×

រ៉ា​ហ្វែល ស៊ីហ្វ្រេដ វិចិត្រករ​ជន​ជាតិ​បារាំង​ផ្សង​ព្រេង​នៅ​លើ​ទឹក​ដី​ប្រទេសកម្ពុជា

NEWS 6 years ago
 
 

          ដោយ​សារ​តែ​ប្រទេស​កម្ពុជា​ជា​ប្រទេស​មួយ​ដែល​សម្បូរ​ទៅ​ដោយ​មត៌ក​ធនធាន​ធម្មជាតិ​ និង​វប្បធម៌​យ៉ាង​ល្អ​អនេក​ខុស​ប្លែក​ពី​បណ្តា​ប្រទេស​ផ្សេងៗ​នៅ​ក្នុង​ទ្វីប​អាស៊ី ​ទើប​មាន​បុរស​ជនជាតិ​បារាំង​ម្នាក់​បាន​ចំណាយ​ពេល​ជា​ច្រើន​ឆ្នាំ​ក្នុង​ការ​ត្រាច់ចរ​ផ្សង​ព្រេង​ស្ទើរ​គ្រប់​ច្រក​ល្ហក​នៃ​ប្រទេសកម្ពុជា​ដើម្បី​គូរ​រូប​គំនូរ​ជា​ច្រើន​ផ្ទាំង​ឆ្លុះ​បញ្ចាំង​អំពី​ទិដ្ឋភាព​និង​ជីវភាព​រស់​នៅ​ប្រចាំ​ថ្ងៃ​របស់​ប្រជាជន​នៅ​ក្នុង​តំបន់​ទាំង​នោះ​បង្ហាញ​ឲ្យ​ពិភពលោក​បាន​ស្គាល់។ ស្នាដៃ​របស់​គាត់​មិនមែន​គ្រាន់​តែ​ជា​ផ្ទាំង​គំនូរ​ធម្មតា​នោះ​ទេ​ ប៉ុន្តែ​វា​ក៏​អាច​ដើរ​តួនាទី​ជា​ផែនទី​ទេសចរណ៍​សម្រាប់​ទាក់ទាញ​ទេសចរជាតិ​និង​អន្តរជាតិ​ឲ្យ​ទៅ​ស្វែង​រក​សក្តានុពល​សំខាន់ៗ​នៃ​តំបន់​នោះ​ថែម​ទៀត​ផង​។

          ជនជាតិ​បារាំង​ដែល​ជា​វិចិត្រករ​ផ្សង​ព្រេង​នោះ​មាន​ឈ្មោះ​ថា ​រាហ្វែល ស៊ីហ្វ្រេដ (Raphaël Seyfried) មាន​ដើម​កំណើត​មក​ពី​ទី​ក្រុង​ស្ត្រាប៊ួរ (Strasbourg) ភាគ​ខាង​កើត​នៃ​ប្រទេស​បារាំង។ លោក​ជា​អតីត​និស្សិត​ផ្នែក​ស្ថាបត្យកម្ម ប៉ុន្តែ​ដោយសារ​តែ​លោក​មាន​ក្តី​ស្រមៃ​ចង់​ធ្វើ​ដំណើរ​ជុំវិញ​ពិភពលោក ​លោក​ក៏​បាន​សម្រេច​ចិត្ត​បោះបង់​អាជីព​ជា​ស្ថាបត្យករ​នៅ​ក្នុង​ប្រទេស​ស្វីស​ ហើយ​ចាប់​ផ្តើម​បំពេញ​ក្តី​ស្រមៃ​នៃ​ការ​ធ្វើ​ដំណើរ​ទៅ​ប្រទេស​មួយ​ទៅ​ប្រទេស​មួយ​ក្នុង​គោល​បំណង​ជួប​មនុស្ស​ថ្មីៗ​ស្វែង​យល់​អំពី​វប្បធម៌ ​និង​ចងក្រង​កំណត់​ត្រា​ទេសចរណ៍​តាម​រយៈ​សិល្បៈ​គំនូរ។ មុន​នឹង​មក​ដល់​ប្រទេស​កម្ពុជា ​វិចិត្រករ​ផ្សង​ព្រេង​រូប​នេះ​ធ្លាប់​បាន​ធ្វើ​ដំណើរ​ទៅ​កាន់​ប្រទេស​មួយ​ចំនួន​ ក្នុង​នោះ​រួម​មាន​ប្រទេស​អាល់បានី​ ប្រទេស​ក្រិច ​ប្រទេសញូវហ្សេលេន និង​ប្រទេស​អូស្ត្រាលី ប៉ុន្តែ​អ្វី​ដែល​គួរ​ជាទី​មោទនភាព​សម្រាប់​ប្រទេសកម្ពុជា​នោះ​គឺ​ប្រទេស​កម្ពុជា​ជា​ប្រទេស​ទីមួយ​ដែល​លោក​ចាប់អារម្មណ៍​ក្នុង​ការ​បង្កើត​ផលិតផល​សិល្បៈ​គំនូរ​ប្រភេទ​ថ្មី​ជា​ប្រយោជន៍​សម្រាប់​ភ្ញៀវទេសចរ នោះ​គឺ​ផលិតផល​ដែល​លោក​បាន​ប្រសិទ្ធនាម​ឲ្យ​ថា Travel Roll ដែល​មាន​ន័យ​ថា​រមូរ​សម្រាប់​ការ​ធ្វើ​ដំណើរ។

          រមូរ​សម្រាប់​ការ​ធ្វើ​ដំណើរ​គឺ​ជា​ផ្ទាំង​គំនូរ​ប្រវែង​ចន្លោះ​ពី​១.៥​ម៉ែត្រ​ទៅ​៣​ម៉ែត្រ (ខ្នាត 15cm ​ X 150 cm) ដែល​ត្រូវ​គេ​មូរ​ដោយ​មាន​ផ្សារ​ភ្ជាប់​ជាមួយ​នឹង​អត្ថបទ​ទាក់ទង​នឹង​ទេសចរណ៍​ខ្លី​ៗ​ព្រម​ទាំង​រូបភាព​អម​បន្ថែម​ផ្សេង​ៗ។ ម្ចាស់​ស្នា​ដៃ​បាន​បញ្ជាក់​ថា​ទេសចរ​អាច​លារ​មូរ​គំនូ​រនេះ​ ហើយ​ដាក់​ស៊ុម​ទុក​ដាក់​តាំង​លម្អ​ឬ​មូរ​រក្សា​ទុក​ជា​វត្ថុ​អនុស្សាវរីយ៍​តំណាង​វប្បធម៌​ខ្មែរ​ក៏​បាន។ គំនូរ​របស់​លោក​ត្រូវ​បាន​គូរ​ដោយ​ការ​ប្រើប្រាស់​ខ្មៅដៃ ប៊ិច ខ្មៅ​ពណ៌​ទឹក និង​រមូរ​ក្រដាស​គំនូរ​ដែល​មាន​ទម្ងន់​៣០០​ក្រាម។ គំនូរ​មួយ​ផ្ទាំង​ដែល​មាន​ប្រវែង​១.៥ម៉ែត្រ​ត្រូវ​ចំណាយ​ពេល​រហូត១​ខែ​ទើប​រួច​រាល់។ រី​ឯ​សម្បក​វេច​ខ្ចប់​រមូរ​ផ្ទាំង​គំនូរ​នោះ​ធ្វើ​អំពី​ស្លឹក​ត្នោត​ខ្មែរ​ដែល​ជា​ស្នាដៃ​និង​គំនិត​ច្នៃ​ប្រតិដ្ឋ​របស់​ប្រជាជន​ខ្មែរ​១០០​ភាគរយ។

