×

ម្ចាស់​ហាង​នំ​ប៉័​ង​ខ្មែរ​មួយ​រូប​បាន​បង្កើត​នំ​ប៉័​ង​ច្នៃ​ពី​ត្នោត​ដំបូង​គេ​នៅ​កម្ពុជា​

NEWS 3 years ago
 
 

           កូនខ្មែរ​ទោះបីជា​រស់នៅ​ក្តីណា​ ​ក៏​រមែង​ស្គាល់​នំ​អាកោត្នោត​ដែល​ជា​ប្រភេទ​នំនែក​ចំណី​ខ្មែរ​តាំង​ពីបរមបុរាណ​តរៀងមក​។​ ​គេ​និយម​ទទួលទាន​នំ​នេះ​នៅ​តាម​ជនបទ​ស្រុកស្រែ​ ​ឬ​ ​មាន​អ្នកធ្វើ​ទូល​យកមក​លក់​នៅ​តាម​ទី​ផ្សារ​ ​ឬ​ ​តាម​ដង​ផ្លូវ​នានា​ក្នុង​ក្រុងភ្នំពេញ​យូរៗម្តង​។​ ​ដោយឡែក​ ​អ្វី​ដែល​គួរឲ្យ​ភ្ញាក់ផ្អើល​និង​គួរឲ្យ​មាន​មោទកភាព​នោះ​ ​កាលពី​ពេលថ្មីៗនេះ​ ​លោក​ ​ប៊ុន​ វុ​ធ​ឌី​កា​ ​ហៅ​ C​h​r​i​z​t​ ​Ben​ ​វ័យ​៤​០​ឆ្នាំ​ ​ម្ចាស់​ហាង​នំ​ប៉័​ង​ C​h​r​i​z​t​ ​Ben​ ​ដែល​ជា​ហាង​នំ​ប៉័​ង​ថ្មីសន្លាង​មួយ​កន្លែងនៅ​ក្នុង​រាជធានី​ភ្នំពេញ​យើង​ ​បាន​ព្យាយាម​ប្រើប្រាស់​នូវ​គំនិត​ច្នៃ​ប្រតិដ្ឋ​របស់​ខ្លួន​ ​គួបផ្សំ​នឹង​ធនធាន​វត្ថុធាតុដើម​ដែល​មាននៅ​ក្នុងស្រុក​ ​ច្នៃ​បង្កើត​ចេញ​ជា​នំ​ប៉័​ង​ត្នោត​មួយ​ប្រភេទ​អាច​ច្រៀក​ជា​ចំណិត​បរិភោគ​ដូច​នំ​ប៉័​ង​សាន់​វិច​ដែល​មិនធ្លាប់​មាន​ពីមុន​សោះ​នៅ​ស្រុកខ្មែរ​យើង​។​

