«ស្នាម»គំនូរដែលឆ្លុះបញ្ចាំងពីទុកលំបាករបស់អ្នកដែលមានស្លាកស្នាមលើដងខ្លួនរបស់ទីលកន
NEWS 6 years ago សិល្បៈគឺជាឧគ្ឃោសនាសព្ទដ៏វិសេសមួយ ដើម្បីបញ្ចេញសារទៅកាន់មហាជនតាមរូបភាពច្នៃប្រឌិតប្លែកៗ អន្ទងចិត្តមនុស្សឲ្យយកចិត្តទុកដាក់លើសារទាំងនោះ។ ហេតុដូចនេះទើបសិល្បករ តែងតែប្រើប្រាស់គំនិតនិងទេពកោសល្យរបស់ខ្លួន ដើម្បីបង្ហាញពីសារដែលខ្លួនចង់ចែករំលែក។ ប្លែកពីអ្នកគំនូរដទៃបន្តិច អ្នកគំនូរជាស្រ្តីជំនាន់ថ្មី វ័យក្មេង កន សិរីសុភ័គ ឬហៅថា ទីល ត្រូវបានគេស្គាល់ថាជាសិល្បករដែលចូលចិត្តគូរគំនូរស្ទើរតែអាក្រាត បានបង្ហាញស្នាដៃគំនូរ និយាយពី "ស្នាម" ដែលនិយាយពីកង្វល់ផ្លូវចិត្តរបស់អ្នកដែលមានស្លាកស្នាមនៅលើដងខ្លួន ដូចជាសង្វារ ស្លាកស្នាមពីការវះកាត់ ផ្ទៃមុខមានស្នាម ឬរូបរាងមិនស្អាតជាដើម។ វិចិត្រករគំនូរវ័យ២២ឆ្នាំរូបនេះ និយាយថា មូលហេតុនៃចំណូលចិត្តក្នុងការគូរគំនូរដែលស្ទើរតែអាក្រាតនេះ គឺគ្រាន់តែដើម្បីបង្ហាញពីអ្វីដែលជាខ្លួនឯង លើកកម្ពស់ស្រ្តីភេទ និងទម្លាប់ក្នុងសង្គមដែលឃាត់ឃាំងស្រ្តីមិនឲ្យបញ្ចេញគំនិតផ្ទាល់ខ្លួនរបស់នាងជាដើម។ តាមរយៈគំនូរក្នុងការតាំងពិពរណ៌ ម្ចាស់គំនូរនេះបានពន្យល់ថា «យើងធ្វើការតាំងពិព័រណ៍នេះ គឺដើម្បីឲ្យពួកគាត់ដឹងថា នរណាក៏អាចមានបញ្ហាទាំងអស់នេះដែរ ដូច្នេះពួកគាត់មិនគួរយកចំនុចទាំងនេះមកដាក់សម្ពាធលើខ្លួនឯង ឲ្យកាន់តែបាក់ទឹកចិត្តនោះទេ។» ទម្រាំបានចេញជារូបគំនូរធំៗទាំង ៧ ផ្ទាំង ទីលត្រូវចំណាយពេលយូរ ដើម្បីគិតរកគន្លឹះច្នៃប្រឌិតដើម្បីឲ្យប្លែកពីគំនូរពីស្នាម ដែលសិល្បករមុនៗធ្លាប់បង្ហាញរួចមកហើយ។ ទីលនិយាយថា «ខ្ញុំឃើញថានៅប្រទេសកម្ពុជា មាននិយាយពី ស្នាម ដែរ ប៉ុន្តែភាគច្រើនជារូបថត។ ស្នាម របស់ខ្ញុំជាគំនូរ ដែលវាខុសប្លែកពីគេមួយចំណុច ហើយមួយចំណុចទៀត គឺខ្ញុំមិនបង្ហាញមុខនរណាម្នាក់ទេ ដោយបង្ហាញតែស្នាម និងការបិទបាំងតិចតួច។»
