ខ្ញី យើងធ្លាប់តែដឹងថាវាជាប្រភេទរុក្ខជាតិមើមម្យ៉ាងដែលអាចយកមកចម្អិនជាម្ហូបអាហារ ឬប្រើប្រាស់ជាឱសថសម្រាប់ព្យាបាលជំងឺក៏បាន ប៉ុន្តែខ្ញីក្នុងន័យនេះ គឺជាឈ្មោះហាងកាហ្វេមួយកន្លែងដែលមានទីតាំងស្ថិតនៅក្នុងក្រុងបាត់ដំបងផ្ទាល់តែម្តង។ ជាការពិតណាស់ ខ្ញី ដែលជាហាងកាហ្វេប្រចាំនៅខេត្តបាត់ដំបងនេះ គឺចាប់ផ្តើមពីគំនិតកែច្នៃរបស់ជនជាតិញ៉ូវហ្សែលែនម្នាក់ ដែលបានចុះមកទស្សនាប្រទេសកម្ពុជា ហើយក៏បានចាប់អារម្មណ៍ផ្ទះចំណាស់មួយដែលគេទុកចោល។ ក្រោមការសហការគ្នារវាងបុគ្គលិកនិងម្ចាស់ហាងប្រៀបដូចជាគ្រួសារតែមួយ ហាក់ដូចជាមែកធាងនៃមើមខ្ញីយ៉ាងដូច្នោះដែរ រហូតទើបអាចបង្កើតជាហាងកាហ្វេមួយនេះបាន។
តាមការរំឭកបន្ថែមពីបុគ្គលិកហាងម្នាក់បានឲ្យដឹងបន្តទៀតថា ផ្ទះចំណាស់មួយនេះ គឺជាផ្ទះដែលបន្សល់ទុកតាំងពីសម័យសង្គមរាស្ត្រនិយម ហើយត្រូវបានទុកចោលអស់រយៈពេលជាច្រើនឆ្នាំ។ ដោយសារតែ ជនជាតិញ៉ូវហ្សែលែនដែលជាថៅកែហាង មានផ្នត់គំនិតចូលចិត្តអភិរក្សអ្វីដែលសល់ពីសម័យមុនៗ មកច្នៃក្នុងពេលបច្ចុប្បន្ន ក៏បានរៀបចំផ្ទះចំណាស់នោះ មកជាហាងកាហ្វេវិញ ដែលមានការរចនាបែបលក្ខណៈសាមញ្ញៗ តែទាក់ទាញ។ គ្រប់ភ្ញៀវទេសចរ ជាពិសេសភ្ញៀវបរទេស ដែលបានចូលទៅដល់ខេត្តបាត់ដំបង គឺពុំដែលភ្លេចចូលទៅសាកល្បងរសជាតិម្ហូបអ៊ឺរ៉ុបក៏ដូចជាទទួលទានភេសជ្ជៈនៅហាងកាហ្វេខ្ញីនេះឡើយ។លើស ពីនេះទៀត ខ្ញី មិនត្រឹមតែជាហាងសម្រាប់លក់ម្ហូបអាហារ ឬកាហ្វេនោះទេ ប៉ុន្តែក៏មានទីកន្លែងសម្រាប់ អ្នកដែលមានបំណងចង់ជួបជុំ ពិភាក្សា ជាលក្ខណៈក្រុមដំណើរកម្សាន្ត ឬជាក្រុមការងារអង្គការផងដែរ។ ជាការពិតណាស់ បើយើងមើលពីខាងក្រៅទៅ ខ្ញីហាក់ដូចជាមានសភាពតូចបន្តិចមែន ក៏ប៉ុន្តែនៅពេលដែលយើងបានឈានជើងចូលទៅដល់ក្នុងបរិវេណខាងក្នុង យើងនឹងទទួលបានអារម្មណ៍ស្រស់ថ្លា ដោយហាងនេះ មានពីរជាន់ ដែលជាន់ផ្ទាល់ដី សម្រាប់ទទួលទានអាហារ ឬភេសជ្ជៈ និងជាន់ខាងលើមានលក្ខណៈធំទូលាយអមដោយការតុបតែងជាមួយនឹងរូបគំនូរប្លែកៗបង្កប់ដោយអត្ថន័យនិងសិល្បៈនិយមលាយឡំជាមួយនឹងគ្រឿងសង្ហារិមដែលរចនាឡើងជារបស់បុរាណហាក់អន្ទងអារម្មណ៍ឲ្យអ្នកអង្គុយនៅទីនោះវិលត្រលប់ទៅកាន់អតីតកាលយ៉ាងដូច្នោះដែរ។
មិនត្រឹមតែប៉ុណ្ណោះខ្ញីក៏អាចរៀបចំ ជាន់លើនេះជាលក្ខណៈ Workshop សម្រាប់អង្គការឬសមាគមនានាដែលមានបំណងចង់ធ្វើសិក្ខាសាលាឬកិច្ចប្រជុំអ្វីមួយនៅខេត្តបាត់ដំបងបានទៀតផងដែរ។ មួយវិញទៀតដែរ ខ្ញីមានលក្ខណៈពិសេសខុសប្លែកពីហាងកាហ្វេ ដទៃទៀត ដោយសម្ភារៈមួយចំនួន ដូចជា ទុយោ ថង់ គឺសុទ្ធធ្វើឡើងដោយធម្មជាតិ ដែលហៅថា អេកូរីសាយខល ( Eco Recycle ) ដោយយកកាកអំពៅជាវត្ថុធាតុដើមមកច្នៃជាផលិតផល សម្រេចតែម្តងដែលឆាប់រលាយលឿនជាងទុយោ ឬថង់ដែលធ្វើពីប្លាស្ទិកហើយនេះគឺពិតជាគំនិតដ៏ល្អមួយក្នុងការចូលរួមចំណែកថែរក្សាបិរស្ថាន និងការពារធម្មជាតិថែមទៀតផង។ មិនតែប៉ុណ្ណោះ ខ្ញី មិនត្រឹមតែមានបម្រើជូននូវម្ហូប និងភេសជ្ជៈអ៊ឺរ៉ុប តែមួយមុខនោះទេ លើសពីនេះ ខ្ញីក៏បង្កើតជាកាហ្វេប្រេនឈ្មោះថា ហ្វៀលហ្គូដ ( Feel Good ) ដែលផ្សំពីកាហ្វេធម្មជាតិ មានក្លិនឈ្ងុយ គ្មានជាតិគីមី មិនប៉ះពាល់ដល់សុខភាព។ កុំភ្លេចណា!! ពេលទៅដល់ខេត្តបាត់ដំបង សូមសាកល្បងជាមួយនឹងអាហារ ភេសជ្ជៈអ៊ឺរ៉ុបនៅហាងកាហ្វេខ្ញី ដែលជាហាងកាហ្វេនាំអារម្មណ៍ស្រស់ថ្លា និងបណ្តែតអារម្មណ៍វិលត្រឡប់ទៅរកសម័យកាលពីមុន៕
Article by CHAN SEREYRATH