គំនូរដែលបង្កប់សារដ៏គួរឲ្យទាក់ទាញបានផ្លាស់ប្តូរឥរិយាបថមិនសមគួររបស់ប្រជាជន
NEWS 5 years ago បម្រាមជាច្រើនដូចជា «ហាមចាក់សំរាម» «បន្ថយល្បឿន» ត្រូវបានគេប្រទះឃើញសឹងតែនៅគ្រប់ប្លុក នៃក្រុងភ្នំពេញ ក៏ប៉ុន្តែបើទោះបីមានបម្រាមបែបនេះក្តីក៏នៅមានប្រជាជនកម្ពុជាមួយចំនួននៅតែមិនចាប់អារម្មណ៍ និងនៅបន្តសកម្មភាពរបស់ពួកគេជាទំលាប់។ ខុសប្លែកពីកន្លែងផ្សេងៗបម្រាម «ហាមចាក់សំរាម» និង «បន្ថយលឿន» មានន័យថា «បន្ថយល្បឿន» នៅក្នុងប្លុកមួយតាមបណ្តោយមហាវិថីព្រះនរោត្តម ត្រូវបានគូរចេញជាផ្ទាំងគំនូរដ៏គួរឲ្យទាក់ទាញនិងពោរពេញទៅដោយសិល្បៈនិយមជាទីបំផុត។ ផ្ទាំងគំនូរដែលមានសារ «បន្ថយលឿន» ត្រូវបានគូរនៅលើរបងនៃវិចិត្រសាល N O W H E R E Art Studio ដែលស្ថិតនៅចំកន្លែងដែលមានផ្លូវតូចពីរកាត់គ្នា និងសារគំនូរ «ហាមចាក់សំរាម» នៅលើរបងដីឡូត៍មួយនៅក្បែរនោះដែលត្រូវបានម្ចាស់ទុកចោល និងធ្លាប់តែជាទីចោលសម្រាមរបស់អ្នកភូមិ។ គំនូរទាំងនោះជាការគូររួមសហការគ្នារវាងសិល្បៈករជនជាតិ ម៉ាឡេស៊ី «Mulo» និងសិល្បៈករវ័យក្មេងកម្ពុជា «កេត មុនីរ័ក្ស»។
នេះពិតជាគំនិតច្នៃប្រឌិតដ៏ល្អមួយដែលបានផ្លាស់ប្តូរឥរិយាបថរបស់អ្នកភូមិដែលនៅក្បែរនោះពីសកម្មភាពមិនសមគួរប្រចាំថ្ងៃឲ្យក្លាយជាអ្នកស្រលាញ់សិល្បៈគំនូរនៅលើជញ្ជាំងវិញ។ មុនីរ័ក្ស បានប្រាប់សូវរីនថា បន្ទាប់ពីបានបញ្ចប់ការគូរគំនូរទាំងនោះរួចមក គេឃើញមានប្រជាជននៅទីនោះ ពិតជាបានបន្ថយល្បឿន នៅត្រង់កន្លែងផ្លូវកាត់ និងឈប់ចោលសម្រាមដូចរាល់ដងពិតមែន។ «នៅពេលគេធ្វើដំណើរមកដល់កន្លែងផ្លូវកែង គេក៏បន្ថយល្បឿនដើម្បីឆ្លៀតមើលគំនូរ ហើយត្រង់កន្លែងដែលធ្លាប់មានសម្រាមក៏លែងមានព្រោះគេឃើញគំនូរស្អាត ហើយនេះជាផលមួយដែលបានមកពីការងារយើងដែរ។» មុនពេលដែលបានលទ្ធផលវិជ្ជមានបែបនេះ មុនីរ័ក្ស និង Mulo ក៏ជួបនូវឧបសគ្គមួយចំនួនដែលត្រូវប្រឈមនឹងការលុបគំនូរនោះចោលផងពីសំណាក់ម្ចាស់កន្លែង ឬអាជ្ញាធរដែលមានសមត្ថកិច្ច តែជាភ័ព្ទសំណាងក្រោយពីបានបង្ហាញពីបង្ហាញគម្រូដែលពូកគេបានគូរព្រាងទុកក្នុង ឧបករណ៍ iPad រួចមក មុនីរ័ក្ស និង Mulo ក៏ទទួលបានការអនុញ្ញាតិឲ្យមានការគូរគំនូរពូកគេទាំងមានទំនុកចិត្តជាទីបំផុត។ ជាមួយគ្នានេះដែលមុនីរ័ក្សក៏គ្រោងនឹងគូរច្នៃគំនូរជាមួយនឹងសារជាច្រើនទៀតនៅក្បែរនោះ ដើម្បីដាស់តឿនប្រជាជននិងអ្នកដំណើរ តាមរយៈគំនូរលើជញ្ជាំងដែលពោរពេញទៅដោយពណ៌ចម្រុះ និងស្រស់ស្អាតជាច្រើនផងដែរ។
កេត មុនីរ័ក្ស គឺជាសិល្បៈករគំនូរមួយរូបដែលពោរពេញទៅដោយសមត្ថភាព ទាំងគំនូរដៃនិងគំនូរឌីជីថល។ មានឧបនិស្ស័យ និងដុងក្នុងការគូររូបតាំងពីកុមារភាព កេតមុនីរ័ក្ស សម្រេចចិត្តជ្រើសរើសជំនាញរចនាក្រាហ្វិក (Graphic Design) ដើម្បីពង្រឹងសមត្ថភាពខ្លួននៅវិទ្យាស្ថានសិល្បៈភ្នំពេញអន្តរជាតិ (PPIIA)។ ឆ្លងកាត់ការសិក្សា និងភាពប៉ិនប្រសប់បែបនេះ បានធ្វើឲ្យ មុនីរ័ក្ស ទទួលបានគម្រោងក្នុងការគូរគំនូរជាច្រើនរួមមានទាំងហាងកាហ្វេប្រោន និងក្លាយជាអ្នករចនាក្រាហ្វិកប្រចាំក្រុមហ៊ុនការិយាល័យរួមដែលមានឈ្មោះថា «សហការ» ថែមទៀតផង។ លើសពីនេះទៅទៀតនោះ មុនីរ័ក្ស ក៏ធ្លាប់ឈ្នះការប្រកួតរចនាចំនួនបីដងរបស់ Adobe ក្រោមប្រធានបទដូចជា៖ Hand lettering, Graphic Design, illustration ថែមទៀតផង។
កេត មុនីរ័ក្ស (Image courtesy by Kun Sunrethy)
មុនីរ័ក្ស៖ «មិនថាគំនូរលើជញ្ជាំង ឬមួយក៏បង្ហោះនៅក្នុងហ្វេសប៊ុក ប្រសិនបើគំនូរនោះមានគោលបំណងមួយដែលច្បាស់លាស់ និងមិនប៉ះពាល់ដល់គេ នោះគេនឹងគាំទ្រ តែបើទោះបីជាគេមិនគាំទ្រក៏មិនទើសវាដែរ។ ខ្ញុំគិតថា ការឌីហ្សាញគឺជាការដោះស្រាយបញ្ហា។ ដូច្នេះមុននឹងយើងគូរឬឌីហ្សាញយើងគួរសិក្សាមើលសិនថាវាប៉ះពាល់អ្វីខ្លះនិងអាចដោះស្រាយអ្វីខ្លះ៕»
Article by KEO SONG