តើព្រះទីនាំងសារាយអណ្តែតចង្ហាន់ហុយដែលបានទទួលរង្វាន់លេខ១ពីព្រះមហាក្សត្រឆ្នាំទៅបាន ត្រៀមខ្លួនអ្វីខ្លះសម្រាប់ឆ្នាំនេះ?
NEWS 5 years agoប្រសិនបើលោកអ្នកធ្លាប់ទស្សនាការប្រណាំងទូកក្នុងព្រះរាជពិធីបុណ្យអុំទូកដែលប្រព្រឹត្តទៅជារៀងរាល់ឆ្នាំ លោកអ្នកច្បាស់ជាស្គាល់កិត្តិស័ព្ទទូកងមកពីខេត្តកំពង់ឆ្នាំងដ៏ល្បីរន្ទឺទូទាំងប្រទេសជាយូរឆ្នាំណាស់មកហើយនោះគឺ ទូកឈ្មោះ «ព្រះទីនាំងសារាយអណ្តែតចង្ហាន់ហុយ» ជាក់ជាមិនខាន។ ទូកនេះជាទូកប្រចាំវត្តវិហារហ្លួង ហៅវត្តផ្សារ ដែលមានទីតាំងស្ថិតក្នុងភូមិផ្សារ ឃុំផ្សារ ស្រុកបរិបូណ៌ ខេត្តកំពង់ឆ្នាំង។ ទូកនេះជាទូកចែវផ្នែកបុរសមានប្រវត្តិទទួល បានជ័យជំនះក្នុងការប្រកួតស្ទើររៀងរាល់ឆ្នាំមិនដែលខាន។
ជាក់ស្តែង កាលពីឆ្នាំ២០១៧កន្លងទៅនេះ ទូកព្រះទីនាំង ចង្ហាន់ហុយបានទទួលចំណាត់ថ្នាក់ក្នុងផែនលេខ១ ផ្នែកទូកចែវបុរស ក្នុងការចូលរួមពិធីប្រណាំងទូកង អបអរសាទរ ក្នុងព្រះរាជពិធីបុណ្យអុំទូក បណ្តែតប្រទីប និងសំពះ ព្រះខែ អកអំបុក ដែលបានប្រព្រឹត្តទៅនៅថ្ងៃទី ០២-០៣-០៤ ខែ វិច្ឆិកា ឆ្នាំ២០១៧។ ជាងនេះទៅទៀត ទូកងដែល មានឈ្មោះពីបរម្បរាមកនេះក៏មានស្នាដៃល្អទទួលបានជ័យលាភី ចំណាត់ថ្នាក់លេខ១ លើផ្នែកសោភ័ណភាព និង រចនាបថសំលៀកបំពាក់ សិល្បៈ កាយវិការនៃការចែវ ក្នុងឆ្នាំដដែល នេះផងដែរ ហើយដែលពានរង្វាន់នេះត្រូវបាន ប្រទានដោយព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដោយផ្ទាល់ព្រះហស្ថព្រះអង្គនៅព្រះរាជពន្លាជ័យទន្លេចតុមុខ រាជធានីភ្នំពេញ។
Image Courtesy: ព្រះទីនាំងសារាយអណ្តែត ចង្ហាន់ហុយ
មិនខុសពីសព្វមួយដង ឆ្នាំនេះទូក «ព្រះទីនាំងសារាយអណ្តែតចង្ហាន់ហុយ» បានត្រៀមខ្លួនរួចជាស្រេចទាំង សោភ័ណភាពទូក ទាំងកម្លាំងកាយ និង កម្លាំងចិត្តនៃកីឡាករដែលត្រូវចូលរួមប្រកួតរយៈពេលបីថ្ងៃនៅមុខព្រះបរម រាជវាំង ចាប់ពីថ្ងៃទី២១ ដល់ថ្ងៃទី២៣ ខែវិច្ឆិកា ឆ្នាំ២០១៨ ឆាប់ៗខាងមុខនេះ។ គួរបញ្ជាក់ដែរថា ទូកនេះមានប្រវែង ២៩.៥០ ម៉ែត្រ ចំណុះជើងចែវ ៤៦ កីឡាករមានចំនួន៤៩នាក់ កីឡាករបម្រុងចំនួន១៣នាក់ ចំនួនកីឡាករសរុប ៦២ នាក់។
