គម្រោងអាជីវកម្មដើម្បីជំរុញការអភិវឌ្ឍន៍ដោយមានស្ថេរភាព ក្រោមគំនិតដោះស្រាយបញ្ហាបំពុលដោយសំណល់ទឹកកខ្វក់មានឈ្មោះថា SUDrain ទើបតែបានទទួលជ័យលាភីលេខ១ក្នុងការប្រកួត Smart Spark ដែលទទួលបានរង្វាន់ជាសាច់ប្រាក់ ៣០០០ដុល្លារ។ គម្រោង SUDrain ត្រូវបានឲ្យដឹងថា ជាការបង្កើតឧបករណ៍ចម្រោះទឹកកខ្វក់ សម្រាប់ប្រើប្រាស់នៅក្នុងសហគ្រាសធុនតូច និងមធ្យមដែលមានតម្លៃសមរម្យសម្រាប់សហគ្រិនក្នុងស្រុក។
កញ្ញា វន ថារី នាយកប្រតិបត្តិក្រុមហ៊ុន SUDrain និងជាអ្នកស្រាវជ្រាវផលិតឧបករណ៍ចម្រោះនេះបានលើកឡើងថា គម្រោងអាជីវកម្មនេះត្រូវបានលើកឡើងដោយយកចិត្តទុកដាក់បំផុត ក្រោយពីបានអង្កេតឃើញថាមានការកើនឡើងជាបន្តបន្ទាប់នូវការបំពុលដោយទឹកកខ្វក់ និងសារជាតិពុលពីសហគ្រាសធុនតូច និងមធ្យម ក្រុមហ៊ុនសាងសង់ ដូចជាក្រុមហ៊ុនសាងសង់សំណង់បុរីជាដើម ។ មានវ័យ ២៧ឆ្នាំ ស្ថាបនិករូបនេះគឺជាអ្នកស្រាវជ្រាវផ្នែកទឹកកខ្វក់នៅក្នុងអង្គការក្រៅរដ្ឋាភិបាល និងជានិស្សិតទើបបញ្ចប់ការសិក្សាមកពីប្រទេសហូឡង់ផង បានបន្ថែមទៀតថា សហគ្រិនក្នុងស្រុកមានការលំបាកខ្លះៗ ទាក់ទងនឹងការស្វែងរកក្រុមហ៊ុនផ្គត់ផ្គង់គ្រឿងចម្រោះទឹកកខ្វក់ ដោយសារតែភាគច្រើននៃក្រុមហ៊ុនផ្គត់ផ្គង់ សុទ្ធតែជាក្រុមហ៊ុនដែលផ្តល់ការផ្គត់ផ្គង់ទ្រង់ទ្រាយធំ ហួសពីទំហំតម្រូវការនៃសហគ្រាសរបស់ពួកគេ។
កញ្ញា ថារី និយាយថា «មនុស្សយើងរស់នៅម្នាក់ៗតែងតែចង់រស់នៅដោយមានផាសុកភាព ប៉ុន្តែតាមរយៈការបញ្ចេញសំណល់កខ្វក់ដោយមិនបានចម្រោះ វាធ្វើឲ្យប៉ះពាល់យ៉ាងខ្លាំងដល់អ្នករស់នៅតំបន់អាណាធិបតេយ្យ ធ្វើឲ្យពួកគេងាយប្រឈមនឹងជំងឺ អ្នកប្រើប្រាស់ទឹកដើម្បីប្រកបរបររស់នៅជាដើម។»
កញ្ញាបន្តទៀតថា «ខ្ញុំបង្កើតគម្រោងនេះឡើង ដោយសារយល់ឃើញថាការបំពុលទឹកផ្តល់ផលប៉ះពាល់យ៉ាងច្រើននៅទីក្រុង និងជាយក្រុង ពិសេសដល់អ្នករស់នៅតំបន់អាណាធិបតេយ្យ។» គម្រោងនេះវាសមស្របជាមួយនឹងច្បាប់ថ្មីរបស់ក្រសួងបរិស្ថានដែលកំណត់ឲ្យសហគ្រាសធុនតូច និងមធ្យមទាំងអស់មានការទទួលខុសត្រូវលើសំណល់ទឹកកខ្វក់របស់ខ្លួន ហើយអាជីវកម្មដែលមិនអាចគ្រប់គ្រងសំណល់ទឹកកខ្វក់របស់ខ្លួនបាន នឹងប្រឈមនឹងការពិន័យផ្សេងៗ។ ទឹកដែលមានសារជាតិពុលជាច្រើនត្រូវបានបង្ហូរចេញដោយផ្ទាល់ពីសហគ្រាសធុនតូចនិងមធ្យម និងក្រុមហ៊ុនសាងសង់ទាំងនោះទៅកាន់ទន្លេ ស្ទឹង បឹង ដែលជាប្រភពទឹកដ៏ធំ ដោយពុំបានឆ្លងកាត់ការចម្រោះឲ្យបានត្រឹមត្រូវ ឈានទៅដល់ការបំពុលដល់ជីវចម្រុះទាំងឡាយដែលប្រើប្រាស់ប្រភពទឹកទាំងនោះដោយផ្ទាល់។ កង្វះការយល់ដឹងលើវិធីសាស្រ្តចម្រោះទឹក ជាផ្នែកមួយដែលញ៉ាំងឲ្យម្ចាស់សហគ្រិនបន្តការបង្ហូរទឹកកខ្វក់ដោយផ្ទាល់ ដោយគ្មានការប្រុងប្រយ័ត្ន។
