊ូក្នុងអាជីព២០ឆ្នាំមកហើយ រហូតមានកិត្តិនាមល្បីឈានមុខលំដាប់ប្រទេសនោះ បានប្រកាន់គោលជំហរក្នុងជីវិតប្រាប់ សូវរីន ថាបើចង់ក្លាយជាបុគ្គលជោគជ័យ ត្រូវមានផែនការប្រាំឆ្នាំម្ដង ធ្វើឲ្យជោគជ័យអ្វីមួយ។ ដោយសារតែគោលជំហរយ៉ាងមោះមុត ដូច្នេះហើយ ទើបអ្នកនាងទទួលបាននូវតំណែងរហូតក្លាយជាអ្នកគ្រប់គ្រងកម្មវិធីទូរទស្សន៍ក្នុងស្រុកធំមួយ ហើយមានលទ្ធភាពបើកអាជីវកម្មផ្ទាល់ខ្លួនបន្ថែមទៀតទាំងក្នុងប្រទេស និងក្រៅប្រទេសផងដែរ។
សរុបសេចក្តីមក យើងអាចសន្និដ្ឋានបានថា ស្រ្តីនៅកម្ពុជាបច្ចុប្បន្នពិតជាមានចំណេះដឹង និងសមត្ថភាពការងារប្រកបដោយជំនាញវិជ្ជាជីវៈមិនចាញ់ភាគីបុរសឡើយ។ នារីខ្មែរចាប់ផ្តើមយល់ដឹងអំពីតម្លៃរបស់ខ្លួន ហើយពួកគាត់មានភាពក្លាហានក្នុងការបញ្ចេញសមត្ថភាពប្រកបដោយភាពតស៊ូ និងជំនឿជាក់ខ្ពស់ជាងពេលមុនៗ។ យើងសង្ឃឹមថានៅពេលអនាគត វត្តមានស្រ្តីក្នុងវិស័យការងារនៅកម្ពុជាកាន់តែកើនឡើងជាលំដាប់ ហើយទស្សនៈបុរាណនិយម “កូនស្រីមុជមិនជ្រៅទៅមិនឆ្ងាយ” នឹងកាន់តែត្រូវបានកាត់បន្ថយសល់ ត្រឹមកម្រិតអប្បបរមា៕
Article by Srin Sokmean