សូ ស្រណោះ ត្រូវបានចាត់តាំងជាគណៈកម្មការ កម្មវិធីប្រកួតលេងព្យ៉ាណូល្បីលំដាប់អាស៊ាននៅប្រទេសថៃ
NEWS 6 years agoកម្មវិធីប្រកួតប្រជែងតន្រ្តីករព្យ៉ាណូកុមារដ៏ធំមួយរបស់ក្រុមហ៊ុនជប៉ុនដែលមានឈ្មោះថា Kawai-Thailand ASEAN Piano Competition 2018 បានប្រព្រឹត្តឡើងនៅមជ្ឈមណ្ឌលសិល្បៈ និង វប្បធម៌ ទីក្រុងបាងកក (BACC) ចាប់ពីថ្ងៃទី២២ ខែកក្កដា ដល់ ថ្ងៃទី២៤ ខែកក្កដា ឆ្នាំ២០១៨ ដែលទើបកន្លងទៅថ្មីៗនេះ។ វាជាកម្មវិធីប្រលងព្យ៉ាណូ លើកដំបូងដែលបើកទូលាយសម្រាប់កុមារនៅក្នុងប្រទេសអាស៊ានដែលចេះលេងព្យ៉ាណូហើយមានអាយុយ៉ាងច្រើន បំផុតត្រឹម១៦ឆ្នាំ។ជាកិត្តិយសកូនខ្មែរតែម្នាក់គត់ដែលត្រូវបានអញ្ជើញឲ្យធ្វើជាគណៈកម្មការដាក់ពិន្ទុមួយរូបក្នុង ចំណោមចំនួនគណៈកម្មការចម្រុះជាតិសាសន៍សរុប ៦ នាក់ នោះ គឺ លោក សូ ស្រណោះ ស្ថាបនិកសាលាស្រណោះ តន្រ្តី ក្នុងក្រុងភ្នំពេញ និង ជាអតីតនិស្សិតបញ្ចប់ការសិក្សាថ្នាក់អនុបណ្ឌិតជំនាញព្យ៉ាណូមកពីប្រទេសជប៉ុន។
Image Courtesy: Srornos
លោក សូ ស្រណោះ ដែលទើបវិលត្រឡប់មកពីប្រទេសថៃ បានរៀបរាប់ប្រាប់ថា នេះមិនមែនជាលើកទី១ ទេសម្រាប់រូបលោកដែលត្រូវបានមជ្ឈដ្ឋានបរទេសទុកចិត្ត និង ផ្តល់កិត្តិយសឲ្យរូបលោកបានក្លាយជាគណៈមេ ប្រយោគសម្រាប់ដាក់ពិន្ទុកម្មវិធីប្រកួតប្រជែងជំនាញព្យាណ៉ូនៅលើឆាកអន្តរជាតិ។ ជាក់ស្តែង នេះជាការចេញដំណើរ លើកទី៥ហើយសម្រាប់តួនាទីនេះ បន្ទាប់ពីលោកធ្លាប់បានធ្វើដំណើរទៅចូលរួមកម្មវិធីនានានៅក្នុងប្រទេសចិន ប្រទេសសិង្ហបុរី ប្រទេសម៉ាឡេស៊ី និង ប្រទេសថៃ (កាលពីលើកទី១)។ ដោយឡែកសម្រាប់កម្មវិធីលើកនេះ គឺមាន បេក្ខភាពគណៈកម្មការជាតិ និងអន្តរជាតិ ចំនួន០៧ រូបមកពីប្រទេសផ្សេងៗ ក្នុងនោះរួមមាន ប្រទេសជប៉ុន ប្រទេស កូរ៉េ ប្រទេសសិង្ហបុរី ប្រទេសថៃ ប្រទេសម៉ាឡេស៊ី ប្រទេសវៀតណាម និង ប្រទេសកម្ពុជា។
Image Courtesy: Srornos
បើតាមប្រសាសន៍លោក សូ ស្រណោះ កម្ពុជាទទួលបានអត្ថប្រយោជន៍គួរឲ្យកត់សម្គាល់ពីការចូលរួមក្នុង កម្មវិធីដ៏ធំលំដាប់អាស៊ានមួយនេះ «ទីមួយ កម្មវិធីនេះបានជួយឲ្យយើងពាំនាំកេរ្តិ៍ឈ្មោះប្រជាជាតិខ្មែរយើងទៅ កាន់ឆាកអន្តរជាតិ។ ទីពីរ គឺខ្ញុំអាចស្វែងយល់អំពីការប្រលងបានច្រើន និងទីបី ខ្ញុំបានស្នើសុំឲ្យខ្មែរបានចូលរួមក្នុង កម្មវិធីអន្តរជាតិនេះ។» លោកបានបន្តប្រកបដោយសុទិដ្ឋិនិយមថា “គេកំពុងតែគិតពីសំណើរបស់ខ្ញុំ! បើសិនជាអាច ឆ្នាំក្រោយគេបើកឲ្យកូនខ្មែរបានចូលរួម ខ្ញុំនឹងព្យាយាមនាំកូនខ្មែរយើងទៅប្រលងក្នុងកម្មវិធីហ្នឹងទៀត” ។
Image Courtesy: Srornos
ទន្ទឹមនឹងនេះ លោកសូមអំពាវនាវដល់យុវជន និង ប្អូនៗកុមារទាំងឡាយគួរចំណាយពេលវេលាក្នុងការហាត់ រៀនសិល្បៈតន្រ្តីបន្ថែមលើការសិក្សាចំណេះដឹងទូទៅជាជាងទុកពេលវេលាដើរផ្លូវខុសប្រព្រឹត្តអំពើមិនគួរគប្បី។ លោកយល់ថា តន្រ្តីមិនត្រឹមតែជាការកំសាន្តសប្បាយប៉ុននោះទេ តែវាជាឱសថទិព្វសសម្រាប់ព្យាបាលអារម្មណ៍ និង ជាឧបករណ៍សម្រាប់ជំនួយដល់ការលូតលាស់ផ្នែកប្រាជ្ញាស្មារតីរបស់កុមារនិងយុវជនថែមទៀតផង៕
Article by SRIN SOKMEAN