បវរកញ្ញាភពផែនដីកម្ពុជា រីចំណាន កល្យាន ប្រាប់ពីគោលជំហរយ៉ាងរឹងមាំមុនពេលឡើងប្រកួតឆាប់ៗនេះ
NEWS 5 years agoនៅសល់តែប៉ុន្មានថ្ងៃទៀតប៉ុណ្ណោះ កម្មវិធីប្រកួតបវរកញ្ញា Miss Planet International នឹងឈានចូលមកដល់ ពោលគឺនឹងប្រព្រឹត្តិឡើងនៅថ្ងៃទី ២១ ខែកុម្ភៈរហូតដល់វគ្គផ្តាច់ព្រ័ត្រថ្ងៃទី០២ខែមីនាឆ្នំា២០១៩នេះ។ កម្មវិធីនេះដែរមានការចូលរួមប្រកួតពីបវរកញ្ញាមកពី៦០ប្រទេសដែលកម្ពុជាគឺជាម្ចាស់ផ្ទះនៃការរៀបចំកម្មវិធីប្រកួតលក្ខណៈអន្តរជាតិលើកដំបូងនេះតែម្តង។ យ៉ាងណាមិញ ថ្មីៗនេះប្រិយមិត្តប្រាកដជាបានជ្រាបរួចមកហើយថាបវរកញ្ញាដែលតំណាងឲ្យកម្ពុជានោះគឺកញ្ញា រីចំណាន កល្យាន ដែលនាងគឺជាបេក្ខនារីមកពីរាជធានីភ្នំពេញ មានកម្ពស់ខ្ពស់រូបសម្រស់ស្រស់ស្អាតព្រមទំាងពោរពេញទៅដោយចំណេះដឹង និងសមត្ថភាពមិនធម្មតាឡើយ។ ខណៈកម្មវិធីកាន់តែកៀកជិតចូលមកដល់ តើកញ្ញាបានត្រៀមខ្លួនយ៉ាងដូចម្តេចខ្លះ? ហើយតើកញ្ញាមានប្រវត្តិដូចម្តេចខ្លះមុនពេលបោះជំហានរហូតក្លាយជាបេក្ខភាពតំណាងឲ្យកម្ពុជា?
ស្ថិតនៅក្នុងគ្រួសារជីវភាពមធ្យមដែលមានឪពុកប្រកបរបរជាអ្នកលក់ទោចក្រយានយន្ត និងម្តាយជាស្ត្រីមេផ្ទះ រីចំណាន កល្យាន មានបងប្អូនប្រុសស្រីចំនួនពីរនាក់ (កល្យានជាកូនទី២)។ និស្ស័យចូលចិត្តសិល្បៈបានបណ្តុះទឹកចិត្ត កល្យាន ឲ្យស្រឡាញ់អាជីពដើរម៉ូតតាំងតែពីកុមារភាពមកម្ល៉េះ ដែលនេះជាហេតុផលចម្បងដែលកល្យាន រមែងចិញ្ចឹមចិត្តរំពឹងថាថ្ងៃណាមួយនឹងបានបោះជំហានលើថ្នាលសិល្បៈនឹងគេ។ ឈានដល់វ័យ ១៩ឆ្នាំ ក្រោយពេលប្រលងជាប់មធ្យមសិក្សាទុតិយភូមិ កញ្ញាត្រូវបានឪពុកម្តាយទំនុកបម្រុងផ្តួចផ្តើមបើកអាជីវកម្មហាងកាហ្វេផ្ទាល់ខ្លួន និងលក់គ្រឿងរក្សាសម្រស់នៅលើបណ្តាញសង្គម ហើយជាមួយគ្នានេះដែរវាគឺជាពេលដែល កល្យាន ចាប់ផ្តើមដាក់ពាក្យចូលប្រកួតក្នុងកម្មវិធី Miss Planet Cambodia ដើម្បីសម្រេចក្តីស្រមៃដែលខ្លួនមានតាំងពីតូច។ «ខ្ញុំស្រឡាញ់សិល្បៈតាំងពីតូច ជាពិសេសចូលចិត្តការដើរម៉ូតខ្លាំងណាស់ ម្យ៉ាងដោយមានការជំរុញទឹកចិត្តពីមនុស្សជុំវិញខ្លួនផង និងឪពុកម្តាយផងទើបខ្ញុំសម្រេចចិត្តចូលប្រកួត និងខិតខំប្រឹងប្រែងរហូតមានថ្ងៃនេះ»។ ជាលទ្ធផលតាមរយៈការខិតខំប្រឹងប្រែងរួមជាមួយទេពកោសល្យ និងរូបសម្រស់អំណោយផលពីធម្មជាតិ រីចំណាន កល្យាន បានជាប់ចំណាត់ថ្នាក់លេខ ១នៃកម្មវិធី Miss Planet Cambodia ដែលតំណាងឲ្យកម្ពុជាដើម្បីទៅប្រកួតដណ្តើមម្កុដក្នុងកម្មវិធីលក្ខណៈអន្តរជាតិ Miss Planet International 2019។