          “ការ​ផលិត​សៀវភៅ​កំណត់ត្រា​នៃ​ការ​ធ្វើ​ដំណើរ​គឺ​ជា​ក្តី​សុបិន​របស់​កុមារ​គ្រប់​រូប​។ ចំណង់​របស់​ខ្ញុំ​គឺ​ស្វែង​យល់​ពី​ពិភពលោក​ដោយ​ការ​សង្កេត​ពី​វប្បធម៌​ការ​សិក្សា​លម្អិត​អំពី​ទេសភាព​និង​បណ្តែត​ខ្លួន​ទៅ​ក្នុង​បរិយាកាស​មួយ​ដែល​អាច​ឲ្យ​ខ្លួន​ឯង​ចាប់​យក​ខ្លឹមសារ​ពិត​នៃ​ប្រជាជន​និង​ទិដ្ឋភាព​ជុំវិញ។​ ការ​ដែល​អាច​ផ្តិត​យក​ព្រឹត្តិការណ៍​មួយ​ក្នុង​រមូរ​នៃ​ដំណើរ​កម្សាន្ត​មាន​ន័យ​ថា​វា​នឹង​អាច​ត្រូវ​បាន​ចងចាំ​ជានិច្ច​”លោក​បាន​បក​ស្រាយ។

          លោក​បាន​បន្ត​ទៀត​ថា​“ខ្ញុំ​តែងតែ​ពុះពារ​ព្យាយាម​ចម្រាញ់​យក​ភាព​ពិត​ប្រាកដ​ ភាព​ស៊ី​ជម្រៅ​ ចំណុច​រសើប​ និង​តថភាព​នៃ​ប្រជាជន។ ការ​បង្កើត​ផលិតផល​ទាំង​នេះ​នៅ​ក្នុង​ប្រទេស​កម្ពុជា​បាន​ផ្តល់​ឲ្យ​ខ្ញុំ​នូវ​សេចក្តី​កោត​ស្ញប់ស្ញែង​ចំពោះ​ភាព​ទន់ភ្លន់ សេចក្តី​សោមនស្ស​រីករាយ និង​ការ​ឱន​លំទោន​នៃ​វប្បធម៌​ខ្មែរ​ដែល​ខ្ញុំ​សង្ឃឹម​ថា​នឹង​បាន​ចែក​រំលែក​ដល់​អ្នក​។”

          ក្នុង​ចំណោម​តំបន់​ស្អាតៗ​ជា​ច្រើន​ដែល​លោក​បាន​ធ្វើ​ដំណើរ​ទៅ​ដល់​នៅ​ក្នុង​ប្រទេស​កម្ពុជា​ លោក​ចាប់​អារម្មណ៍​និង​ពេញ​ចិត្ត​ជាង​គេ​គឺ​ភ្នំ​កំពង់​ត្រាច​ដែល​ស្ថិត​នៅ​ក្នុង​ខេត្ត​កំពត​ និង​ស្រុក​ឆ្លូង​ដែល​ជាទី​ប្រជុំជន​ចាស់​មួយ​តាំង​ពី​សម័យ​អាណានិគមនិយមបារាំង​ស្ថិត​នៅ​ស្រប​តាម​បណ្តោយ​ដង​ទន្លេ​មេគង្គ​នៃ​ខេត្ត​ក្រចេះ។ ក្រុម​ការងារ​យើង​បាន​សាក​សួរ​លោក​ថា​ហេតុអ្វី​បាន​ជា​កន្លែង​ទាំង​ពីរ​នេះ​នៅ​តែ​ដក់​ជាប់​ក្នុង​បេះដូង​របស់​លោក​? លោក​បាន​ញញឹម​ហើយ​ឆ្លើយ​តប​ថា​លោក​ចូលចិត្ត​កំពង់​ត្រាច​ ព្រោះ​ទី​នោះ​សម្បូរ​ភ្នំ​មាន​ផ្លូវ​រថភ្លើង​នៅ​ជិត​នោះ​ហើយ​មាន​អាង​ហែល​ទឹក​ធម្មជាតិ​ ដែល​លោក​អ្នក​អាច​ចូល​ទៅ​ដល់​ក្នុង​ល្អាង​ភ្នំ​បាន។ ទេសភាព​នៅ​កន្លែង​ដទៃ​ទៀត​នៅ​ក្នុង​ប្រទេស​កម្ពុជា​និង​ ទេសភាព​នៅ​កំពង់ត្រាច​មាន​លក្ខណៈ​ខុស​គ្នា​មែនទែន​ ដោយសារ​នៅ​កន្លែង​ភាគច្រើន​មាន​លក្ខណៈ​រាប​ស្មើ។ ប៉ុន្តែ​ពេល​លោក​មក​ដល់​កំពង់​ត្រាច​លោក​ឃើញ​ទេសភាព​ភ្នំ​ប្លែក​ដែល​ខ្ពស់​ត្រដែត​ងើប​ផុត​ពី​ដី​ធ្វើ​ឲ្យ​លោក​លាន់​មាត់​ថា “វ៉ាវ​(Wow!)” តែ​ម្តង។

