នៅក្នុងអំឡុងពេលដែលអាកាសធាតុក្ដៅខ្លាំងរាងកាយរបស់អ្នកងាយនឹងបាត់បង់ជាតិទឹក ដែលនេះនឹងអាចធ្វើឲ្យអារម្មណ៏អ្នកប្រែប្រួល សុខភាពចុះខ្សោយខុសពីធម្មតា និងមានបញ្ហាជាច្រើនទៀតដែលអ្នកមិនគួរមើលរំលង។ រោគសញ្ញានៃការហត់នឿយពីកម្តៅរួមមាន ការឈឺក្បាល វិលមុខ ក្អួតចង្អោរ ឈឺសាច់ដុំឬរមួលក្រពើ ស្បែកឡើងស្លេក អស់កម្លាំងល្ហិតល្ហៃខ្លាំង បើធ្ងន់ធ្ងរខ្លាំងអាចឈានទៅដល់ការដាច់សរសៃឈាមខួរក្បាល ប្រកាច់ ការបាត់បង់ស្មារតី ដែលចេញជាមុខសញ្ញាដូចជា ស្រេកទឹកខ្លាំង ងងុយគេង រលាកស្បែក (ក្រហមនិងស្ងួត) វង្វេងស្មារតីជាដើម។ តាមធម្មតាសីតុណ្ហភាពរាងកាយរបស់មនុស្សស្ថិតក្នុងចន្លោះ 36.1 - 37.8 អង្សាសេ។ ប្រសិនបើសីតុណ្ហភាពរាងកាយកើនឡើងលើសពីនេះ នោះមានន័យថារាងកាយរបស់អ្នកកំពុងតែមានបញ្ហាហើយ។ នៅពេលដែលអាកាសធាតុក្តៅខ្លាំងរាងកាយនឹងផលិតញើសច្រើនដើម្បីរក្សាសីតុណ្ហភាពក្នុងខ្លួនឲ្យត្រជាក់។ ដើម្បីថែរក្សាសុខភាពឲ្យបានល្អប្រសើរនោះអ្នកគប្បី៖
1. ទម្លាប់ទទួលទានទឹកឲ្យបានច្រើន
ក្នុងកំឡុងរដូវក្តៅបែបនេះ កម្តៅអាចធ្វើឲ្យរាងកាយរបស់អ្នកខ្សោះជាតិទឹក។ ការខ្វះជាតិទឹកក្នុងរាងកាយគឺអាចបណ្តាលឲ្យមានគ្រោះថ្នាក់ដល់រាងកាយដែលអ្នកនឹកស្មានមិនដល់ ដោយធ្វើឲ្យរាងកាយរបស់អ្នកស្រេកឃ្លានអាហារខុសពីធម្មតា។ វាពិតជាមានសារៈសំខាន់ណាស់ក្នុងការរក្សាតុល្យភាពទឹកក្នុងខ្លួនអ្នកយ៉ាងតិច 8 ទៅ 9 កែវក្នុងមួយថ្ងៃ។ អ្នកអាចទទួលទានទឹកដូង ទឹកផ្លែឈើដែលមានកាឡូរីទាប ឬតែបៃតងជាដើម។ ការទទួលទានទឹកបានគ្រប់គ្រាន់នឹងជួយបង្ការរាងកាយពីជំងឺផ្សេងៗបានជាច្រើន រក្សាឆ្អឹងនិងសាច់ដុំរបស់អ្នកឲ្យមានសុខភាពល្អ ជួយរក្សាទម្ងន់របស់អ្នកឲ្យថេរនិងធ្វើឲ្យមុខងារខួរក្បាលមានភាពប្រសើរឡើងថែមទៀតផង។
2. បរិភោគអាហារដែលថ្មីនិងស្រស់
