ជាទូទៅ ការពាក់ស្បែកជើងកែងគឺជាទម្លាប់របស់មិត្តៗនារីៗគ្រប់រូបទៅហើយ ជាពិសេស នៅពេលដែលពួកគេ ចូលរួមក្នុងកម្មវិធីរៀបអាពាហ៍ពិពាហ៍ ពិធីជប់លៀង ឬកម្មវិធីផ្សេងៗទៀត។ ថ្វីដ្បិតតែការស្បែកជើងកែងផ្តល់ភាពស្រស់ស្អាតសម្រាប់មិត្តៗនារីក៏ពិតមែន ប៉ុន្តែនៅពេលដែលពាក់ស្បែកជើងកែងរយៈពេលយូរពេកនោះ វានឹងបង្កជាផលប៉ះពាល់ដល់ផ្នែកឆ្អឹងនៃសរីរាង្គផងដែរ។
១. ធ្វើឲ្យខ្នងជើងឈឺចុកចាប់
ដូចដែរបានជម្រាបពីខាងលើដូច្នេះដែរ ស្បែកជើងកែងវាបានផ្តល់នូវភាពស្រស់ស្អាត និងទាក់ទាញគ្រប់កាលៈទេសៈ ប៉ុន្តែវាពុំបានផ្តល់នូវការទ្រទ្រង់ទម្ងន់របស់អ្នកបានទាំងស្រុងនោះទេ។ ជាក់ស្តែង នៅពេលដែលអ្នកកំពុងពាក់ស្បែកជើងកែងនោះ សរសៃឈាមដែលមានការពាក់ព័ន្ធជាមួយនឹងប្រអប់ជើង ឬឆ្អឹងខ្នងជើងអ្នកនឹងបញ្ចេញថាមពល ដើម្បីបត់បែនទៅតាមប្រភេទស្បែកជើងកែងរបស់អ្នក។ ដូច្នេះហើយទើបការពាក់ស្បែកជើងកែងយូរនឹងធ្វើឲ្យឆ្អឹងកម្លាំងស្រុតចុះដែលជាហេតុធ្វើឲ្យឆ្អឹងងាយនឹងរលាក និងឈឺចុកចាប់។
២. ឈឺប្រអប់ជើង
ផ្អែកតាមបទពិសោធន៍របស់ប្រិយមិត្តជាច្រើនតែងមានចម្ងល់ថា ហេតុអ្វីបានពាក់ស្បែកជើងកែងកម្ពស់ធម្មតាសោះ ហេតុអ្វីបានជាប្រអប់ជើងឈឺខ្លាំង? យ៉ាងណាមិញ ប្រសិនបើតាមការស្រាវជ្រាវផ្លូវការបានឲ្យដឹងថា បើទោះបីអ្នកពាក់ស្បែកជើងកែងកម្ពស់ណាក៏ដោយ វានៅតែធ្វើឲ្យប្រអប់ជើងមានបញ្ហាដដែល ដោយសារតែអ្នកទម្លាប់ពាក់
ស្បែកជើងកែងយូរពេកវាបានធ្វើឲ្យសរសៃពាក់ព័ន្ធទាំងអស់ចុះខ្សោយក្នុងការទ្រទ្រង់ទម្ងន់អ្នក។ យល់ល្អអ្នកគគួរតែព្យាយាមប្រើប្រាស់ស្បែកជើងរាប និងពិគ្រោះគ្រូពេទ្យជំនាញទើបប្រសើរ។
៣. គ្រិចកជើង
ការគ្រិចកជើងនេះតែងកើតឡើងចំពោះមនុស្សទូទៅនៅពេលដែលមានការធ្វេសប្រហែសអំឡុងពេលធ្វើដំណើរប្រញាប់ប្រញាល់ តួយ៉ាង នៅក្នុងន័យនេះការគ្រិចកជើងកាន់តែងាយស្រួលកើតឡើងចំពោះអ្នកពាក់ស្បែកជើងកែងផងដែរ។ ជាមួយគ្នានេះ ការគ្រិចកជើងនឹងធ្វើឲ្យកជើងអ្នកហើម ឈឺចុកចាប់ជាខ្លាំង ជួនកាលវាក៏អាចធ្វើឲ្យកជើងអ្នកបាក់ឆ្អឹងខាងក្នុងថែមទៀត។
៤. រលាកជង្គង់
ជង្គង់ជាផ្នែកមួយដ៏សំខាន់សម្រាប់ទ្រទម្ងន់ និងសម្រួលដល់ការដើរ។ យ៉ាងណាមិញ ជង្គង់ក៏ងាយស្រួលនឹងមានការរលាកផងដែរ តួយ៉ាង ប្រសិនបើអ្នកធ្វើការរត់ច្រើន ការពាក់ស្បែកជើងកែងខ្ពស់ហួសកំណត់ ឬកក៏ការឈរយៈពេលយូរ។ ហេតុនេះ បើអ្នកកំពុងប្រព្រឹត្តសកម្មភាពដែលមានផលប៉ះពាល់ដល់ជង្គង់អ្នកគួរតែព្យាយាមកាត់បន្ថយតាមដែលអាចធ្វើទៅបាន៕
Article by PAN SIVLY