          ដោយ​ឡែក​ចំពោះ​ស្រុក​ឆ្លូង​ខេត្ត​ក្រចេះ​វិញ ​លោក​បាន​រៀប​រាប់​ថា ​ឆ្លូង​គឺ​ទាក់​ទង​នឹង​ផ្នែក​ស្ថាបត្យកម្ម​ដែល​មាន​រឿងរ៉ាវ​បង្កប់​ជា​ច្រើន។ ឆ្លូង​ជា​តំបន់​ប្រមូល​ផ្តុំ​ដោយ​សំណង់​អគារ​សម័យ​អាណានិគមនិយម​បារាំង ប៉ុន្តែ​សព្វ​ថ្ងៃ​អគារ​ទាំងនោះ​ត្រូវ​បាន​ប្រជាជន​ខ្មែរ​កាន់កាប់​រស់​នៅ​ដែល​នេះ​ជា​ការ​សំយោគ​បញ្ចូល​រវាង​វប្បធម៌​បារាំង​និង​វប្បធម៌​ខ្មែរ។ លោក​យល់​ថា​វា​ជា​ការ​ល្អ​សម្រាប់​ទស្សនា ​ហើយ​ទី​នោះ​គួរ​តែ​ត្រូវ​បាន​អភិរក្ស​ឲ្យ​បាន​ល្អ​សម្រាប់​ទាក់ទាញ​ភ្ញៀវ​ទេសចរ ព្រោះ​ពួក​គេ​អាច​ទៅ​មើល​អ្នក​ភូមិ​នោះ​ប្រកបរបរ​ផ្សេង​ៗ​នៅ​ក្នុង​អគារ​ទាំង​នោះ​ដូច​ជា​ជាង​ទង ​ផ្នែក​ខ្លះ​ជា​ភោជនីយដ្ឋាន​ និង​ខ្លះ​ជា​សណ្ឋាគារ។ អគារ​នីមួយៗ​មាន​មុខងារ​របស់​វា​ដាច់​ដោយ​ឡែកៗ​ដែល​ជន​បរទេស​គួរ​ចំណាយ​ពេល​សិក្សា​ស្វែង​យល់។

          ក្រៅ​ពី​តំបន់​ទាំង​ពីរ​ខាង​លើ ​វិចិត្រករ​ រាហ្វែល​ ធ្លាប់​បាន​ធ្វើ​ដំណើរ​ទៅ​កាន់​ខេត្ត​រតនគិរី ខេត្ត​មណ្ឌលគិរី ខេត្ត​ស្ទឹងត្រែង ខេត្ត​បន្ទាយ​មានជ័យ ខេត្ត​សៀមរាប ​ខេត្ត​បាត់ដំបង ខេត្ត​ព្រះសីហនុ​ ខេត្ត​កែប ខេត្ត​កំពង់ចាម ខេត្ត​តាកែវ។ លោក​អះអាង​ថា​លោក​ធ្លាប់​ជិះ​ម៉ូតូ​ផ្សងព្រេង​ក្នុង​ប្រទេស​កម្ពុជា​រហូត​ដល់​ចម្ងាយ១​ម៉ឺន​ទៅ១​ម៉ឺន២ពាន់​គីឡូម៉ែត្រ ហើយ​លោក​តែងតែ​សម្រប​ខ្លួន​តាម​ជីវភាព​រស់​នៅ​ជាក់​ស្តែង​របស់​ប្រជាជន​នៅ​ក្នុង​តំបន់​នីមួយៗ។ ឧទាហរណ៍​នៅ​ពេល​លោក​ទៅ​ស្នាក់​នៅ​ជាមួយ​គ្រួសារ​ខ្មែរ​មួយ​ក្នុង​ភូមិ​បណ្តែត​ទឹក​ កំពង់​ភ្លុក​នៃ​បឹង​ទន្លេ​សាប ក្នុង​ខេត្តសៀមរាប លោក​ត្រូវ​ចូល​គេង​ម៉ោង​៨យប់ បន្ទាប់​ពី​ទទួល​ទាន​អាហារ​ពេល​ល្ងាច​ជាមួយ​ម្ចាស់​ផ្ទះ​រួច ទោះ​បី​ជា​លោក​មាន​ទម្លាប់​ចំណាយ​ពេល​យប់​ក្នុង​ការ​គូរ​រូប​ក៏​ដោយ។

