Sovrin
Sovrin
ម៉ានិត បង្ហាញស្នាដៃប្រលោមលោកខ្នាតខ្លីថ្មីមួយទៀត «The Mini series ផ្ទះកណ្តាលបឹង២០១០»
NEWS 5 years ago
«សេរីភាពគ្មានសម្រាប់មនុស្សកុហកឡើយ...»
«ប្រលោមលោកខ្នាតខ្លី The Mini series ផ្ទះកណ្តាលបឹង២០១០ មានលក់នៅ ហាង ស្រលាញ់សៀវភៅនៅថ្ងៃនេះហើយ» នេះគឺជាការលើកឡើងរបស់ម៉ានិត។ សៀវភៅទី៦ដែល ផ្សាយចេញពីគ្រឹះស្ថានបោះពុម្ពស្រលាញ់សៀវភៅនាគ្រានេះ គឺជាប្រភេទប្រលោមលោកខ្លី។ ព្រោះអ្វី?
ក្នុងពិធីសម្ពោធសៀវភៅនេះកាលពីថ្ងៃទី២៧ មីនា ២០១៩ ម៉ានិត ដែលជាទូតសុឆន្ទៈ នៃពិព័រណ៍សៀវភៅកម្ពុជាផងនោះ បានប្រាប់ថា «ដោយសារឆ្នាំនេះ ហាងស្រលាញ់ សៀវភៅមានអាយុកាល១ឆ្នាំហើយ។ ខ្ញុំក៏គិតថា គួរផលិតកាដូពិសេសណាមួយដល់អ្នកអាន។ ដូច្នេះប្រលោមលោកខ្នាតខ្លី ផ្ទះកណ្តាលបឹង ២០១០ ក៏ត្រូវបានសម្រិតសម្រាំងយ៉ាង យកចិត្តទុកដាក់បំផុត ទាំងដំណើរឿង ទាំងរូបគំនូរ។ ខ្ញុំចង់ឲ្យអ្នកអានបានជួបជាមួយនឹង តួអង្គសំណព្វចិត្តរបស់ពួកគេម្តងទៀត។ អូ៎! មួយទៀត ខ្ញុំក៏ចង់ឲ្យវាខ្លីជាងប្រលោមលោករាល់ដងដែរ។ អ៊ីចឹងហើយ បានជាខ្ញុំគិតថា វាមិនគួរមានរូបរាងដូចជាសៀវភៅមុនៗឡើយ ត្រឹមធំ ជាង Note Book តូចៗ បន្តិចទៅ គឺបានហើយ។»
ស្របតាមការលើកឡើងរបស់ ម៉ានិត ខាងលើ ឃើញថា សូម្បីតែប្រភេទសៀវភៅ Limited Edition ក៏ម៉ានិតបានរចនារូបរាងថ្មីដែរ ដែលប្ដូរពីក្របក្រមា ទៅជាកាបូបដាក់សៀវភៅ។ ក្រៅពីហេតុផលរូបិយ ក្នុងនោះហេតុផលអរូបិយក៏ត្រូវបានមើលឃើញដែរ។ ម៉ានិត ចង់បង្កើតបទពិសោធន៍អារម្មណ៍នៃអំណានប្រលោមលោកអមដោយរូបភាពខ្លះៗ ដែលកើតពីការស្រមើលស្រមៃរបស់ជាងគំនូររបស់គាត់ នៅក្នុងទ្រង់ទ្រាយរបស់កូនសៀវភៅដ៏តូចច្រឡឹងមួយនេះ ដល់អ្នកអានដែលធ្លាប់បានអានប្រលោមលោករបស់ស្រលាញ់សៀវភៅពីមុនមក។
ផ្ទះកណ្តាលបឹង២០១០ និយាយពីរឿងរ៉ាវកើតឡើងនៅក្នុងផ្ទះកណ្តាលបឹងក្នុងរយៈពេលមួយដែលអ្នកមិនបានដឹង នាកំឡុងឆ្នាំ២០១០។ តើអ្នកអាននៅចាំតួអង្គនិងព្រឹត្តិការណ៍ណាខ្លះក្នុងប្រលោមលោក ផ្ទះកណ្តាលបឹង ២០១៧?
ចុះ តើចង់ដឹងអីទៀតពី ផ្ទះកណ្តាលបឹង២០១០?
ទៅរកនៅហាងស្រលាញ់សៀវភៅ ផ្លូវលេខ៤៣០ នឹងបានឃើញហើយ!
គួរដឹងថា ផ្ទះកណ្តាលបឹង២០១០ គឺជាចំណងជើងសៀវភៅទី៦ដែលចេញផ្សាយដោយ គ្រឹះស្ថានបោះពុម្ពផ្សាយស្រលាញ់សៀវភៅ និងនិពន្ធដោយលោក ម៉ានិត។ ឆាប់ៗខាងមុខ នេះ ភាពយន្តរឿង ស្នេហាក្មេងៗ ដែលជាស្នាដៃនិពន្ធរបស់ ម៉ានិត ដែរនោះ ក៏នឹងបង្ហាញខ្លួន លើផ្ទាំងសំពត់សទូទាំងប្រទេសផងដែរ។ លើសពីនោះទៀត ប្រលោមលោកបែប រ៉ូមែនទិក ក៏ស្ថិតក្នុងគម្រោងថ្មី ផ្តល់ជូនដល់អ្នកស្រលាញ់សៀវភៅប្រលោមលោករបស់ ម៉ានិត ដែរ។
Article by SVAY LEEMENG