           ​ឆ្លងកាត់​សម្ភាសន៍​តាម​ទូរសព្ទ​ ​ស្ថាបនិក​ហាង​នំ​ប៉័​ង​រូប​នេះ​បាន​ប្រាប់​សូវ​រី​ន​ថា​ ​មូលហេតុ​ដែល​ជំរុញចិត្ត​លោក​ឲ្យ​បើក​ជា​ហាង​នំ​ប៉័​ង​ ​និង​ ​នឹកឃើញ​ផលិត​នំ​ប៉័​ង​ត្នោត​បែប​នេះ​ឡើង​ ​គឺ​ដោយសារតែ​លោក​​​មាន​ប្រវត្តិ​ពិត​ចូលចិត្ត​ញ៉ាំ​នំ​ប៉័​ង​កាលពី​នៅ​តូច​ ​ហើយ​ម្តាយ​របស់​លោក​តែងតែ​ទិញ​នំ​ប៉័​ង​លួង​ចិត្ត​លោក​ឲ្យទៅ​រៀន​ ​កាលសម័យ​ទសវត្សរ៍​ឆ្នាំ​១​៩​៨​០​ ​ដែល​នំ​ប៉័​ង​មាន​លក់​តែ​នៅ​តាម​ផ្ទះ​ប្រជាពលរដ្ឋ​ ​មិនមែន​ជា​ហាង​ធំដុំ​ដូច​ពេល​បច្ចុប្បន្ន​។​ ​កាលនោះ​ ​លោក​រស់នៅ​ខណ្ឌ​ដង្កោ​ ​ខេត្ត​កណ្តាល​ (​បច្ចុប្បន្ន​ ​រាជធានី​ភ្នំពេញ​) ​ហើយ​ក្រោយមក​ទៀត​ ​លោក​បាន​ផ្លាស់​ទៅ​រស់នៅ​ខេត្ត​កំពង់ស្ពឺ​ជាមួយ​ម្តាយ​អស់​រយៈពេល​៦​ឆ្នាំ​។​ ​ទីនោះ​ហើយដែល​លោក​បានឃើញ​ថា​សម្បូរ​ដើមត្នោត​ ​ព្រមទាំង​ចូលចិត្ត​ញ៉ាំ​និង​ស្រង់​ក្លិន​នំត្នោត​ថ្មីៗ​ឈ្ងុយ​ៗ​តាម​បែប​ជនបទ​ស្រុកស្រែ​។​ ​អនុ​ស្សា​វ​រី​យ៍​ទាំងនេះ​ហើយដែល​នៅតែ​ដក់ជាប់​ក្នុង​អារម្មណ៍​រហូតដល់​ពេល​លោក​ចម្រើន​វ័យ​ធំឡើង​។​ ​បន្ទាប់មក​ទៀត​ ​លោក​បាន​ចេញទៅ​សិក្សា​នៅ​បរទេស​ ​ហើយក៏​បាន​ពាំ​នាំ​បច្ចេកទេស​ធ្វើ​នំ​ប៉័​ង​បែប​ទំនើប​ដែល​លោក​បានឃើញ​បាន​ចេះ​ពី​បងប្អូន​មក​អនុវត្ត​សាកល្បង​នៅ​ក្នុង​ប្រទេស​កម្ពុជា​ ​ស្រប​ពេល​ដែល​កម្ពុជា​កំពុង​ជួប​វិបត្តិ​កូ​វី​ដ​១​៩​ ​ដែល​លោក​យល់ថា​ជា​ឱកាស​ដ៏​ល្អ​ដែល​ប្រជាជន​កម្ពុជា​កំពុង​ត្រូវការ​ផលិតផល​នំ​ប៉័​ង​ទុក​ទទួលទាន​នៅផ្ទះ​រៀងៗខ្លួន​ដើម្បី​កាត់បន្ថយ​ការ​ចេញទៅ​ទទួលទាន​អាហារ​ដូចជា​ ​គុយទាវ​ ​ឬ​ ​ស៊ុប​ ​ជាដើម​ ​នៅ​តាម​ភោជនីយដ្ឋាន​។​

           ដើម្បី​ផលិត​ជា​នំ​ប៉័​ង​ត្នោត​នេះ​បាន​ ​លោក​ត្រូវ​ស្វែងរក​ផ្លែត្នោត​ដែល​ជា​គ្រឿងផ្សំ​សំខាន់​ជាមុន​សិន​។​ ​លោក​បាន​បញ្ជាក់​ថា​ ​ដំបូង​ ​នៅ​ពេល​នឹកឃើញ​ចង់​ធ្វើ​វា​ ​លោក​ក៏បាន​ទាក់ទង​ទៅ​ម្តាយ​ដែល​នៅ​ខេត្ត​ឲ្យ​ជួយ​រក​ផ្លែត្នោត​មក​ធ្វើ​នំ​ ​ប៉ុន្តែ​ម្តាយ​លោក​បាន​ប្រកែក​ថា​ ​ផ្លែត្នោត​ពិបាក​រក​ ​ព្រោះ​សព្វថ្ងៃ​ដើមត្នោត​ត្រូវ​បាន​គេ​កាប់​មិន​សម្បូរ​ដូច​ពីសម័យ​មុន​នោះ​ទេ​។​ ​ឮ​ដូច្នោះ​ ​លោក​ក៏បាន​ពឹងពាក់​មិត្តភក្តិ​ម្នាក់ទៀត​ឲ្យ​ជួយ​រក​ផ្លែត្នោត​ឲ្យ​ចំនួន​២​០​ផ្លែ​យកមក​សាក​ធ្វើ​។​ ​លោក​ព្យាយាម​សាកល្បង​កែច្នៃ​រសជាតិ​ម្តង​ហើយ​ម្តងទៀត​ ​តាំងពី​រសជាតិ​ដំបូង​រាង​ហាង​ ​បន្ទាប់មក​ ​រាង​ផ្អែម​ពេក​ ​រហូត​សម្រេច​បាន​នូវ​រសជាតិ​នំ​ដ៏​ឆ្ងាញ់​ដែល​លោក​និង​ក្រុម​ការងារ​ទទួលយក​បាន​។​ ​គន្លឹះ​សំខាន់​ដែល​លោក​បាន​បង្ហើប​ប្រាប់​នោះ​គឺ​ ​ផ្លែត្នោត​ដែល​យកមក​ធ្វើជា​វត្ថុធាតុដើម​ត្រូវតែ​ជា​ត្នោត​ទុំ​ដើម​ថ្មីៗ​មិន​យកមក​ស្តុក​ទុក​យូរ​ដែល​ធ្វើឲ្យ​នំ​មិន​ឆ្ងាញ់​និង​ប៉ះពាល់​ដល់​គុណភាព​របស់​វា​។​

