វិធីសាស្ត្ររៀបចំបន្ទប់តូចឲ្យមើលទៅទូលាយ ស្រស់ស្អាត និងទាន់សម័យបំផុត
TRAVEL & LIVING 5 years agoបន្ទប់គឺជាកន្លែងនិទ្រា និងជាកន្លែងផ្តល់នូវសេចក្តីសុខក្នុងការសម្រាកកាយ បន្ទាប់ពីបំពេញការងារនឿយហត់ស្ទើរពេញមួយថ្ងៃ។ យ៉ាងណាមិញ ការរៀបចំបន្ទប់ឲ្យមានសណ្តាប់ធ្នាប់ លាយឡំទៅដោយការតុបតែងលម្អបង្កើនភាពស្រស់ស្អាត ក៏ជាផ្នែកមួយជួយឲ្យបរិយាកាសទទួលទានដំណេកមានផាសុកភាព និងប្រកបដោយការលង់លក់ស្រួលផងដែរ។ កន្លងមក អ្នកដែលមានបន្ទប់គេងទំហំតូចរមែងតែងតែមានកង្វល់ចំពោះការរៀបចំ ដោយមិនដឹងថាតើគួរដេគ័របន្ទប់បែបណាដើម្បីឲ្យមើលទៅស្រស់ស្អាត និងមានលក្ខណៈទូលាយ ហើយវាកាន់តែស្មុគស្មាញថែមទៀតសម្រាប់អ្នកដែលមានរបស់របរច្រើន។ ជាការពិតណាស់ គ្រឿងអេឡិចត្រូនិចគឺជាឧបករណ៍រំខានចម្បងដល់ដំណេក ហើយបន្ទប់ដែលស្រស់ស្អាត ក៏មិនចាំបាច់ទាល់តែមានសម្ភារទំនើបៗ ឬតុបតែងគ្រប់ជ្រុងទើបល្អឥតខ្ចោះនោះដែរ អ្វីដែលសំខាន់គឺត្រូវដឹងពីគន្លឹះក្នុងការរៀបចំទៅតាមជ្រុងនីមួយៗ និងដឹងពីរបៀបទុកដាក់របស់របរមិនចាំបាច់មួយចំនួនជាការស្រេច ហេតុដូចនេះ ដើម្បីឲ្យជីវិតរស់នៅប្រចាំថ្ងៃកាន់តែប្រសើរ សូវរីន សូមលើកយកនូវវិធីសាស្ត្រក្នុងការរៀបចំបន្ទប់តូចឲ្យមើលទៅមានលក្ខណៈទូលាយ មានភាពស្រស់ស្អាត និងទាន់សម័យបំផុតដូចខាងក្រោម។
1.ជំហានទី ១៖
ពណ៌ស គឺជាពណ៌ថាមពលពន្លឺមួយដែលស័ក្តិសមបំផុតសម្រាប់បន្ទប់តូច ដោយសារតែវាធ្វើឲ្យទីតាំងតូចមិនមានភាពស្មុគ ឬចង្អៀតភ្នែក។ ដូចនេះដើម្បីឲ្យបន្ទប់តូចមើលទៅទូលាយ គួរប្រើពណ៌ស ឬពណ៌លាយសមានលក្ខណៈខ្ចីហើយស្រាល លាបទៅលើជញ្ជាំងពេញបន្ទប់ រួមទាំងបង្អួចផងដែរ (ប្រសិនបើមាន)។
2.ជំហានទី ២៖
ទីតាំងគ្រែគឺជាផ្នែកមួយដ៏សំខាន់ ហើយវាក៏ទាមទារទំហំបញ្ឈរខ្លួនគួរសមផងដែរ ជាក់ស្តែងប្រសិនបើយើងដាក់គ្រែនៅចំកណ្តាល ឬស្ទើរជាប់ជញ្ជាំង នោះវាធ្វើឲ្យបន្ទប់កាន់តែចង្អៀតថែមទៀត ដូច្នេះទីតាំងដែលល្អបំផុតត្រូវរុញគ្រែឲ្យជាប់ទៅនឹងជញ្ជាំងនៃជ្រុងម្ខាងដើម្បីឲ្យទីតាំងម្ខាងទៀតមានសភាពទូលាយក្នុងការដើរ ពិសេសធ្វើឲ្យការគេងកាន់តែមានភាពស្និទ្ធស្នាលដោយមិនចាំបាច់ព្រួយបារម្ភចំពោះអ្នកគេងរើបម្រាស់ធ្លាក់ពីលើគ្រែញឹកញាប់។ សម្រាប់បន្ទប់គ្មានគ្រែមានតែពូកក៏អាចអនុវត្តដាក់ទៅតាមទីតាំងខាងលើដែលនឹងធ្វើឲ្យបន្ទប់កាន់តែមានសភាពទូលាយឡើង។
3.ជំហានទី ៣៖
ជឿទេថា គ្រាន់តែក្បាច់បន្ថែមនៅចុងគ្រែមានកម្ពស់ខ្ពស់បន្តិចក៏ជាផ្នែករំខានក្នុងការរៀបចំបន្ទប់តូច? ពិតប្រាកដណាស់ ដ្បិតក្បាច់នៅចុងគ្រែលយផុតពីពូកបន្តិច ប៉ុន្តែវាអាចនឹងធ្វើឲ្យទើសភ្នែក និងបង្កភាពមិនស្រឡះនៅក្នុងបន្ទប់ផងដែរ។ ជំនួសការប្រើគ្រែមានបន្ថែមក្បាច់នៅចុងជើង មកជ្រើសរើសគ្រែបែបលាតៗវិញម្តង ដែលមិនត្រឹមតែធ្វើឲ្យមើលទៅមានសណ្តាប់ធ្នាប់ល្អប៉ុណ្ណោះទេ តែថែមទាំងបង្កើនឲ្យបន្ទប់មានភាពទាន់សម័យមួយកម្រិតទៀត។ លើសពីនេះ ងាកមកជ្រើសរើសតែគ្រែដែលមានក្បាលលេងក្បាច់ចម្លាក់វិញរឹតតែពិសេស។
