Sovrin
Sovrin
តោះ!ចូលរួមដាក់ពិន្ទុដល់សិស្សសាលាសៀកទាំងអស់គ្នាក្នុងកម្មវិធីសម្ដែងបញ្ចប់ឆ្នាំ
NEWS 6 years ago
ដូចការគ្រោងទុក សៀកខ្មែរជាច្រើនជំនាញនឹងសម្តែងជូនមហាជនខ្មែរទស្សនាដោយឥតគិតថ្លៃនៅមជ្ឈមណ្ឌលសិល្បៈសៀកនិងទស្សនីយភាពដែលមានអាស័យដ្ឋាននៅទល់វិមានមុខរដ្ឋសភាជាតិ នាថ្ងៃសៅរ៍ទី១៤ ខែកក្កដានេះ ចាប់ពីម៉ោង១រសៀលតទៅ ដោយសិល្បករសៀក និងសិស្សសៀកនៃសាលាមធ្យមវិចិត្រសិល្បៈ។ លោក វង្ស វណ្ណៈ ដែលជាគ្រូបង្ហាត់សៀកម្នាក់ និងជាតំណាងអ្នករៀបចំកម្មវិធីនេះបានប្រាប់សូវរីនថា “នៅថ្ងៃទី១៤នោះគឺជាការសម្តែងដ៏ធំលើកទី១របស់សិស្សសៀកនៃសាលាមធ្យមវិចិត្រសិល្បៈ។ យើងចង់ឱ្យមហាជនបានដឹងថា នៅកម្ពុជាក៏មានសាលាបណ្តុះបណ្តាលជំនាញសៀក ហើយជាពិសេសសិស្សសៀកខ្មែរទៀតសោត ក៏ពូកែមិនធម្មតាដែរ។ ក្រៅពីនោះទៀត លោកអ្នកក៏អាចជាអ្នកដាក់ពិន្ទុដល់ប្អូនៗដែលនឹងប្រឡងបញ្ចប់ឆមាសទី២របស់ពួកគេ ក្នុងការសម្តែងនោះផងដែរ។” និយាយចប់លោកក៏ចូលទៅបញ្ជាបច្ចេកទេសបទភ្លេងសម្រាប់សិស្សទាំងអស់គ្នាហាត់សមបន្តទៀត។
ក្នុងរោងសៀកដែលអាចដាក់ទស្សនិកជនបានជិត២ពាន់នាក់ សិស្សសៀកជាច្រើនផ្នែកកំពុងហាត់សម ដើម្បីត្រៀមនាថ្ងៃព្រឹត្តិការណ៍ខាងមុខ។ មាននារី បុរស កម្លោះ ក្រមុំ ហើយក៏មានកុមារា និងកុមារីផងដែរ។ ពួកគេ ម្នាក់ៗសុទ្ធតែមានរាងកាយមាំមួន រហ័សរហួន ពត់ពេនខ្លួន បញ្ចេញក្បាច់សៀកទៅតាមចង្វាក់ភ្លេងនិងជំនាញដែលខ្លួនមាន។ អ្នកខ្លះបង្វិលកង ត្រេះគ្រាប់បាល់ ហើយអ្នកខ្លះទៀតតោងក្រណាត់ជិះខ្សែហោះជុំវិញឆាកប្រៀបបីដូចទេវតាកំពុងចរយាត្រាទស្សនាមនុស្សលោកដូច្នេះឯង។ ចប់ទស្សនីយភាពនោះ កុមារា២នាក់ផ្សេងទៀតតុបតែងកាយរបៀបតួត្លុកសាក់ឡូចេញមកធ្វើកាយវិការ និងចលនាសៀករបៀបកំប្លែងធ្វើឱ្យអ្នកទស្សនា ទប់សំណើចសឹងមិនបាន។ សំឡេងភ្លេងអន់បន្តិច វាំងននបង្ហាញក្រុមសម្តែងស្រីប្រុសថ្មីមកមួយក្រុមទៀត ដែលម្នាក់ៗ ដៃកាន់កងភ្លើង និងដំបងភ្លើង ហើយចាប់ផ្តើមសម្តែងព្រួសភ្លើងពីក្នុងមាត់ដូចនាគបញ្ចេញឬទ្ធិ ធ្វើឱ្យទស្សនិកជនស្រែកទះដៃស្រែកហ៊ោកញ្ជៀវគ្រប់ៗគ្នា។
ទាំងនេះគ្រាន់តែជាការពណ៌នាពីសកម្មភាពហាត់សមដោយសង្ខេបដែលក្រុមការងារបានទៅផ្តិតយករូបភាពមកផ្សាយជូនមុនប៉ុណ្ណោះ លុះត្រាលោកអ្នកទៅទស្សនាដោយខ្លួនឯងទើបដឹងថា ទស្សនីយភាពសៀកខ្មែរចម្រុះជំនាញនោះមានរូបភាពយ៉ាងណា។ សៀកក៏ជាទម្រង់សិល្បៈមួយប្រភេទរបស់ដូនតាខ្មែរផងដែរ ដែលបានឆ្លាក់ទុកនៅប្រាសាទបាយ័ន។ ក្រៅពីការមើលកម្សាន្ត សៀកក៏បានជួយដល់សុខភាពផ្លូវចិត្តឱ្យមានលំនឹង ហើយរាងកាយមាំមួនដោយធ្វើចលនាដៃជើង ហក់លោត ពត់ពេនខ្លួន បង្វិលកង ដែលអាចស្រដៀងគ្នាទៅនឹងលំហាត់ប្រាណដែលកំពុងពេញនិយមជាសកលសម្រាប់មនុស្សសម័យថ្មីនេះជាខ្លាំង។ ដូច្នេះ ហេតុអ្វីមិនសាកទៅមើលសៀកខ្មែរ តើយើងអាចរៀនក្បាច់មួយណានៅផ្ទះដើម្បីបានជាប្រយោជន៍ដល់សុខភាពរាងកាយរបស់យើង។
តោះ នាំក្រុមគ្រួសារទៅទស្សនាសៀកខ្មែរទាំងអស់គ្នា!
Article by SVAY LEEMENG
