Sovrin
Sovrin
តើនឹងមានអ្វីពិសេសសម្រាប់លេខថ្មីរបស់ទស្សនាវដ្តី សូវរីន នៅខែកក្កដានេះ?
FASHION & BEAUTY 6 years ago
សម្រាប់រដូវរំហើយឈានចូលមកដល់នេះគ្រប់ម៉ាកទាំងអស់បានបញ្ចេញនូវខូឡិកហ្សិនថ្មីរបស់ខ្លួនយ៉ាងព្រោងព្រាតនៅលើទីផ្សារមិនថាប៉ែកអាស៊ីឬអឺរ៉ុបនោះទេ! ជាក់ស្ដែងឱ្យតែចូលដល់ពាក់កណ្ដាលឆ្នាំនីមួយៗ រដូវកាលលក់បញ្ចុះតម្លៃនូវម៉ូដកាលពីរដូវកាលចាស់ក៏បានមកដល់ ដែលជាឱកាសដ៏ល្អសម្រាប់អតិថិជនដែលចង់បានទំនិញម៉ាកល្អៗដែលស្ថិតក្នុងតម្លៃមធ្យមមិនគួរឱ្យជឿ។
ជាការចាប់ផ្ដើមរដូវកាលថ្មីក្នុងរដូវរំហើយនេះ ទស្សនាវដ្តី សូវរីន ក៏បានពាំនាំ និងបង្ហាញនូវម៉ូដហ្វេហ្សិនយ៉ាងទំនើបដែលចូលរួមដោយតារាបង្ហាញម៉ូដល្បីៗ។ ទន្ទឹមនឹងនោះដែរក្នុងលេខថ្មីនៃទស្សនាវដ្តីសូវរីនដ៏ពិសេសនេះយើងបានអញ្ចើញអ្នកនាង ខាត់ សុឃីម ដែលជាសិល្បការិនីពហុជំនាញបានបង្ហាញវត្តមានជាតារាក្របមុខនៅលើគម្របទស្សនាវដ្ដី សូវរីន ព្រមជាមួយការបង្ហាញស្ទីលថតដ៏គួរឱ្យទាក់ទាញបែបអេឡេហ្គង់។ ជាងនេះទៅទៀតនោះនៅក្នុងទំព័រ SOVRIN TALK ពួកយើងក៏ចង់ណែនាំប្រិយមិត្តអ្នកអានឲ្យបានស្គាល់លោក នូ ស៊ុងអ៊ីល (Noh Sung-il) ដែលជាជនជាតិកូរ៉េមួយរូប ដែលបានសរសេរ និងបោះពុម្ពសៀវភៅមួយក្បាលនិយាយអំពី “ពុម្ពអក្សរខ្មែរ” ដំបូងគេបង្អស់មិនធ្លាប់មានពីមុនមកឡើយ។ រឹតតែពិសេសជាងនេះទៅទៀតនោះ យើងក៏អញ្ជើញតារាចម្រៀង Original បែបមនោសញ្ជេតនាលន្លង់លន្លោចដក់ក្នុងក្រអៅបេះដូងយុវវ័យបច្ចុប្បន្ននោះគឺ ថេណា មកផ្តល់ជាបទសម្ភាសន៍ផ្តាច់មុខផងដែរ។ ចង់ដឹងឲ្យកាន់តែច្បាស់ពីថេណា សូមដានជាមួយនឹងទំព័រ SOVRIN TALK នៅក្នុងលេខពិសេសខែកក្កដានេះ។
ថេណា
រដូវវស្សាបានចូលមកដល់ព្រះភិរុណបង្អុរមកកាន់តែញឹកញាប់ ហើយទឹកទន្លេក៏កាន់តែកើនកម្ពស់ជារៀងរាល់ថ្ងៃ រដូវនេះហាក់ដូចជាលំបាកបន្តិចក្នុងការធ្វើដំណើរកម្សាន្តផ្លូវឆ្ងាយ។ សម្រាប់ទំព័រទេសចរណ៍ក្នុងលេខនេះសូវរីន សូមបង្ហាញនូវទីតាំងសំខាន់ៗដ៏លេចធ្លោក្នុងរាជធានីភ្នំពេញសម្រាប់ជាទីកន្លែងកម្សាន្តសម្រាប់រដូវកាលដ៏ត្រជាក់ត្រជុំនេះផងដែរ។ តាមធម្មតានៅពេលដែលប្រជាជនកម្ពុជាភាគច្រើនបានទៅកំសាន្តនៅឯខេត្តសៀមរាប បន្ទាប់ពីទស្សនាតំបន់ប្រាសាទអង្គររួចមក ទីកន្លែងដែលគេនឹកភ្នកនិងបានស្គាល់ច្បាស់ជាងគេនោះគឺវិថីកម្សាន្តនាពេលរាត្រី Pubstreet ក៏ប៉ុន្តែសម្រាប់លេខថ្មីនេះសូវរីនសូមណែនាំលោកអ្នកឲ្យបានស្គាល់តំបន់កម្សាន្តប្លែកមួយកន្លែងទៀតនោះគឺ Kandal Village។ Kandal Village គឺជាសហគមន៍មួយដ៏គួរឲ្យទាក់ទាញបំផុតដែលប្រមូលផ្តុំទៅដោយហាងចម្រុះជាច្រើន ដែលជាគោលដៅកម្សាន្តថ្មីនាឯក្រុងសៀមរាប។
Kandal Village
Monsoon Life
ចំពោះអត្ថបទគន្លឹះក្នុងការថែរក្សាសុខភាព សូវរីន បានបង្ហាញជូនពីអត្ថប្រយោជន៍នៃបន្លែម្រះព្រៅដែលមិត្តអ្នកអានមិនធ្លាប់បានជ្រាបពីមុនមកនោះឡើយ។ ការថែទាំសរសៃសក់ឲ្យទន់ រលោង មានសុខភាពល្អ ជាគ្រឿងទាក់ទាញចំណាប់អារម្មណ៍អ្នកជុំវិញខ្លួន ដែលមិត្តនារីតែងយកចិត្តទុកដាក់បំផុត សូវរីន ក៏នឹងបង្ហាញជូនពីគន្លឹះងាយៗក្នុងការថែរក្សាសរសៃសក់របស់អ្នកក្នុងវស្សារដូវនេះផងដែរ។ ដោយឡែកអត្ថបទដែលនឹងបរិយាយពីស្ដាយ៍ហ្វេស្សិនក្នុងការប្រើប្រាស់ Eyeshadow និង Eyeliner សម្រាប់ការតុបតែងមុខនិងដើម្បីស្រាយចម្ងល់របស់មិត្តនារីឲ្យបានកាន់តែច្បាស់ ថាតើផលិតផលទាំងពីរនេះមានសារសំខាន់យ៉ាងណាសម្រាប់ផ្ទៃមុខរបស់អ្នក ហើយក្រៅពីនោះយើងក៏បានបង្ហាញពីអត្ថបទល្អៗជាច្រើនទៀតផងដែរ៕
រក្សាសិទ្ធិដោយ សូវរីន
