កាលពីព្រឹក ថ្ងៃទី ២០ ខែតុលានេះ នៅសណ្ឋាគារ The Plantation Urban Resort មានការរៀបចំកម្មវិធីតាំងពិព័រណ៍ដ៏គួរឲ្យចាប់អារម្មណ៍មួយ ដែលជាការប្រមូលផ្តុំ និងបង្ហាញនូវគំនូរសិល្បៈដែលឆ្លុះបញ្ចាំងអំពីតថៈភាពនៃជីវិតរស់នៅប្រចាំថ្ងៃក៏ដូចជាសកម្មភាពផ្សេងៗនៅលើដងវិថីរបស់ប្រជាជនខ្មែរយើង។ ក្នុងនោះដែរ មានការចូលរួមពីក្រុមពីវិចិត្រករគំនូរដៃឯកទាំងជនជាតិខ្មែរ និងបរទេស និងមានបង្ហាញនូវគំនូរសិល្បៈក្នុងបែបផែនខុសៗគ្នា ជាក់ស្តែងគំនូរភាគច្រើនផ្តោតសំខាន់ទៅលើរូបភាព ផ្សារខ្មែរ មុខរបរប្រចាំថ្ងៃរបស់ប្រជាជនកម្ពុជា មានទាំងការលក់ដូរបន្លែបង្ការ មុខរបរនៅលើដងវិថី ការប្រកបអាជីវកម្មផ្សេងៗ និងមានគំនូរសាលារៀន ពិសេសបង្ហាញអំពីសិល្បៈក្បូរក្បាច់រចនារបស់ខ្មែរ និងទេពអប្សរាជាដើម។ ជាការពិតណាស់ ផ្សារគឺជាកន្លែងមួយដែលប្រមូលផ្តុំទៅដោយកន្លែងលក់ដូរទំនិញគ្រប់ប្រភេទ ហើយក៏ជាកន្លែងមួយដែលអាចឲ្យយើងដើរកម្សាន្តដើម្បីសិក្សាស្វែងយល់ពី វប្បធម៌ បរិយាកាស ភ្លក់រសជាតិអាហារប្លែកៗ និងទស្សនាសម្រស់ដ៏ស្រស់ស្អាតនៃកន្លែងលក់បន្លែបង្ការចម្រុះពណ៌នានា ហេតុដូចនេះ ការតាំងពិព័រណ៍នេះគឺជាផ្នែកមួយមិនត្រឹមតែបង្ហាញអំពីគំនិតសិល្បៈប៉ុណ្ណោះទេ តែថែមទាំងជាចំណែកមួយអាចឲ្យយើងសិក្សាអំពីជីវិតរស់នៅរបស់ប្រជាជនកម្ពុជា ក៏ដូចជាជួយលើកស្ទួយទៅដល់វប្បធម៌ខ្មែរតាមរយៈរូបគំនូរឆ្លុះបញ្ចាំងអំពីទិដ្ឋភាពពិតសកម្មភាពពិតផងដែរ៕
Article by PAN SIVLY