បើនិយាយពីផ្លែល្វា នរណាៗក៏ធ្លាប់បានឮនិងបានស្គាល់ដែរ ក៏ប៉ុន្តែបើនិយាយពីផ្លែឧទុម្ពរ ពលរដ្ឋខ្មែរមួយភាគធំប្រហែលជាមិនដែលឮឡើយជាពិសេសគឺអ្នកក្រុងភ្នំពេញ។ វចនានុក្រមសម្តេចជួនណាតបានពន្យល់ថាឧទុម្ពរគឺជាពួកវនស្បតិព្រឹក្ស (ផ្លែឈើដែលចេញផ្ការូបរាងជាផ្លែ), គេតែងយកឈើឧទុម្ពរមកធ្វើជារាជាសនៈក្នុងព្រះរាជពិធីរាជាភិសេកតាមរជ្ជប្បវេណីយូរអង្វែងមកហើយ... ។ ផ្លែល្វាឬផ្លែឧទុម្ពរ មានរាងស្រដៀងនឹងផ្លែបំពេញរាជ្យ ខ្ចីមានពណ៌ខៀវ ទុំប្រែពណ៌ជាក្រហម ខ្លះខ្មៅ សាច់ក្នុងមានពណ៌ក្រហម។ ល្វា គេមិនសូវយកទៅបរិភោគឡើយ ព្រោះល្វាខ្លះរលួយក្នុងនិងសម្បូរទៅដោយសត្វមមង់ត្បិតរូបរាងខាងក្រៅស្អាតយ៉ាងណាក៏ដោយ។ ដោយសារតែបែបនេះហើយទើបខ្មែរនិយមយកផ្លែល្វាមកប្រៀបធៀបជាមួយនឹងចិត្តមនុស្ស «ចិត្តដូចផ្លែល្វា» ដែលមានន័យថាមនុស្សដែលស្អាតតែសម្បកក្រៅ ប៉ុន្តែចិត្តខាងក្នុងបែរជាមិនសូវល្អមានបំណងអាក្រក់ឬរលួយក្នុងជាដើម រហូតដល់មានការតែងជាកំណាព្យកាព្យជួនក្នុងន័យបន្ទោសបង្អាប់លើប្រភេទមនុស្សអាក្រក់ទៀតផង។ ក៏ប៉ុន្តែផ្លែល្វាដែលល្អ ខ្លះក៏ត្រូវបានគេយកទៅច្នៃធ្វើជាជ្រក់និងបរិភោគស្រស់បានផងដែរ។ ល្វាមិនសូវបានគេយកទៅប្រើប្រាស់ច្រើននោះឡើយ ក្រៅពីការយកទៅធ្វើជាឱសថសម្រាប់ព្យាបាលជំងឺផ្សេងៗ។
ផ្លែល្វាឬឧទុម្ពរ គឺជាភក្សាហាររបស់ព្រះនាងទុង្សាទេវី ដែលជាទេវតាបន្តវេននៅឆ្នាំ២០១៩ នេះ។ ល្វាអាចរកទិញបាននៅតាមហាងលក់ឱសថបុរាណមួយភាគតូចតែប៉ុណ្ណោះ ខណៈដែលនៅតាមផ្សារយើងពិតជាពិបាកក្នុងការស្វែងរកទិញណាស់ដែរ ក៏ព្រោះតែតម្រូវការមានចំនួនតិច៕
By KEO SONG