រដូវក្តៅជារដូវដែលសំបូរទៅដោយផលិតផលស្រស់ៗ អ្នកគួរជ្រើសរើសអាហារដែលចម្អិនថ្មី និងភ្លាមៗ ព្រោះថាការបរិភោគអាហារដែលមានគុណភាពអាចជួយការពារការកើតជំងឺប្រព័ន្ធរំលាយអាហារនិងជួយប្រព័ន្ធរាងកាយបានមួយកម្រិត។ ចូរទទួលទានផ្លែឈើនិងបន្លែឲ្យបានច្រើន នោះអ្នកនឹងទទួលបានគុណប្រយោជន៍ហួសពីការស្មាន។ ឪឡឹក ត្រសក់ស្រូវ មង្ឃុត ម្នាស់ និងដូងនឹងជួយកម្ចាត់ភាពក្ដៅពីក្នុងរាងកាយ រីឯបន្លែពណ៌បៃតងវិញនិងជួយកម្ចាត់កម្តៅក្នុងរាងកាយ និងផ្ដល់មកវិញនូវសារធាតុចិញ្ចឹម។
3. ជៀសវាងការប៉ះពាល់ផ្ទាល់ជាមួយនឹងកម្តៅព្រះអាទិត្យ
ជាការពិតណាស់ដែលរាងកាយមនុស្សត្រូវការពន្លឺព្រះអាទិត្យ តែសូមព្យាយាមកំណត់ពេលវេលារបស់អ្នកដែលស្ថិតក្រោមពន្លឺព្រះអាទិត្យ។ចន្លេះម៉ោង 10 ព្រឹកទៅម៉ោង 4 រសៀលជាពេលដែលមានកាំរស្មី UV ខ្លាំងបំផុត។ ប្រសិនបើអ្នកកំពុងនៅខាងក្រៅត្រូវប្រាកដថាបានប្រើឡេការពារកម្តៅព្រះអាទិត្យយ៉ាងតិចឲ្យបាន 30 នាទីមុនពេលដែលចេញទៅត្រូវពន្លឺព្រះអាទិត្យ។ វាក៏ជាគំនិតល្អមួយផងដែរក្នុងការពាក់មួកនិងវ៉ែនតាខ្មៅការពារនៅពេលដែលថ្ងៃក្តៅខ្លាំងតាមដែលអាចធ្វើទៅបានដើម្បីការពារការរលាកស្បែកឬធ្វើឲ្យស្បែកឡើងក្រហម។
4. គេងឲ្យបានគ្រប់គ្រាន់
ការទទួលដំណេកបានគ្រប់គ្រាន់គឺពិតជាផ្តល់នូវអត្ថប្រយោជន៍សំខាន់ជាច្រើនចំពោះសុខភាពផ្លូវកាយនិងចិត្ត។វាអាចផ្ដល់កម្លាំងសម្រាប់ប្រព័ន្ធរាងកាយរបស់អ្នកដោយមិនអាចខ្វះបាន វាប្រៀបដូចជាអាហារ និងទឹកដែរ ដែលអ្នកមិនអាចខ្វះវាបាននោះឡើយ ហើយក៏មិនអាចសងជំនួសវិញនៅថ្ងៃបន្ទាប់ទៀតបានដែរ។ រាងកាយនិងខួរក្បាលរបស់អ្នកទាមទារការគេងបានគ្រប់គ្រាន់ជារៀងរាល់ថ្ងៃដើម្បីឲ្យប្រព័ន្ធការពាររាងកាយដំណើរការបានល្អ បើអ្នកគេងបានគ្រប់គ្រាន់នោះ អ្នកនឹងទទួលបានរាងកាយមួយដែលពោលពេញទៅដោយថាមពល។
5. ស្ថិតក្នុងកន្លែងត្រជាក់
ត្រូវចងចាំថានៅពេលដែលអាកាសធាតុក្តៅខ្លាំង អ្នកត្រូវតែស្វែងរកកន្លែងសំរាប់ជ្រកជៀសវាង រាងកាយរបស់អ្នកទទួលផលប៉ះពាល់ខ្លាំងពីកម្តៅនោះ។គួរកាត់បន្ថយសកម្មភាពក្រៅផ្ទះទាំងឡាយដោយមកស្វែងរកលំហាត់ប្រាណឬសកម្មភាពណាដែលមិនបាច់ទៅប៉ះផ្ទាល់នឹងកម្តៅព្រះអាទិត្យដែលកំពុងក្តៅខ្លាំង។ ការហាត់ប្រាណជាទំលាប់ល្អមួយដែលជួយរាងកាយឲ្យរឹងមាំដើម្បីទប់ទល់និងជំងឺផ្សេងៗ។
Article by TAING KIMLY