          អ្វី​ដែល​លោក​នឹក​មិន​ភ្លេច​អំពី​អនុស្សាវរីយ៍​ក្នុង​ពេល​ចុះ​គូរ​រូប​នៅ​តាម​តំបន់​ជន​បទ​ម្តងៗ​នោះ​គឺ​កុមារា​កុមារី​ជា​ច្រើន​តែងតែ​ចោមរោម​មើល​លោក​កំពុង​គូរ​។ ពួក​គេ​ឆ្ងល់​ថា​លោក​មក​ភូមិ​របស់​ពួក​គេ​ធ្វើ​អ្វី? ​ប៉ុន្តែ​លោក​អះអាង​ថា​ពួក​គេ​មិន​រំខាន​សកម្មភាព​លោក​គូរ​រូប​នោះ​ទេ ​ព្រោះ​នៅ​ពេល​លោក​គូរ​ ពួក​គេ​ចាប់​ផ្តើម​សង្កេត​មើល​យ៉ាង​យក​ចិត្ត​ទុក​ដាក់​។ អ្នក​ភូមិ​ទាំងនោះ​ភ្ញាក់​ផ្អើល​នៅ​ពេល​ដែល​ពួក​គេ​អាច​ចំណាំ​មុខ​មនុស្ស​នៅ​ក្នុង​រូប​គំនូរ​របស់​លោក​ថា​ជា​ឪពុក​ម្តាយ ​ឬ​ប្តី​ប្រពន្ធ​របស់​ពួក​គេ ​ឬ​ថា​ទី​តាំង​នៃ​រូប​នោះ​ជា​ផ្ទះ​ឬ​ផ្សារ​ក្នុង​ភូមិ​របស់​ពួក​គេ។ ត្រង់​ចំណុច​នេះ​ដែរ លោក​សង្កត់​ធ្ងន់​ថា “ការ​គូរ​គំនូរ​ធ្វើ​ឲ្យ​មាន​ទំនាក់​ទំនង​កាន់​តែ​ប្រសើរ​” ព្រោះ​នៅ​ពេល​វិចិត្រករ​ទៅ​ដល់​ទី​កន្លែង​ណា​មួយ​ដើម្បី​អង្គុយ​គូរ​រូប​មនុស្ស​ម្នា​នឹង​មក​ចោម​រោម​មើល​និង​ស្វែង​យល់​អំពី​ស្នាដៃ​គំនូរ​នោះ​ខុស​ពី​អ្នក​ទេសចរ​ទូទៅ​ដែល​ត្រូវ​ទៅ​ទាក់ទង​ប្រជាជន​នៅ​ពេល​ពួក​គេ​ទៅ​ដល់​គោលដៅ​របស់​ពួក​គេ។ នេះ​ជា​ចំណុច​វិជ្ជមាន​ដ៏​ធំ​មួយ​នៃ​ជីវិត​ជា​វិចិត្រករ។

