ញុំាម្ហូបបែបជនបទជាមួយនឹងបរិយាកាសដ៏មនោរម្យមាននៅAngkor Borei Homestay
TRAVEL & LIVING 5 years agoបើនិយាយពីអង្គរបុរី ប្រិយមិត្តប្រហែលជានឹកភ្នកដល់រមណីយដ្ឋានប្រវត្តិសាស្រ្តមួយកន្លែងដែលមានប្រាសាទភ្នំដាររចនាបថប្រាសាទដំបូងគេបំផុតរបស់ខ្មែរក៏ប៉ុន្តែ ហួសភ្នំដារប្រមាណជា៥គីឡូម៉ែត្រតាមផ្លូវដីក្រហម រហូតដល់ភ្នំមួយ គេនឹងប្រទះឃើញកន្លែងសម្រាកកាយថ្មីមួយកន្លែងរៀបចំជាលក្ខណៈធម្មជាតិ រំលេចទៅដោយបុប្ផាចម្រុះពណ៌ដុះតាមជើងភ្នំ «បុរី» ក្រោមនោះគឺ «Angkor Borei Homestay»។ ក្យុសសម្រាប់ស្រស់ស្រូបអាហារប្រមាណជាងដប់ត្រូវបានម្ចាស់កន្លែងសាងសង់ឡើងអាចអនុញ្ញាតឲ្យភ្ញៀវបានទស្សនានូវទិដ្ឋភាពដ៏ស្រស់បំព្រងនៃវាលស្រែខៀវខ្ចីនៅរដូវភ្ជួររាស់ និង ទិដ្ឋភាពស្រូវទុំ គួរឲ្យចាប់អារម្មណ៍បំផុតទាំងនៅលើភ្នំនិងខាងក្រោម។
គំនិតនៃការបង្កើតកន្លែងសម្រាកលម្ហែកាយនៅលើដីផ្ទាល់ខ្លួននេះជាការផ្តួចផ្តើមរបស់លោក វុធ បូរិន និងមានការជួយជ្រោមជ្រែងពីសំណាក់អ្នកម្តាយ ញ៉ែម គឹមលី ដែលជាអ្នករៀបចំម្ហូបអាហារសម្រាប់ភ្ញៀវ។ ធ្លាប់ចំណាកស្រុកដើម្បីទៅស្វែងរកការងារធ្វើនៅឯប្រទេសថៃនិងកូរ៉េ លោក វុធ បូរិន បានប្រាប់ សូវរីន ថា៖ «ខ្ញុំឃើញនៅស្រុកគេ គេចេះកែច្នៃកន្លែងដីទំនេរក្លាយជារមណីយដ្ឋានធម្មជាតិទាក់ទាញភ្ញៀវទេសចរជាច្រើន ដូច្នេះខ្ញុំក៏ចាប់ផ្តើមគិតនិងយកគម្រូពីប្រទេសថៃខ្លះនិងកូរ៉េ ដើម្បីបង្កើតជាកន្លែងខ្លួនឯងមួយនៅឯស្រុកកំណើតនេះ»។ បង្កើតឡើងនៅពាក់កណ្តាលឆ្នាំ២០១៨ ក៏ប៉ុន្តែកន្លែងលម្ហែកាយនេះមានការចាប់អារម្មណ៍យ៉ាងខ្លាំងពីសំណាក់ភ្ញៀវជាតិនិងអន្តរជាតិច្រើនគួរសម។
មិនត្រឹមតែមានទិដ្ឋភាពល្អប៉ុណ្ណោះទេ សូម្បីតែម្ហួបអាហារសម្លដែលបម្រើជាលក្ខណៈម្ហូបប្រពៃណីខ្មែរក៏មានឱជារសឆ្ងាញ់ពិសាជាមួយនឹងការរៀបចំដែលប្រកបដោយភាពច្នៃប្រតិដ្ឋតាមបែបស្រុកស្រែ រីឯតម្លៃក៏សមរម្យផងដែរ។ លើសពីការដែលគ្រាន់តែមកទទួលទានបាយធម្មតា Angkor Borei Homestay ក៏មានការរៀបចំដើម្បីឲ្យភ្ញៀវស្នាក់នៅនាពេលរាត្រីនៅក្យុសលើភ្នំដោយមានការផ្តល់ជូននូវមុងសម្រាប់ការពារសត្វល្អិតដោយឥតគិតថ្លៃផងដែរ។ ព្រឹកព្រលឹម ភ្ញៀវក៏អាចទទួលទានអាហារតាមបែបអ្នកស្រុកស្រែ ជាមួយនឹងបបរសរត្រីងៀតថែមទៀតផង។
អ្នកស្រី ញ៉ែម គឹមលីបានបន្តឱ្យដឹងទៀតថា៖ «កន្លងមកធ្លាប់មានក្រុមនិស្សិតខ្លះដែលគាត់ចង់រកទីកន្លែងបែបធម្មជាតិ ស្ងប់ស្ងាត់និងមានទេសភាពល្អក៏បានមកសម្រាកទីនេះមួយយប់ ពីរយប់ផងដែរ។ ហើយ ក៏មានបរទេសខ្លះគាត់ខំជិះកង់មកដើម្បីសម្រាកលម្ហែនៅទីនេះក៏មានដែរ។» ការសម្រាកនៅទីនេះ អ្នកស្រី ញ៉ែមគឹមលី បានបន្ថែមថា អ្នកស្រីមិនគិតថ្លៃស្នាក់នៅនោះទេ អ្នកស្រីគិតតែថ្លៃមុខម្ហួបដែលភ្ញៀវកុម្ម៉ង់តែប៉ុណ្ណោះ ចំណែកឯការថតរូបជាមួយទិដ្ឋភាពសួនផ្កាចម្រុះពណ៌នេះ អ្នកស្រីយកថ្លៃក្នុងម្នាក់ចំនួនមួយដុល្លារ។
អ្នកស្រី ញ៉ែម គឹមលី និងកូនប្រុសក៏បានបង្ហើបប្រាប់ពីគម្រោងពង្រីកទីសម្រាកលម្ហែកាយនេះនៅថ្ងៃអនាគតផងដែរ។ ដោយការសម្លឹងឃើញភាពទាក់ទាញនៃផ្កា និងបរិយាកាសនៅជុំវិញនោះ អ្នកស្រី ចង់ដាំបន្ថែមនូវផ្កាជាច្រើនទៀតរៀបជារូបផ្សេងៗនិងក្យុសមួយចំនួនទៀតផងដែរ៕
Article by KEO SONG