ជារៀងរាល់ឆ្នាំ មុននឹងចេញពីខេត្តកំពង់ឆ្នាំងមកចូលរួមប្រកួតនៅរាជធានីភ្នំពេញ កីឡាករទាំងអស់ ព្រមទាំង ប្រជាពលរដ្ឋស្រុកបរិបូណ៌ ខេត្តកំពង់ឆ្នាំង ព្រមទាំងមន្រ្តីអ្នកមុខអ្នកការក្នុងតំបន់ សរុបរាប់រយនាក់បានចូលរួមដង្ហែទូកព្រះទីនាំងសារាយអណ្តែតចង្ហាន់ហុយចេញពីវត្តវិហារហ្លួង ហៅវត្តផ្សារ កាត់តាមផ្លូវជាតិលេខ៥ កាត់ផ្សារពន្លៃ រួចបត់តាមផ្លូវជាតិលេខ៥២ ឆ្ពោះទៅកាន់ឃុំឆ្នុកទ្រូ ហើយឈប់សំចតនៅភូមិកំពង់ព្រះគគីរដើម្បីឲ្យក្រុមកីឡាករធ្វើ ការហ្វឹកហាត់ទីនោះ។
យុវជន ម៉ូម វេហា កីឡាករព្រះទីនាំងសារាយអណ្តែតចង្ហាន់ហុយ បានរាយការណ៍ប្រាប់សូវរីនថា «នៅថ្ងៃទី១០ គេបានធ្វើពិធីក្រុងពាលី ហើយថ្ងៃទី១១ គេ ទម្លាក់ទូកចេញពីបង្គងហើយ។ បន្ទាប់មក គេទៅហាត់សមនៅ កំពង់ព្រះគគីរ ប្រហែល១អាទិត្យទៅ២អាទិត្យ រួចបានចេញទៅប្រកួតសាកនៅកំពង់ត្រឡាច។ សាកនៅកំពង់ត្រឡាច ហើយបានទៅព្រះបរមរាជវាំង។»
Image Courtesy: ព្រះទីនាំងសារាយអណ្តែត ចង្ហាន់ហុយ
ចំពោះឯកសណ្ឋានកីឡាករចែវទូកវិញ គឺមានលក្ខណៈខុសប្លែកពីកីឡាករទូកផ្សេងៗមកពីទូទាំងប្រទេស ដោយសារតែកីឡាករទូកព្រះទីនាំងសារាយអណ្តែតចង្ហាន់ហុយនេះមិនពាក់អាវយឺតដូចគេឡើយ។ ពួកគេត្រៀម ពាក់អាវបែបបុរាណសម័យលង្វែកព្រោះទូកនេះមានប្រវត្តិតាំងពីសម័យលង្វែក ក្នុងរជ្ជកាលព្រះបាទចន្ទរាជា (ស.វ.ទី ១៦) ដែលមានចារទុកយ៉ាងច្បាស់ក្នុង ឯកសារមហាបុរសខ្មែរ។ ទន្ទឹមនឹងនេះ កីឡាករស្លៀកខោពណ៌ក្រហម និង ឈ្នូតក្បាលពណ៌ស្បង់ដែលតំណាងព្រះនាមព្រះអង្គ «ចង្ហាន់ហុយ» ដែលជាអតីតព្រះចៅអធិការវត្តនៅខេត្តអម្រិន្ទបូរ (ស្រុកបរិបូណ៌ សព្វថ្ងៃនេះ) ងារ «មង្គលសត្ថា» ដែលបានប្រគល់ទូកឈ្មោះដើមថា «សារាយអណ្តែត» នេះ ថ្វាយព្រះ ចន្ទរាជា ព្រោះវាជាទូកដែលមានល្បឿនលឿនអស្ចារ្យហួសទូកទាំងពួងក្នុងគ្រាសម័យនោះ៕
Article by SRIN SOKMEAN