ការសម្លឹងមើលឃើញពីទុកលំបាកនិងបញ្ហាដែលតែងតែកើតមានជាយូរណាស់មកហើយ ដែលសិស្សវិទ្យាល័យភាគច្រើនមិនមានលទ្ធភាពបន្តការសិក្សានៅឯថ្នាក់ឧត្តមសិក្សាដោយសារតែភាពក្រីក្រ គឺជាមូលហេតុមួយដែលជម្រុញឲ្យយុវជនមួយក្រុម មានគ្នាបួននាក់អាយុមិនដល់ ម្ភៃឆ្នាំផង មានគំនិតបង្កើតជាគេហទំព័រមួយដើម្បីស្វែងរកសប្បុរសជនជួយដល់សិស្សក្រីក្រអាចបន្តការសិក្សាបាន។ គេហទំព័រ ដែលមានឈ្មោះថា «Donateh» បង្កើតឡើងដោយស្ថាបនិកវ័យក្មេងដែលទើបតែប្រឡងមធ្យមសិក្សាទុតិយភូមិនៅឆ្នាំ ២០១៨ នេះតែប៉ុណ្ណោះ។ ធ្លាប់ជាមិត្តរួមថ្នាក់នៃវិទ្យាល័យស៊ីសុវត្ថិ ពួកគេទាំងបួននាក់ធ្លាប់មានគំនិតចង់បង្កើតជាអាជីវកម្មបង្កើតថ្មីតាំងតែមិនទាន់ប្រឡងបាក់ឌុបមកម្ល៉េះ។ ជីន វីរីយ៉ា អាយុ១៧ ឆ្នាំគឺជាអ្នកផ្តួចផ្តើមគំនិត និងជាអ្នកប្រមូលផ្តុំសមាជិកក្រុមដែលមានជំនាញផ្សេងៗគ្នា បង្កើតគំនិតនេះឡើងរហូតអាចដាក់ពាក្យប្រកួតក្នុងកម្មវិធីគំនិតអាជីវកម្មបង្កើតថ្មីដែលរៀបចំដោយក្រុមហ៊ុនស្មាតទៀតផង។ ថ្វីដ្បិតតែមិនបានជាប់ក្នុងការប្រកួតក៏ប៉ុន្តែក្រុម Donateh នៅតែបន្តបេសកកម្មរបស់ខ្លួនដោយកំពុងតែធ្វើបច្ចុប្បន្នភាពនិងគ្រោងដាក់សម្ពោធជាផ្លូវការនៅឆ្នាំ២០២០ ។ ផាន ភារ៉ាមុនី ទើបតែអាយុ ១៨ឆ្នាំប៉ុណ្ណោះ ក៏ប៉ុន្តែគេគឺជាបុរសអ្នកអភិវឌ្ឍន៍ (Developer) និងជាអ្នកបច្ចេកទេសនៃការរៀបចំទិន្នន័យនៃវេបសាយនេះឲ្យចេញជារូបរាងមកបាន។ មុនី បានទិញសៀវភៅដែលបង្រៀនពីភាសាកូដកុំព្យូទ័រ និងរៀនដោយខ្លួនឯងតាំងពីថ្នាក់ទី១១ មកម៉្លេះ ហើយរហូតមកដល់ពេលនេះគេគឺជានិស្សិតឆ្នាំទី១ នៃវិទ្យាស្ថានបច្ចេកវិទ្យាកម្ពុជាផងដែរ។ សមាជិកម្នាក់ទៀតគឺ លី កញ្ជនា អាយុ ១៨ឆ្នាំ មានចំណងចំណូលចិត្តខាងគំនូរ គឺជាអ្នករចនារូបរាងនៃគេហទំព័រ (UI Designer) នេះឡើង។ ចំណែកឯ មឹង ច័ន្ទសុម៉ានីតា អាយុ ១៦ឆ្នាំ ពូកែខាងទំនាក់ទំនងគឺជាអ្នកទីផ្សារដើម្បីឲ្យ Donateh អាចរកចំណូលបានដើម្បីផ្គត់ផ្គង់។
មឹង ច័ន្ទសុម៉ានីតា
ដោយជំនាញទាំងបួននេះបញ្ចូលគ្នាបង្កើតបានជាគេហទំព័រមួយដែល ជាកន្លែងដែលសិស្សក្រីក្រអាចស្វែងរកជំនួយពីសប្បុរសជននានា ដើម្បីបន្តការសិក្សាររបស់ខ្លួន ឬក៏អាចនិយាយមួយបែបទៀតថាជាកន្លែងដែលអ្នកមានចិត្តចង់ជួយកុមារក្រីក្រដើម្បីបន្តការរៀនសូត្របានដែរ។ Donateh មិនគ្រាន់តែអាចបរិច្ចាគជាថវិកាតែប៉ុណ្ណោះទេ តែលោកអ្នកក៏អាចបរិច្ចាគជាសម្ភារៈសិក្សា ពេលវេលានិងជំនាញផងដែរ។ ឧបមាថាប្រសិនបើអ្នកមានជំនាញអ្វីមួយដែលចង់ចែករំលែកនូវចំណេះដឹងរបស់ខ្លួនទៅកាន់យុវជនជំនាន់ក្រោយ ដូច្នេះក្រុមការងារ Donateh នឹងរៀបចំជូននូវទីកន្លែង សិក្ខាសាលាឬការណាត់ជួបណាមួយសម្រាប់លោកអ្នកទៀតផង។ មិនត្រឹមតែជាគេហទំព័រប៉ុណ្ណោះទេ Donateh ក៏នឹងមានជាស្ថានីយដែលមានទីតាំងនៅតាមសាកលវិទ្យាល័យឬកន្លែងផ្សេងៗដើម្បីងាយស្រួលឲ្យអ្នកបរិច្ចាគ និងអ្នកចង់បានការឧបត្ថម្ភ ក៏ដូចជាអ្នកដែលចង់ស្ម័គ្រចិត្តមួយចំនួនអាចចុះឈ្មោះឬក៏មកទទួលសម្ភារៈផ្សេងៗទៀតបានផងដែរ៕
Article by KEO SONG