ជាការពិតណាស់ ខណៈកម្មវិធីប្រកួតលក្ខណៈអន្តរជាតិរំកិលជិតចូលមកដល់ បវរកញ្ញាភពផែនដីកម្ពុជាវ័យក្មេងកម្ពស់ ១,៧០ ម៉ែត្រ ទម្ងន់ ៥១គីឡូក្រាមរូបនេះ ក៏បានបង្ហើបអំពីគោលជំហរក្នុងការចូលរួមប្រកួតដែរថា «ខ្ញុំមានសង្ឃឹមយ៉ាងមុតមាំចំពោះការប្រកួតនេះ ខ្ញុំបានត្រៀមអ្វីៗគ្រប់យ៉ាងរួចជាស្រេចមិនថាការហាត់ដើរ ការឆ្លើយសំណួរ និងចំណេះដឹងផ្សេងៗដើម្បីបង្ហាញថាបវរកញ្ញាកម្ពុជាមានទាំងរូបសម្រស់ស្រស់ស្អាត ភាពស្រស់ស្អាតពីខាងក្នុង មានភាពវ័យឆ្លាត មានសមត្ថភាព អ្វីដែលសំខាន់ជាងនេះខ្ញុំនឹងពាំនាំយកសិល្បៈវប្បធម៌ និងអរិយធម៌ខ្មែររួមទាំងតំបន់ទេសចរណ៍នានាដែលជាបេះដូងនៃប្រទេសកម្ពុជាទៅបង្ហាញពិភពលោកឲ្យបានស្គាល់កាន់តែច្បាស់នៅលើឆាកអន្តរជាតិ»។
តួយ៉ាង បវរកញ្ញាភពផែនដីកម្ពុជាយើងនឹងគ្រងឈុត «ទេពធីតា មហាសង្ក្រាន្ត» ដែលតំណាងឲ្យបុត្រីកបិលមហាព្រហ្មនៃពិធីបុណ្យចូលឆ្នាំប្រពៃណីខ្មែរ។ ទាក់ទិននឹងឈុតតំណាងជាតិនេះដែរ កញ្ញារំដួលលិចទឹកដែលជាអ្នកចាត់ចែងកម្មវិធីផ្ទាល់បានឲ្យដឹងដែរថា ឈុតតំណាងជាតិ គឺត្រូវបានសម្រិតសម្រាំងយ៉ាងល្អិតល្អន់បំផុតដោយរួមសហការអ្នករចនាចំនួនបីនាក់ គឺលោក គួន មាឃ ជាអ្នកគូររូប ចំណែកកញ្ញារំដួលលេចទឹក និងលោក អ៊ី សុខជា ជាអ្នកច្នៃឈុតរួមគ្នា។ ក្បាច់នៃឈុតនេះត្រូវបានច្នៃលាយគ្រឿងធម្មជាតិខ្លះៗដូចជា ក្រូចឆ្មារ ប្រេងអូលីវ និងម្សៅអង្ករដំណើបជាដើម។ មកទល់ពេលនេះឈុតតំណាងជាតិច្នៃសម្រេចបាន ៨០ភាគរយហើយ។ ដោយសារកម្មវិធី Miss Planet International ផ្តោតសំខាន់ទៅលើ សិល្បៈ បរិស្ថាន និងការងារសង្គម កញ្ញារំដួលលិចទឹកបានលើកឡើងថា ការចូលរួមប្រកួតកម្មវិធីលក្ខណៈអន្តរជាតិនេះគឺយើងមិនសំខាន់ថាដាច់ខាតត្រូវតែដណ្តើមម្កុដឲ្យទាល់តែបាននោះទេ អ្វីដែលយើងរំពឹងទុកគឺបវរកញ្ញាកម្ពុជានឹងបង្ហាញពីសមត្ថភាព រូបសម្រស់ និងអ្វីដែលជាសិល្បៈវប្បធម៌ និងអរិយធម៌ខ្មែរឲ្យមហាជនបរទេសបានស្គាល់។ ដូចនេះ កញ្ញាក៏សំណូមពរឲ្យប្រជាជនខ្មែរយើងទាំងអស់ចូលរួមលើកទឹកចិត្តគាំទ្របវរកញ្ញាភពផែនដីកម្ពុជាឲ្យបានច្រើនដើម្បីឲ្យបវរកញ្ញាយើង ក៏ដូចជាក្រុមការងារមានកម្លាំងចិត្តតស៊ូយកជ័យជម្នះនៅក្នុងកម្មវិធីនេះ៕
Article by Hem Sokkhim