ចង់ចាប់អាជីពដើរម៉ូដ ពិតជាចាំបាច់ត្រូវឆ្លងកាត់សាលាហ្វឹកហាត់ឬ?
FASHION & BEAUTY 5 years ago មួយរយៈចុងក្រោយនេះ យើងសង្កេតឃើញថាវិស័យដើរម៉ូដនៅកម្ពុជា ហាក់មានសន្ទុះកើនឡើងគួរឲ្យកត់សម្គាល់ ខណៈឧស្សាហកម្មហ្វេហ្សិននៅកម្ពុជាក៏ចាប់ផ្តើមរីកមុខរីកមាត់រហូតមានការទទួលស្គាល់ជាលក្ខណៈជាតិ និងអន្តរជាតិ។ ជាការពិតណាស់ ម៉ូដែលឬអាជីពដើរម៉ូដ គឺជាវិស័យមួយដ៏ស៊ីវិល័យ ដែលស្ថិតនៅក្នុងក្តីប្រាថ្នារបស់យុវវ័យសម័យថ្មីស្ទើរតែគ្រប់រូប ដោយសារតែវិស័យនេះមិនត្រឹមតែផ្តល់ឱកាសដល់យុវជនយុវនារីបានបង្ហាញពីសម្រស់ ក៏ដូចជាទេពកោសល្យរបស់ខ្លួនប៉ុណ្ណោះទេ តែថែមទាំងមានឱកាសបានបោះជំហានទៅកាន់ឆាកអន្តរជាតិ បានស្គាល់មនុស្សជាច្រើននៅក្នុងសង្គម និងអាចរកប្រាក់ចំណូលបានគួរសមផងដែរ។ ខុសពីជំនាន់មុនៗ ម៉ូដែលនាពេលបច្ចុប្បន្នភាគច្រើនសុទ្ធតែត្រូវបានឆ្លងកាត់ការហ្វឹកហាត់ និងចូលសិក្សាជំនាញត្រឹមត្រូវនៅក្នុងសាលារៀន ចុះហេតុអ្វីបានជាម៉ូដែលគ្រប់រូបចាំបាច់ចូលបណ្តុះបណ្តាលជំនាញដើរម៉ូដនៅសាលាបង្រៀនមុនពេលចេញទៅបម្រើលើវិស័យរបស់ខ្លួន? ហើយដើម្បីជោគជ័យលើអាជីពមួយនេះ តើម៉ូដែលគ្រប់រូបគួរត្រៀមខ្លួនដូចម្តេចខ្លះ និងមានចំណុចពិសេសអ្វីខ្លះ?។ ឆ្លើយតបទៅនឹងការលើកឡើងខាងលើ សូវរីន បានអញ្ជើញ កញ្ញា ធឿន វលក្ខណ៍ ដែលជាអ្នកដើរម៉ូដអាជីព និងជាគ្រូបង្រៀនដើរម៉ូដមួយរូបដ៏មានប្រជាប្រិយភាព ចូលខ្លួនមកបកស្រាយលម្អិតក៏ដូចជាចែករំលែកនូវបទពិសោធន៍ដូចខាងក្រោម។
ផ្អែកលើបទពិសោធន៍ប្រលូកក្នុងវិស័យដើរម៉ូដប្រមាណជិត ១០ឆ្នាំ កញ្ញា ធឿន វលក្ខណ៍ បានលើកឡើងថា ចំណង់ចំណូលចិត្ត និងឆន្ទៈ គឺជាចំណុចសំខាន់ចម្បងក្នុងការសម្រេចចិត្តបោះជំហានចូលមកក្នុងវិស័យដើរម៉ូដនេះ ដែលសំខាន់ត្រូវសួរខ្លួនឯងជាមុនថាតើពិតជាស្រឡាញ់ផ្នែកហ្នឹងពិតមែនឬអត់? ឬគ្រាន់តែស្រឡាញ់បែបលេងៗ ឬគ្រាន់តែឃើញគេធ្វើក៏ធ្វើតាមគេ? ជាការពិតអ្វីក៏ដោយប្រសិនបើយើងស្រឡាញ់ហើយ យើងនឹងដាក់ចិត្តធ្វើវាអស់ទាំងកម្លាំងកាយចិត្ត និងខិតខំពុះពាររហូតសម្រេចបាននូវគោលដៅរបស់ខ្លួន ដូចជាអាជីពដើរម៉ូដនេះឯង ថ្វីដ្បិតគ្រាន់តែជាការដើរបង្ហាញរាងនៅលើឆាក ប៉ុន្តែក្នុងនោះទាមទារការពុះពារច្រើនដំណាក់កាលទម្រាំអាចបង្ហាញខ្លួននៅលើឆាកប្រកបដោយភាពជឿជាក់ និងជំនាញច្បាស់លាស់។ យ៉ាងណាមិញ ការចាប់យកជំនាញមួយច្បាស់លាស់រមែងត្រូវមានការហ្វឹកហាត់រៀនសូត្រត្រឹមត្រូវពីគ្រូជំនាញ ជាក់ស្តែង គ្រូបង្វឹកម៉ូដែលដ៏ជំនាញម្នាក់នេះបានរៀបរាប់បន្តថា វាពិតជាចាំបាច់ណាស់ដែលអ្នកចង់ចាប់អាជីពដើរម៉ូដគួរគប្បីចូលសិក្សារៀនសូត្រ និងហ្វឹកហាត់នៅសាលារៀនដើម្បីទទួលបាននូវជំនាញពិតប្រាកដយកទៅបម្រើលើវិស័យរបស់ខ្លួនប្រកបដោយភាពជោគជ័យ។ ការចូលសិក្សាជំនាញនៅសាលាដើរម៉ូដ សិស្សនឹងបានយល់ដឹងអំពីអ្វីទៅជាការដើរបង្ហាញម៉ូដត្រឹមត្រូវតាមក្បួនខ្នាត ការកែដំណើរ ការរៀបចំឥរិយាបថ សុជីវធម៌ការងារ ការទំនាក់ទំនង និងការកែប្រែនូវចំណុចខ្វះខាត រួមទាំងការថែរក្សាសម្រស់ និងសុខភាពផងដែរ ដែលទាំងនេះសុទ្ធសឹងជាគ្រឹះសំខាន់ក្នុងការបោះជំហានចូលប្រឡូកវិស័យនៃពិភពហ្វេហ្សិននេះ។ គ្រូបង្វឹករូបនេះបានបន្តទៀតថា កន្លងមកមានម៉ូដែលដើរម៉ូដមួយចំនួនដែលមិនធ្លាប់ឆ្លងកាត់ការហ្វឹកហាត់ក៏បានចូលប្រឡូកក្នុងវិស័យដើរម៉ូដផងដែរ ទទួលស្គាល់ថាគាត់ពិតជាអាចដើរបាន ក៏ប៉ុន្តែគ្រាន់តែការដើររបស់គាត់គឺមិនត្រឹមត្រូវតាមស្តង់ដារ ពិសេសគាត់មិនដឹងច្បាស់នូវចំណុចខ្វះខាតរបស់ខ្លួន។
ក្រៅពីការចូលហ្វឹកហាត់នៅសាលារៀនជាកត្តាចាំបាច់ ជាងនេះទៀតសោត គ្រូបង្វឹករូបស្រស់ ធឿន វលក្ខណ៍ ក៏បានបង្ហើបអំពីការត្រៀមខ្លួន និងចំណុចសំខាន់ៗនៅពេលចាប់ផ្តើមការងារផងដែរថា ក្នុងនាមជាអ្នកដើរម៉ូដអាជីពម្នាក់ យើងត្រូវមានភាពសកម្មក្នុងការស្វែងរកនូវបទពិសោធន៍ថ្មីៗ គំនិតថ្មីៗ តាមរយៈការមើលរូបភាពហ្វេហ្សិនតាមប្រព័ន្ធអនឡាញ តាមដានវីដេអូការដើរម៉ូដលក្ខណៈជាតិ និងអន្តរជាតិគ្រប់រដូវកាល ស្វែងយល់ពីស្ទីលលេងខ្លួន និងការកាច់ស្ទីល ដែលសុទ្ធតែជាស្នូលដ៏សំខាន់ដើម្បីយកមកអភិវឌ្ឍសមត្ថភាពរបស់ខ្លួនឲ្យកាន់តែប្រសើរឡើង។ លើសពីនេះការថែរក្សាសម្រស់ និងសុខភាពគឺជាផ្នែកមួយសំខាន់ដែលតែងតែដើរទន្ទឹមគ្នាផងដែរ យើងត្រូវថែរក្សាសម្រស់ស្បែក និងក្រឹត្យក្រមរបបអាហារឲ្យបានត្រឹមត្រូវដើម្បីរក្សារាងឲ្យស្លីមថេរ ពិសេសគេងឲ្យបានគ្រប់គ្រាន់យ៉ាងហោចណាស់ ៨ម៉ោងក្នុងមួយថ្ងៃ ផឹកទឹកឲ្យបានច្រើន និងគួរចំណាយពេលធ្វើលំហាត់ប្រាណជាប្រចាំដែលសំខាន់លំហាត់ប្រាណសម្រាប់ស្ត្រីរាងស្អាតគឺយូហ្គា។ កាន់តែខានមិនបានទៀតនោះ ធ្វើជាម៉ូដែលគឺត្រូវបោះបង់ភាពខ្មាសអៀនចោលឲ្យអស់ ដោយប្រមូលមកវិញនូវទំនុកចិត្តលើខ្លួនឯងដើម្បីធ្វើឲ្យការបោះជំហាននៅលើឆាកប្រកបដោយទំនុកចិត្ត និងពោរពេញដោយថាមពល។
ជាចុងក្រោយ តារាបង្ហាញម៉ូដ និងជាគ្រូបង្វឹកដើរម៉ូដ កញ្ញា ធឿន វលក្ខណ៍ បានមានមតិផ្តាំផ្ញើដល់មិត្តៗនារីគ្រប់រូបដែលមានបំណងចង់ក្លាយទៅជាអ្នកដើរម៉ូដអាជីពថា ប្រសិនបើមិត្តៗនារីស្រឡាញ់អាជីពដើរម៉ូដ ត្រូវប្រាកដចិត្តឲ្យច្បាស់ហើយដាក់ចិត្តធ្វើឲ្យអស់ពីសមត្ថភាព ពីព្រោះបើយើងប្រឹងប្រែងកាលណាភាពជោគជ័យនឹងរត់មករកយើងកាលនោះដែរ អ្វីកាន់តែសំខាន់ត្រូវប្រកាន់ខ្ជាប់ការរក្សាសម្រស់ និងសុខភាពរួមទាំងត្រូវមានភាពជឿជាក់លើខ្លួនឯងជាចម្បង។
គួរបញ្ជាក់ផងដែរថា កញ្ញា ធឿន វលក្ខណ៍ គឺជាតារាបង្ហាញម៉ូដដ៏មានប្រជាប្រិយភាព និងជាគ្រូបង្រៀនដើរម៉ូដដ៏ឆ្នើមនៅក្នុងក្រុមហ៊ុន Agency មួយនៅទីក្រុងភ្នំពេញ ដែលបច្ចុប្បន្នកញ្ញាកំពុងមមាញឹកយ៉ាងខ្លាំងនៅក្នុងវិស័យដើរម៉ូដរបស់ខ្លួន ហើយកន្លងមកកញ្ញាក៏ធ្លាប់បានបង្ហាញខ្លួននៅក្នុងកម្មវិធីដើរម៉ូដធំៗទាំងក្នុង និងក្រៅស្រុក និងរមែងលេចមុខមាត់នៅក្នុងការថតស្ពតពាណិជ្ជកម្មផ្សេងៗពិសេសក្នុងវិស័យហ្វេហ្សិនតែម្តង៕
Article by HEM SOKKHIM