រំឭកពីដំណើរដើមទងនៃការចាប់អាជីពជាអ្នកគំនូរ កញ្ញា ទីល បានព្យាយាមអភិវឌ្ឍស្នាដៃគំនូររបស់ខ្លួនចាប់តាំងពីធំពេញវ័យ និងបានចាប់ផ្តើមការងារសិល្បៈជាអ្នកគំនូរតាំងពីចុងឆ្នាំ ២០១៦ ដែលបង្កឲ្យមានភាពចម្រូងចម្រាសក្នុងគ្រួសារខ្លះផង ដោយសារការជំទាស់ពីអាណាព្យាបាល។ ត្បិតតែព្យាយាមបន្តយកបរិញ្ញាបត្រផ្នែកធុរកិច្ច ដូចបំណងរបស់អ្នកមានគុណ ប៉ុន្តែទីលនៅតែមិនព្រមបោះបង់ក្តីស្រលាញ់របស់ខ្លួនឡើយ រហូតអាចបន្ទន់ចិត្តគ្រួសារឲ្យទទួលយកការងារជាអ្នកគំនូររបស់ខ្លួន។ ជាយូរមកហើយ ដែលទីលព្យាយាមបង្ហាញស្នាដៃរបស់ខ្លួន តាមរយៈការគូរគំនូរតូចៗជាច្រើននិងចែកចាយលើបណ្តាញសង្គម ក៏ដូចជាការចូលរួមគូរគំនូរដោយឥតគិតថ្លៃ នៅក្នុងកម្មវិធីវប្បធម៌មួយចំនួន។ ដូចនឹងអ្នកគំនូរមួយចំនួនដែរ ទីលមិនបានសិក្សាផ្នែកគំនូរនៅបណ្តាសាលានោះទេ ប៉ុន្តែបានចំណាយពេលជាច្រើនរៀនសូត្រពីបច្ចេកទេសគូរគំនូរដោយខ្លួនឯងជាប្រចាំ។ ទីលនិយាយថា មិនមែនដោយសារសាលានៅក្នុងស្រុកមិនមានលក្ខខណ្ឌគ្រប់គ្រាន់សម្រាប់ការរៀនសូត្របច្ចេកទេសគំនូរនោះទេ ប៉ុន្តែបញ្ហាដែលកើតឡើងលើអ្នកគំនូរមួយចំនួនគឺការជំទាស់ពីអាណាព្យាបាល ដែលបណ្តាលឲ្យអ្នកគំនូរជំនាន់ថ្មីជាច្រើនសុទ្ធសឹងតែមិនបានទទួលការបណ្តុះបណ្តាលពីសាលាគំនូរ។
Image Courtesy: TYL KAN
ដូចយើងបានដឹងមកហើយថា ការងារជាអ្នកគំនូរគឺសុទ្ធតែកើតឡើងដោយទេពកោសល្យពីកំណើត ហើយទេពកោសល្យទាំងនោះអាចយកមកច្នៃជាអាជីពដើម្បីរកចំណូលបានតិចឬច្រើនអាស្រ័យលើបច្ចេកទេស និងការគ្រប់គ្រងស្នាដៃ របស់អ្នកគំនូររៀងៗខ្លួន។ ជាក់ស្តែង នៅក្នុងទីផ្សារការងារដែលសំបូរការប្រកួតប្រជែង ទីល កំពុងព្យាយាមកាន់តែខ្លាំងដើម្បីស្វែងរកទីផ្សារការងារជាក់លាក់ ខណៈដែលទើបនឹងបញ្ចប់ការតាំងពិព័រណ៍ទោល របស់ខ្លួនលើកដំបូង កាលពីពេលថ្មីៗនេះ។ ការងារជាអ្នកគូរគំនូរមានការពិបាកឬស្រួល អាស្រ័យទៅតាមប្រធានបទនីមួយៗ និងតម្រូវការរបស់អតិថិជន។ ខណៈពេលដែលចាប់ផ្តើមអាជីពជាអ្នកគូរគំនូរម្ដងបន្តិចៗកាលពី២ឆ្នាំមុន អ្នកគំនូរជើងថ្មីនេះមិនទាន់មានទំនុកចិត្តលើអ្វីដែលខ្លួនអាចផ្តល់ឲ្យអតិថិជនឡើយ។ «ពេលដំបូងមិនទាន់មានទំនុកចិត្តលើអ្វីដែលយើងអាចផ្តល់ឲ្យគេ ណាមួយនៅក្មេង ខ្លាចគេគ្រាន់តែប្រើប្រាស់យើងជាដើម។»
Image Courtesy: TYL KAN
