កញ្ញាឯកចក្រវាឡកម្ពុជា២០១៩៖ ស្រ្តីកម្ពុជាគួរតែហ៊ានបញ្ចេញសមត្ថភាពនៅលើឆាកអន្តរជាតិ
NEWS 5 years agoការបង្ហាញវត្តមានដំបូងរបស់កញ្ញាឯកចក្រវាឡឆ្នាំ ២០១៩ ប្រាំរូបក្រោមទស្សនកិច្ចមកកាន់ការិយាល័យនៃទស្សនាវដ្ដី សូវរីន ហើយក៏បានផ្ញើជាសារមួយដ៏មានសារសំខាន់ជូនដល់ស្រ្តីកម្ពុជាមួយចំនួនតូចដែលមានការខ្នាស់អៀនមិនហ៊ានបញ្ចេញសម្ថភាពនៅលើវេទិកា។ កញ្ញាឯកចក្រវាឡទាំងប្រាំរូបរួមមាន៖ «សំណាង អេលីណា» អាយុ ១៨ឆ្នាំជាអ្នកក្រុងភ្នំពេញ «បុណ្យ កញ្ចនធីតា» ២៤ ឆ្នាំ ជាអ្នកក្រុងភ្នំពេញ «ថោង ម៉ាឡា» ១៩ឆ្នាំ មកពីខេត្តកណ្តាល «ចន សុទីម៉ា» អាយុ ២០ឆ្នាំ មកពីខេត្តត្បូងឃ្មុំ «ប៉ូ គឹមថេងសុតធីតា» អាយុ ២២ឆ្នាំ ជាអ្នកក្រុងភ្នំពេញ។ ឆ្លៀតក្នុងឱកាសដ៏ពិសេសនេះ កញ្ញាឯកចក្រវាឡកម្ពុជាឆ្នាំ ២០១៩ បវរកញ្ញា សំណាង អេលីណា បានផ្តល់ជាសារដើម្បីកុំឲ្យស្ត្រីកម្ពុជាមានភាពភ័យខ្លាចក្នុងការសម្រេចក្តីស្រលាញ់របស់ខ្លួនឯង។ សំណាង អេលីណា បានបន្ថែមថា «ការពិតទៅអ្វីក៏ដោយក៏មានផលលំបាកនិងទុកលំបាករបស់វាដែរ តែខ្ញុំគិតថាប្រសិនបើយើងចង់ជោគជ័យ យើងត្រូវតែតស៊ូនិងហ៊ានជម្នះវាឲ្យបាន»។ កញ្ញាឯក ប៉ូ គឹមថេងសុតធីតា ដែលជាកញ្ញាឯកលំដាប់ទីបី ក៏បានបន្ថែម «ស្រ្តីជនជាតិខ្មែរយើងមានការអៀនខ្មាស់ច្រើនមិនថាលើឆាកអន្តរជាតិនិងថ្នាក់ជាតិ។ បើតាមគំនិតខ្ញុំ ទីមួយត្រូវតែបំបាត់ភាពអៀនខ្មាស់ និងភាពភ័យខ្លាចជាមុនសិន ប្រសិបើអាចជម្នះរឿងទាំងពីរយ៉ាងនេះបាន ដូច្នេះរឿងផ្សេងនឹងអាចរលូនទៅមុខតាមគោលដៅក្នុងជីវិត និងសម្រេចតាមក្តីស្រលាញ់ហើយភាពជោគជ័យក៏រត់មកតាមនោះដែរ។»
ឆ្លងកាត់ឧបសគ្គជាច្រើនទម្រាំតែបានជាប់ជាកញ្ញាឯកឆ្នាំ២០១៩នេះ ក៏ប៉ុន្តែកញ្ញាឯកទាំងប្រាំរូបនៅតែមានភាពក្លាហាននិងរឹងមាំជានិច្ច។ ដើម្បីក្លាយជាបវរកញ្ញាបាន កញ្ញាឯក ថោង ម៉ាឡា បានថែរក្សាសុខភាពយ៉ាងខ្លាំងជាពិសេសគឺ អាហារប្រចាំថ្ងៃត្រូវតែមានរបបត្រឹមត្រូវ ដើម្បីត្រៀមខ្លួនក្នុងការប្រកួតនិងប្រយ័ត្នប្រយែងខ្លាំងក្នុងការដើរម៉ូដ ហើយនេះគឺជាឧបសគ្គធំបំផុតដែលបវរកញ្ញាគ្រប់រូបត្រូវតែឆ្លងឲ្យផុត។ ការពង្រឹងសមត្ថភាពនិងការរៀនសូត្របន្ថែមអំពីចំណេះដឹងទូទៅ ក៏ជាផលលំបាកនិងជាអ្វីដែលត្រូវមានក្នុងនាមជាកញ្ញាឯកដ៏ល្អមួយរូបផងដែរ។ ដូចនេះស្រ្តីកម្ពុជាគ្រប់រូបគួរតែហ៊ាននិងជំនះឧបសគ្គទាំងឡាយដើម្បីក្លាយសុបិនរបស់ខ្លួនជាការពិតនិងគួរតែហ៊ានបញ្ចេញសមត្ថភាពឲ្យអន្តរជាតិបានដឹងផងដែរ៕
Article by KEO SONG