Image Courtesy: Travel Roll - Raphaël Seyfried

          លោក​មាន​ប្រសាសន៍​ថា​លោក​ពិត​ជា​ស្រឡាញ់​ទេសភាព​ជន​បទ​ស្រុក​ស្រែ​ចម្ការ​និង​រីករាយ​ដែល​បាន​ឃើញ​ជីវិត​រស់​នៅ​ពិតៗ​របស់​ប្រជាជន​កម្ពុជា ​ជា​ពិសេស​ភាព​រួសរាយ​រាក់ទាក់​និង​ស្នាម​ញញឹម​របស់​កុមារ​កម្ពុជា។ ឯ​ការ​មក​រស់​នៅ​ទី​ក្រុង​គឺ​ដើម្បី​តែ​បុព្វហេតុ​ការងារ​តែ​ប៉ុណ្ណោះ​ ​មិន​មែន​ជា​ក្តី​ស្រមៃ​ក្នុង​ជីវិត​របស់លោក​ទេ។ ក្រៅ​ពី​នេះ​លោក​បន្ថែម​ទៀត​ថា​តម្លៃ​ពិសេស​នៃ​ផ្នត់​គំនិត​ក្នុង​វប្បធម៌​ខ្មែរ​ដែល​លោក​សង្កេត​ឃើញ​គឺ​ត្រង់​ថា“នៅ​ស្រុក​ខ្មែរ ខ្ញុំ​រៀន​រស់​នៅ​ក្នុង​បច្ចុប្បន្ន​កាល។ នៅ​ស្រុក​បារាំង​អ្នក​មិន​ដែល​គិត​អំពី​ថ្ងៃ​នេះ​ទេ​។ អ្នក​ត្រូវ​គិត​ពី​ម្សិលមិញ​ឬ​ថ្ងៃ​ស្អែក។ នេះ​មិនមែន​មាន​ន័យ​ថា​ប្រជាជន​ខ្មែរ​មិន​គិត​អំពី​អនាគត​កាល​ទេ​ តែ​ពួក​គេ​គិត​តិច​ជាង​ប្រជាជន​បារាំង​។ ខ្ញុំ​ពេញចិត្ត​(គំនិត) បែប​ខ្មែរ​ជាង ព្រោះ​ឥរិយាបថ​បែប​នេះ​បាន​បាត់បង់​ជា​យូរ​ណាស់​មក​ហើយ​ពី​ប្រទេសបារាំង។”  លោក​ចង់​មាន​ន័យ​ថា​ផ្នត់​គំនិត​ផ្តោត​លើ​បច្ចុប្បន្ន​កាល​នេះ​អាច​ជួយ​ឲ្យ​សិល្បករ​បំពេញ​ការងារ​បាន​តាម​សម្រួល​តាម​បែប​ធម្មជាតិ​មិន​បង្ខំ​បញ្ចប់​ការងារ​ទាំង​តក់ក្រហល់​ពេក​នោះ​ទេ ដែល​អាច​បណ្តាល​ឲ្យ​ប៉ះពាល់​ដល់​គុណភាព​ស្នាដៃ​ការងារ។

          នៅ​ថ្ងៃ​អនាគត​លោក​ចង់​ធ្វើ​ដំណើរ​ជុំវិញ​ពិភពលោក​ទៅ​កាន់​ប្រទេស​ផ្សេងៗ​ទៀត​ហើយ​នឹង​បន្ត​អាជីព​សិល្បៈ​គំនូរ​នេះ​ត​ទៅ​មុខ​ទៀត ប៉ុន្តែ​លោក​នឹង​មិន​ជ្រើសជ្រើស​ប្រធានបទ​ដដែល​ដូច​ដែល​លោក​ធ្លាប់​គូរ​នៅ​ក្នុង​ប្រទេសកម្ពុជា​កន្លង​មក​នោះ​ទេ​។ ទន្ទឹម​នឹង​នេះ​វិចិត្រករ​ជនជាតិ​បារាំង​រូប​នេះ​ចង់​ឲ្យ​ភ្ញៀវ​ទេសចរ​ជួយ​គាំទ្រ​ស្នាដៃ​គំនូរ​បែប​ទេសចរណ៍​ផ្សងព្រេង​របស់​លោក​ឲ្យ​បាន​ច្រើន​ដើម្បី​ទទួល​បាន​ចំណេះ​ដឹង​ផ្សេងៗ​អំពី​ប្រទេស​កម្ពុជា។ ប្រសិន​បើ​លោក​អ្នក​ចាប់អារម្មណ៍​ចង់​ឃើញ​ស្នាដៃ​គំនូរ​របស់​លោក​ លោក​អ្នក​អាច​ទស្សនា​ឬ​ទាក់ទង​សាក​សួរ​ព័ត៌មាន​បន្ថែម​តាមរយៈ​គេហទំព័រ​ផ្លូវ​ការ​របស់​លោក​ផ្ទាល់គឺ​www.travelroll.fr

Article by SRIN SOKMEAN


SUGGESTIONS