ទីល ដែលជាអ្នកគំនូរសម្រាប់ការបោះផ្សាយ គំនូរPortrait និងគំនូរសម្រាប់បោះពុម្ពក្នុងសៀវភៅរូបនេះ យល់ឃើញថាចំណុចសំខាន់ដើម្បីធ្វើឲ្យស្នាដៃគំនូរនៅតែមានតម្លៃខ្ពស់ គឺធ្វើយ៉ាងណាអ្នកគំនូរត្រូវចេះលក់សេវាកម្មរបស់ខ្លួនទៅកាន់អតិថិជន និងអាចនិយាយតម្លៃយ៉ាងណាឲ្យសាកសមនឹងស្នាដៃគំនូរ។ ទីលអះអាងថា «អ្វីគ្រប់យ៉ាងគឺទាក់ទងនឹងមុខជំនួញ ទោះបីជាអ្នកសិល្បៈក៏ត្រូវការទាក់ទងនឹងមុខជំនួញដែរ។ គេនិយាយថា យើងធ្វើអីដែលយើងស្រលាញ់ ហើយលុយរត់រកយើង។ ប៉ុន្តែសម័យនេះ ទាល់តែយើងចេះបត់បែនបន្តិច ហើយអាចមានជំនាញគ្រប់គ្រងមុខជំនួញខ្លួនឯង។» មិនទាន់បញ្ចប់ត្រឹមនេះទេ ទីលកំពុងរៀបចំគម្រោងអនាគតរបស់ខ្លួនតាមរយៈការប្រែក្លាយជំនាញនិងចំណេះដឹងផ្នែកធុរកិច្ចឲ្យមានប្រយោជន៍សម្រាប់ជំនួញផ្ទាល់ខ្លួនមួយ។ អរគុណដល់ការណែនាំផ្លូវរបស់អាណាព្យាបាលរបស់ទីល មកដល់ពេលនេះ កញ្ញាទីលបានដឹងថាចំណេះដឹងក្នុងការគូរគំនូរតែមួយមុខមិនគ្រប់គ្រាន់សម្រាប់ការបង្កើតអាជីពចិញ្ចឹមជីវិតនោះទេ ព្រោះជាក់ស្តែងវាត្រូវការការបណ្តុះគំនិតក្នុងមុខជំនួញបន្ថែមទៀតទើបប្រសើរ។ «មកដល់ពេលនេះ ខ្ញុំអរគុណប៉ាម៉ាក់ខ្ញុំទៅវិញទេ ព្រោះបើខ្ញុំមិនរៀនBusiness ក៏ប្រហែលជាខ្ញុំមិនចេះនិយាយជាមួយភ្ញៀវ មិនហ៊ាននិយាយជាមួយគេនោះទេ។» ទីលបានបន្ថែមថា «អ្វីដែលជាគម្រោងខ្ញុំចង់បាន គឺប្រឡូកនឹងការងារមួយដែលទាក់ទងនឹងការងារច្នៃប្រឌិតប៉ុន្តែស្ថិតនៅក្នុងរបទនៃមុខជំនួញវិញម្ដង។ ប៉ុន្តែបច្ចុប្បន្ននេះ ខ្ញុំត្រូវការរៀនបន្ថែមឲ្យបានច្រើនជាងមុនសិន។ ខ្ញុំគិតថា នៅថ្ងៃខាងមុខទៅ បើខ្ញុំអាចអភិវឌ្ឍជំនាញរបស់ខ្ញុំបន្ថែមទៀតបាន ខ្ញុំនឹងផ្តល់នូវសេវាកម្មប្លែកពីគេដូចជាការគូររូប 2D animation ជាដើម។»
ក្នុងនាមជាអ្នកគំនូរឯករាជ្យ ទីលតែងតែទទួលភ្ញៀវទាក់ទងរហូតមក មានអតិថិជនច្រើនបានស្គាល់ស្នាដៃរបស់ទីលជាហូរហែរ ដែលអតិថិជនគោលដៅទាំងនោះភាគច្រើនមានវ័យក្រោម៣០ឆ្នាំ ដែលចូលចិត្តគំនូរឌីជីថល និងគំនូរសម្រាប់ការផ្សាយពាណិជ្ជកម្ម។ ខណៈដែលទីលអះអាងថា អតិថិជនគោលដៅរបស់អ្នកគំនូរបែបប្រពៃណីច្រើនតែមនុស្សវ័យចំណាស់ និងបរទេស ដែលធ្វើឲ្យទីផ្សារគំនូររបស់អ្នកគំនូរជំនាន់ថ្មីនិងអ្នកគំនូរប្រពៃណីមានទីផ្សារប្រហាក់ប្រហែលគ្នា។ មួយវិញទៀត ស្នាដៃគំនូររបស់សិល្បករបច្ចុប្បន្នអាចប្រៀបធៀបជាមួយនឹងសិល្បករបរទេសបាន ដោយសារគំនិតបច្ចេកទេសស៊ីជម្រៅអាចផ្តល់សារតាមរយៈគំនូរដល់មនុស្សទូទៅ៕
Image Courtesy: TYL KAN
Article by Nyka