Sovrin
Sovrin
ផាសិនត្រូវបានគេនិយមយកមកច្នៃជាភេសជ្ជៈច្រើនមុខយ៉ាងសម្បូរបែបមិនថាជាប្រភេទទឹក បែបក្រឡុក ឬលាយជាមួយស្រាក្រឡុកឡើយ ដោយហេតុវាមានរសជាតិជូរអែមផ្អែមជាប់មាត់ និងក្លិនឈ្ងុយដែលបង្កើនឲ្យភេសជ្ជៈកាន់តែមានឱជារសឆ្ងាញ់ពិសា។ ជាទូទៅផ្លែផាសិនយើងអាចពិសាបានទាំងសាច់ និងគ្រាប់ ប៉ុន្តែអ្នកពិសាមួយចំនួនមិនសូវចំណូលពិសាទាំងគ្រាប់ប៉ុន្មាននោះទេក៏ព្រោះតែវាគ្មានរសជាតិ និងរំខានដល់ការបឺតទទួលទាន។ យ៉ាងណាមិញ គ្រាប់ទំពារក្រុបៗនេះហើយជាស្នូលដ៏សំខាន់ដែលនឹងផ្តល់អត្ថប្រយោជន៍ច្រើនចំពោះសុខភាព បន្ទាប់ពីសាច់ផាសិនដែលមានអត្ថប្រយោជន៍ជួយបង្កើនថាមពល ជួយដល់សុខភាពបេះដូង ការពារជំងឺទឹកនោមផ្អែម និងបង្កើនសម្រស់ស្បែកក្មេងជាងវ័យជាដើម។ ខាងក្រោមនេះគឺជាអាថ៌កំបាំងចំពោះសុខភាពនៃគ្រាប់ផាសិនដែលគ្រប់គ្នាមិនធ្លាប់ដឹងពីមុន។
1.ឱសថការពារជំងឺរុំារ៉ៃ និងសម្រស់ ៖ គ្រាប់ផាសិនផ្ទុកនូវសារធាតុ Piceatannol និង Scirpusin ដែលមានសារធាតុប្រឆាំងអុកស៊ីតកម្មខ្លាំងបំផុត។ សារធាតុប្រឆាំអុកស៊ីតកម្មនេះហើយដែលជួយការពាររាងកាយពីរ៉ាឌីកាល់សេរី និងការមានប្រតិកម្មម៉ូលេគុលខ្ពស់ដែលអាចបំផ្លាញឌីអិនអេនៅក្នុងកោសិកា។ ករណីបំផ្លាញដោយរ៉ាឌីកាល់សេរីអាចធ្វើឲ្យប្រឈមភាពអន់ថយ និងជំងឺរុំារ៉ៃមួយចំនួនដូចជា ជំងឺត្បៀតសរសៃឈាម ជំងឺវង្វេងវង្វាន់ បញ្ហាប្រព័ន្ធការពារ ជំងឺបេះដូង ជំងឺសន្លាក់ឆ្អឹង បញ្ហាផ្លូវចិត្ត និងជំងឺទឹកនោមផ្អែម។ គ្រាប់ផាសិនក៏ផ្តល់អត្ថប្រយោជន៍ចំពោះសម្រស់ស្បែកដោយជួយការពារភាពជ្រីវជ្រួញដែលបង្កមកពីកាំរស្មីយូវី ព្រមទាំងបង្កើតអង់ស៊ីមម្យ៉ាងហៅថា metalloproteinase ដែលជួយជួសជុលខូលេជិនដែលបំផ្លាញដោយពន្លឺព្រះអាទិត្យ។
2.បីក្នុងសារធាតុមួយអត្ថប្រយោជន៍ទ្វេ ៖ គេបានរកឃើញថាសារធាតុប៉ូលីហ្វីណូល (Polyphenol)នៅក្នុងគ្រាប់ផាសិនបានផ្ទុកនូវសារធាតុសំខាន់ៗចំនួនបីដែលមានគុណប្រយោជន៍ច្រើនចំពោះសុខភាព។ ក្នុងនោះ សារធាតុហ្លាវ៉ូណយជួយកាត់បន្ថយគ្រោះថ្នាក់ពីឈាមខាប់ និងគ្រោះថ្នាក់ពីកូឡេស្តេរ៉ូល ការពារជំងឺរលាកអញ្ចាញធ្មេញ ជំងឺឆ្លងតាមប្រព័ន្ធផ្លូវនោម។ ចំណែកសារធាតុ អាស៊ីដហ្វីណូលជួយការពារកោសិកាមហារីក ការពារជំងឺផ្លូវនោម ជួយទប់ទល់នឹងវីរុស និងបាក់តេរីដែលជាមូលហេតុនៃជំងឺរលាកតម្រង់នោម និងការហើមរលាក ព្រមទាំងបញ្ហាស្បែកដែលបណ្តាលមកពីកាំរស្មីយូវី។ រីឯសារធាតុ ហ្វីតូអេសស្ត្រូចេនជួយកាត់បន្ថយបញ្ហានៅក្នុងមជ្ឈិមវ័យរបស់ស្ត្រីដូចជាការពារពីជំងឺមហារីកសុដន់ មហារីកភ្នាសស្បូន និងមហារីកក្រពេញប្រូស្តាត ជួយកាត់បន្ថយបរិមាណជាតិខ្លាញ់ក្នុងឈាម និងសម្ពាធឈាមខ្ពស់។
3.ជាតិម៉ាញ៉េស្យូមខ្ពស់ ៖ គ្រាប់ផាសិនផ្ទុកនូវម៉ាញ៉េស្យូមខ្ពស់ដែលជាជាតិខនិជយ៉ាងសំខាន់មានតួនាទីជួយឲ្យឆ្អឹងរឹងមាំ ពង្រឹងប្រព័ន្ធរំលាយអាហារ ធ្វើឲ្យចង្វាក់បេះដូងដើរស្រួល និងប្រព័ន្ធសរសៃប្រសាទល្អប្រសើរផងដែរ។ ការទទួលទានគ្រាប់ផាសិនជាប្រចាំនឹងអាចបំពេញគ្រប់គ្រាន់នូវជាតិម៉ាញ៉េស្យូមដែលរាងកាយត្រូវការ ដោយឡែកកត្តាហានិភ័យដែលបង្កើនឱកាសនៃការកង្វះម៉ាញ៉េស្យូមរួមមានភាពតានតឹង ការប្រើថ្នាំបញ្ចុះទឹកនោមរយៈពេលយូរ កើតជំងឺក្រពះពោះវៀន និងផឹកសុរាច្រើនជាដើម។
4.ជួយសុខភាពពោះវៀន ៖ អ្នកជំនាញបានស្រាវជ្រាវឃើញថានៅក្នុងគ្រាប់ផាសិន១០០ក្រាមមានផ្ទុកហ្វៃប័រដល់ទៅ ៦៤,១ក្រាម។ ជាតិសរសៃហ្វៃប័រមិនរលាយនេះហើយមានមុខងារជួយដល់ការរំលាយអាហារដែលជួយជំរុញបាក់តេរីមិនល្អចេញពីរាងកាយ ជំរុញចលនាពោះវៀនធំ ជំរុញជាតិពុលចេញពីរាងកាយតាមរយៈការបន្ទោបង់ និងការពារជំងឺទល់លាមកក៏ដូចជាជំងឺឫសដូងបាត៕
Article by HEM SOKKHIM