4.ជំហានទី ៤៖
បន្ថែមសម្រស់បន្ទប់ដោយជ្រើសរើសទូតាំងទំហំតូចសមល្មមមួយដាក់នៅក្បែរក្បាលគ្រែ ទូតាំងគួរតែជាប្រភេទទូភ្ជាប់មកជាមួយធ្នើរឬប្រអប់សម្រាប់ដាក់របស់របរមួយចំនួនបាន វាអាចផ្តល់នូវភាពងាយស្រួលក្នុងការឈោងយកភ្លាមៗ រួមទាំងបង្កើនភាពទាន់សម័យដល់បន្ទប់ផងដែរ។ បន្ថែមការផ្សារភ្ជាប់ទៅនឹងធម្មជាតិ អាចមានតាំងលម្អដើមរុក្ខជាតិបៃតងឬផ្កានៅលើទូតាំងដើម្បីជាភាពស្រស់ស្អាត និងធ្វើឲ្យអារម្មណ៍ស្រស់ស្រាយ។
អាចជាគំនិតដ៏ឆ្លាតវៃក្នុងការបង្កើតភាពទាក់ទាញនៅក្នុងបន្ទប់តូច ដោយមានតុបណ្តោយវែងឬធ្វើធ្នើរតូចដែលមានប្រវែងលាតសន្ធឹងពីជ្រុងម្ខាងទៅជ្រុងម្ខាងនៃក្បាលគ្រែ។ នៅលើធ្នើរឬតុនេះយើងអាចដាក់តាំងលម្អនូវវត្ថុចម្រុះពណ៌ ឬស៊ុមរូបភាពតូចៗផ្សេងៗ ដែលធ្វើឲ្យមើលទៅស្រស់ស្អាតទាក់ទាញ និងហាក់បីដូចជាវត្ថុទាំងនោះកំពុងអណ្តែតនៅលើក្បាលដំណេករបស់យើងផងដែរ។
5.ជំហានទី ៥៖
កញ្ចក់ឆ្លុះអាចជួយពង្រីកទំហំបន្ទប់ឲ្យមើលទៅកាន់តែធំទូលាយ ដូចដែលយើងធ្លាប់ឃើញជាក់ស្តែងនៅកន្លែងមានទីតាំងចង្អៀតភាគច្រើនរមែងបិតកញ្ចក់ឆ្លុះស្ទើរតែពាសពេញជញ្ជាំង នេះក៏ដោយសាររូបភាពឆ្លុះបានបន្ថែមពន្លឺ និងបញ្ឆោតភ្នែកឲ្យឃើញទិដ្ឋភាពក្នុងកន្លែងតែមួយកាន់តែធំទូលាយឡើង។ សម្រាប់បន្ទប់គេង គួរបិតកញ្ចក់ឆ្លុះមួយជំហរខ្លួននៅលើជញ្ជាំងត្រង់ទីតាំងម្ខាងទល់មុខបង្អួច ឬបិតលាតលើផ្ទៃជញ្ជាំងទាំងស្រុងកាន់តែប្រសើរ។ គួរជ្រើសរើសការបិតកញ្ចក់ជាប់ជញ្ជាំងប្រសើរជាងដាក់បញ្ឈរ ព្រោះជួនកាលអាចរលំនាំបង្កគ្រោះថ្នាក់។
6.ជំហានទី ៦៖
ប្រសិនបើអ្នកកំពុងស្វែងរកគ្រែសម្រាប់បន្ទប់តូច យល់ល្អអ្នកគួរជ្រើសរើសទិញគ្រែដែលមានប្រអប់នៅខាងក្រោមគ្រែដើម្បីអាចជាប្រយោជន៍ក្នុងការទុកដាក់របស់របបឲ្យមានសណ្តាប់ធ្នាប់បានមួយកម្រិតធំ ឧទាហរណ៍ដូចជាដាក់សម្លៀកបំពាក់ ដាក់ស្បែកជើង និងសៀវភៅជាដើម ឃើញទេ! អ្នកអាចចំណេញច្រើនដោយមិនចាំបាច់ទិញទូសៀវភៅ ទូសម្លៀកបំពាក់ និងទូដាក់ស្បែកជើងទៀតផង ហើយកាន់តែពិសេស ធ្វើឲ្យគ្រែមើលទៅទាន់សម័យក៏ដូចជាបង្ហាញអំពីគំនិតច្នៃប្រឌិតខ្ពស់ក្នុងការរៀបចំបន្ទប់គេងផងដែរ។
ជំហាននីមួយៗខាងលើអាចជាគន្លឹះគោលក្នុងការរៀបចំបន្ទប់តូចឲ្យមើលទៅធំទូលាយ និងស្រស់ស្អាត ហើយដែលសំខាន់ប្រិយមិត្តក៏អាចរៀបចំតុបតែងបន្ថែមទៅតាមចំណង់ចំណូលចិត្តក៏ដូចជាបែបបទនៃការរស់នៅផ្ទាល់ខ្លួនផងដែរ កាន់តែសំខាន់ទៀតនោះបន្ទប់ដែលស្អាត គួរតែជាបន្ទប់មានផាសុកភាព និងអនាម័យជាប្រចាំ៕
Article by Hem Sokkhim