តើការឆ្លៀតពេលធ្វើការបណ្តើរ រៀនបណ្តើរ ផ្តល់នូវគុណសម្បត្តិ និងគុណវិបត្តិអ្វីខ្លះសម្រាប់និស្សិត?
TRAVEL & LIVING 6 years agoដោយសារតែមានតម្រូវការលើកត្តាផ្សេងៗ ទើបបង្ខំចិត្តឲ្យនិស្សិតមួយចំនួនធំត្រូវស្វះស្វែងរកការងារបណ្តើរ រៀនបណ្តើរ ដើម្បីបំពេញរាល់តម្រូវការចាំបាច់សម្រាប់ការរស់នៅរបស់ពួកគេ។ និស្សិតខ្លះ បានចំណាយពេលវេលាឆ្លៀតពីការសិក្សានៅតាមមហាវិទ្យាល័យ យកពេលនោះទៅធ្វើការងារ ដើម្បីទទួលបានប្រាក់ខែ សម្រាប់ដោះស្រាយក្នុងជីវភាពរស់នៅ។ ក្នុងនោះ វាបានផ្តល់នូវគុណសម្បត្តិ និងគុណវិបត្តិរួមផ្សំជាមួយគ្នា ដែលទាំងអស់នេះ នឹងក្លាយជាបញ្ហារបស់និសិ្សតកំពុងតែជួបប្រទះ ខណៈពេលដែលពួកគាត់ បែងចែកពេលវេលាសម្រាប់ការសិក្សាផង និងបំពេញការងារក្នុង ក្រុមហ៊ុន ឬស្ថាប័នឯកជននានាផង។
ជាការពិតណាស់ ប្រសិនបើយើងវិភាគឱ្យដល់ ការឆ្លៀតពេលធ្វើការក្នុងអំឡុងពេលរៀនសូត្រ បែបនេះ អាចជាទុនក្នុងការឈោងចាប់ឱកាសការងារបានល្អ នៅពេលដែលពួកគាត់បានបញ្ចប់ការសិក្សាថ្នាក់ឧត្តម។ យើងឃើញថា នៅពេលដែលក្រុមហ៊ុន ឬបណ្តាអង្គភាពនានា ដែលដាក់ប្រកាស ជ្រើសរើសបុគ្គលិកម្តងៗ រាល់បេក្ខជនដែលដាក់ពាក្យចូលបម្រើការងារនោះ គេតែងតែផ្តល់សិទ្ធិអាទិភាពខ្ពស់សម្រាប់អ្នកដែល បទពិសោធន៍ការងារខ្លះៗ។ នេះ អាចនិយាយបានថា ជាផលចំណេញមួយ សម្រាប់និស្សិតគ្រប់រូបដែលបានលះបង់ពេលវេលាសិក្សាមួយផ្នែកដើម្បីបញ្ច្រៀតខ្លួនចូលទៅក្នុងវិស័យការងារទាំងនៅក្មេងវ័យ ដែលអាចផ្តល់នូវបទពិសោធន៍ និងមួយវិញទៀត សំដៅដល់ការជួយសម្រួល ផ្លូវសេដ្ឋកិច្ចដល់គ្រួសារ អាណាព្យាបាលបានមួយភាគធំ។ លើសពីនេះទៀត ការប្រឡូកក្នុងរង្វង់ការងារ ធ្វើឱ្យនិសិត្សដែលកំពុងតែសិក្សានោះ អាចយល់ពីបរិបទសង្គមខាងក្រៅបានច្រើន។ មានន័យថា ពួកគេ អាចស្គាល់មនុស្សជុំវិញខ្លួន ងាយនឹងទទួលយកព័ត៌មាន រួមទាំងចំណេះដឹងផ្សេងៗ ទាក់ទងនឹងជីវិតរស់នៅបានផងដែរ។ ទស្សនៈមួយតែងតែលើកឡើងថា ការស្វែងរកការងារបន្ថែមធ្វើ ក្នុងពេលសិក្សា គឺដោយសារតែនិស្សិតជួបប្រទះនឹងបញ្ហាលំបាក ខ្វះប្រាក់កាស ក្នុងការឧបត្ថម្ភលើការសិក្សា ដូចជា បង់ថ្លៃមហាវិទ្យាល័យ ផ្ទះជួល និងការហូបចុកផ្សេងៗ ប៉ុន្តែនេះវាមិនមែនជាហេតុផល ទាំងស្រុង ដែលរុញច្រានឱ្យនិស្សិតខ្លះ ធ្វើការទាំងខ្លួននៅរៀននោះទេ។ ផ្ទុយទៅវិញ មិនថា និស្សិត ដែលស្ថិតក្នុងជីវិតភាពកម្រិតបែបណា ក៏គួរតែឆ្លៀតបណ្តុះខ្លួនចូលក្នុងការងារជាបណ្តើរៗ ទម្រាំតែរៀនចប់ ទើបធ្វើឱ្យពួកគេ អាចយល់បានថា ជីវិត និងការសិក្សា គឺទន្ទឹមគ្នា។ មួយវិញទៀតសោត ការងារ បានបង្រៀននិស្សិតគ្រប់រូបឱ្យរៀនចេះហាត់ពត់លត់ដុំ ជីវិតរបស់ខ្លួន ផ្សារភ្ជាប់នឹងសង្គម ដែលសំដៅដល់ការប្រឹងប្រែងដោះស្រាយ ត្រួសត្រាយដោយខ្លួនឯង មិនពឹងផ្អែកទៅលើជំនួយពីគ្រួសារទាំងមូល។ ដូចជាពាក្យដែលគេតែងលើកឡើងថា «រកលុយខ្លួនឯង ទើបដឹងថាពិបាកប៉ុនណា» ដូចនេះ វាប្រៀបដូចជាអង្គចងចាំ ( Memory ) មួយដែលបានដាស់តឿនឱ្យនិស្សិតចេះសន្សំសំចៃ មិនភ្លើតភ្លើន ចាយលុយ ខ្ជះខ្ជាយជាដើម។ មានការងារខ្លះ នៅពេលដែលពួកគេ ចូលទៅបម្រើការក្នុងនោះ វាហាក់ដូចជា មេរៀនមួយជ្រុង ជួយដល់ការសិក្សារបស់គេ ដូចជាទាក់ទងនឹងការធ្វើកិច្ចការសាលាជាដើម។
សរុបមកវិញ យើងឃើញថា ការរៀនបណ្តើរ ធ្វើការបណ្តើរ ក៏ជាគុណសម្បត្តិមួយ សម្រាប់ដុសខាត់ ជីវិតយើងឱ្យមានភាពល្អប្រសើរពីមួយពេលទៅមួយផងដែរ។ យ៉ាងណាមិញ ទន្ទឹមនឹងការទទួលបានលទ្ធផលជាទីគាប់ប្រសើរសម្រាប់និស្សិតនោះ ការធ្វើការអំឡុងពេលរៀនសូត្រនេះ ក៏វាបានជះឥទ្ធិពលខ្លះៗទៅដល់ការសិក្សារបស់ពួកគេផងដែរ។ ជាការពិតណាស់ ខួរក្បាលរបស់យើង ប្រសិនបើមានតួនាទីច្រើន គិតទៅលើរឿងនេះផង រឿងនោះផង វាធ្វើឲ្យយើងមិនសូវជាផ្តោតសំខាន់ទៅលើចំណុចណាមួយឡើយ។ វាមិនខុសគ្នាពី ការបែងចែកពេលវេលាសិក្សា និងធ្វើការរបស់និស្សិតនោះទេ ដែលពេលខ្លះ អាចធ្វើឱ្យមានការរាំងស្ទះដល់ការរៀនសូត្រ។ ដូចជា កម្រិតនៃការទទួលយកចំណេះដឹងក្នុងសាលា មិនសូវបានល្អ មិនបានដិតដល់ និងមិនបានចូលរួមជាប្រចាំ រាល់មានការចូលរួមធ្វើការងារសាលាមួយណាផង។ ពេលខ្លះ ដោយសារតែនិស្សិត ទទួលសម្ពាធពីបរិយាកាសការងារខាងក្រៅ ម្ល៉ោះហើយ ទើបបង្ខំឱ្យពួកគេ ត្រូវផ្អាកការគិតរឿងរៀនសូត្រមួយដុំសិន។ នេះហើយ ដែលជាមូលហេតុបង្កឱ្យការសិក្សាធ្លាក់ចុះបន្តិច ដែលអាចនិយាយបានថា បែកអារម្មណ៍។ ម្យ៉ាងវិញទៀត ងាកមកមើលវត្តមាននៃការមករៀន គឺមិនសូវទៀងទាត់ឡើយ បណ្តាលឱ្យពួកគេ អាចនឹងតាមមិនទាន់ពីមេរៀនសាលាទៀតផង ។ មានពេលខ្លះទៀត និស្សិតអាចនឹងទទួលហានិភ័យ ប្រលងសងក៏ថាបាន។ ណាមួយ ត្រូវបែងចែកខួរក្បាលទៅលើការសិក្សាផង ការធ្វើការផង ដូចនេះ មិនសូវឱ្យពួកគេ មានពេលវេលា សម្រាប់ក្រុមគ្រួសារឡើយ។ ទាញមកវិញយ៉ាងខ្លី យើងឃើញថា អ្វីក៏ដោយ តែងតែមានគុណសម្បត្តិ និងគុណវិបត្តិ ដើរទន្ទឹមគ្នា ប៉ុន្តែយើង ក៏គួរបែងចែកវាឱ្យដាច់ស្រឡះពីគ្នា ហើយក្នុងនាមជានិស្សិតដែលកំពុងតែសិក្សាមិនគួរបោះបង់ការរៀនសូត្រ ស្រវាចាប់តែរឿងការងារពេកទេ ព្រោះចំណេះដឹង សំខាន់ណាស់ សម្រាប់ជីវិតអនាគតទៅមុខទៀត។ យ៉ាងណាមិញ រឿងក្រពះក៏ជារឿងមួយសំខាន់ខ្លាំង ហេតុនេះហើយ ការរៀនបណ្ដើរ ធ្វើការបណ្តើរ ពិតជាផ្តល់ផលល្អច្រើន ប្រសិនបើនិស្សិតម្នាក់ៗ ចេះបែងចែកពេលវេលាឲ្យបានត្រឹមត្រូវ៕
Article by CHAN SEREYRATH