បើតាមការពន្យល់របស់ម្ចាស់អាជីវកម្ម ឧបករណ៍នេះនឹងប្រើប្រាស់ស្រកីដូង ដើម្បីជាគ្រឿងចម្រោះដោយធម្មជាតិ ដែលធ្វើឲ្យចំណាយថវិកាតិច។ ស្រកីដូងដែលយកមកច្នៃជាវត្ថុធាតុដើមនៃការច្រោះអាចប្រើបានចាប់ពី ២ទៅ ៥ឆ្នាំ និង ស្រកីដូងនោះក៏អាចប្រើជាជីកំប៉ុសបន្ទាប់ពីអស់អាយុប្រើប្រាស់ ដែលធ្វើឲ្យ «SUDrain ក្លាយជាផ្នែកមួយនៃដំណោះស្រាយដើម្បីការងារសុខភាពមនុស្ស និងបរិស្ថាន។»
ជជីកសួរខ្លះៗពីតម្លៃនៃការតំលើងគ្រឿងចម្រោះ SUDrain កញ្ញា ថារីបានអធិប្បាយថា សម្រាប់សហគ្រាសដែលប្រើប្រាស់ទឹកប្រមាណ ៣ម៉ែត្រគូបក្នុងមួយថ្ងៃ នឹងត្រូវចំណាយប្រមាណ ១០០០ដុល្លារ សម្រាប់ការដំឡើងម៉ាស៊ីនចម្រោះ ដែលតម្លៃនេះបូករួមទាំងនឹងទទួលបានសេវាកម្មជួសជុលថែរក្សា។ បើទោះយ៉ាងនេះក្តី ក្រុមការងារ SUDrain ត្រូវការចុះទៅពិភាក្សា និងធ្វើការប៉ាន់ប្រមាណផ្ទាល់នៅទីតាំងដែលត្រូវដំឡើងគ្រឿងច្រោះ អាស្រ័យទៅតាមទំហំអាជីវកម្ម និងការបញ្ចេញទឹកកខ្វក់ជាក់ស្តែង និងដើម្បីស្វែងយល់បន្ថែមពីប្រភេទសំណល់ទឹកកខ្វក់នៃសហគ្រាសទាំងនោះជាមុន។ គ្រឿងច្រោះដែលធ្វើពីស្រកីដូងនោះ អាចផ្លាស់ប្តូរបានបន្ទាប់ពីអស់អាយុ ដែលម្ចាស់សហគ្រាសត្រូវចំណាយត្រឹមប្រមាណ ២០០ដុល្លារបន្ថែម។
«ពីមុនមកមានសហគ្រាសជាច្រើនចាប់អារម្មណ៍លើគម្រោងម៉ាស៊ីនចម្រោះ ប៉ុន្តែមិនបានដំឡើងប្រព័ន្ធដោយសារមានតម្លៃថ្លៃ ព្រោះម៉ាស៊ីនទាំងនោះត្រូវទាមទារការដំឡើងពីក្រុមហ៊ុនក្រៅស្រុក និងមិនបានដឹងពីកន្លែងដែលអាចស្វែងរកសេវាកម្មនេះបាន។» កញ្ញា ថារីនិយាយថា SUDrain ជាគ្រឿងចម្រោះដែលផលិតដោយក្រុមហ៊ុនក្នុងស្រុក មានតម្លៃទាបសមស្របសម្រាប់អាជីវកម្មខ្នាតតូច និងមធ្យម និងក្រុមហ៊ុនសាងសង់។ តាមរយៈការចំណាយលើការដំឡើងតែម្ដង ម្ចាស់អាជីវកម្មអាចសន្សំសំចៃ និងជាការចូលរួមថែរក្សាបរិស្ថានក្នុងពេលតែមួយ។ «ពេលនេះមានសហគ្រាស២ដែលគ្រោងនឹងទទួលសេវាកម្ម និងមានក្រុមហ៊ុនជាច្រើនទៀតដែលកំពុងចាប់អារម្មណ៍។» កញ្ញាថារីនិយាយ ព្រមទាំងបញ្ជាក់ថាទោះយ៉ាងណាក្តី កញ្ញានឹងព្យាយាមធ្វើការពិសោធន៍លើឧបករណ៍ចម្រោះនេះឲ្យបានល្អិតល្អន់ ដើម្បីជំរុញផែនការអាជីវកម្មនេះឲ្យកាន់តែប្រសើរឡើង៕
Article by VA SONYKA