           ​អ្វី​ទៅជា​លក្ខណៈ​ពិសេស​របស់​នំ​ប៉័​ង​ត្នោត​យីហោ​ C​h​r​i​z​t​ ​Ben​? ​ឆ្លើយតបនឹង​សំនួរ​នេះ​ ​លោក​បាន​អះអាង​ថា​ ​នំ​ប៉័​ង​ត្នោត​រូបមន្ត​បង្កើត​ថ្មី​នេះ​មានសាច់​ទន់​ដូចជា​នំ​ប៉័​ង​សាន់​វិច​ ​ពោល​គឺ​ទន់​ល្មើយ​ជាង​សាច់​នំ​អាកោត្នោត​បែប​បុរាណ​ ​ព្រោះ​វា​ត្រូវ​បាន​ផលិត​ជា​បន្សំ​រវាង​សាច់​ត្នោត​ខ្មែរ​និង​សាច់​នំ​ប៉័​ង​រូបមន្ត​បរទេស​ ​ខុស​ពី​នំត្នោត​ខ្មែរ​ដែល​ប្រែ​សាច់​ទៅជា​រឹង​បាន​យើង​ទុក​វា​ចោល​យូរ​ដល់​ល្ងាច​។​ ​ផ្ទុយទៅវិញ​ ​នំ​ប៉័​ង​ត្នោត​ច្នៃ​ថ្មី​អាច​​​រក្សាទុក​ទទួល​បាន​បាន​រហូតដល់​២​-​៣​ថ្ងៃ​។​ ​នៅ​ពេល​យក​វា​ក្លា​ស្សេ​ក្នុង​ទូរ​ទឹកកក​ ​អតិថិជន​អាច​​​យកចេញ​មក​ក​ម្តៅ​លើ​ផ្សែង​ឆ្នាំងបាយ​បន្តិច​ ​នោះ​នឹងបាន​សាច់​ទន់​ល្មើយ​ឆ្ងាញ់​ដូចដើម​។​

           ក្រោយ​ពី​ព្យ​យាម​សាកល្បង​ធ្វើ​អស់​រយៈពេល​មួយ​ស​ប្តាហ៍​ពេញ​ ​ហើយ​ចាប់ផ្តើម​ដាក់​លក់​ក្នុង​អំឡុង​ខែ​ឧសភា​មក​ ​ឃើញ​ថា​ការ​គាំទ្រ​ទិញ​ពី​អតិថិជន​ដែល​និយម​ចូលចិត្ត​នំត្នោត​មាន​កំណើន​ប្រហែល​ ​១​៥​-​២​០​% ​ហើយ​តម្រូវ​ការ​វត្ថុធាតុដើម​ក៏​កើន​ពី​២​០​ផ្លែ​ ​ក្នុងរយៈពេល​២​-​៣​ថ្ងៃ​ ​រហូតដល់​ ​៦​០​ផ្លែ​ក្នុងមួយថ្ងៃ​។​ ​លោក​យល់ថា​ ​ការ​គាំទ្រ​ផលិតផល​ធ្វើ​ពី​ត្នោត​បែប​នេះ​មាន​អត្ថប្រយោជន៍​ច្រើន​ចំពោះ​សង្គមជាតិ​យើង​ ​ព្រោះ​ក្នុង​សម័យ​បច្ចុប្បន្ននេះ​ ​ផ្លែត្នោត​មិនសូវ​មាន​អ្នកទិញ​ដូច​ពីមុន​នោះ​ទេ​។​ ​ប្រជាពលរដ្ឋ​ខ្មែរ​ដែល​ជា​ប្រកបរបរ​ធ្វើ​នំ​ ​និង​ ​អ្នក​លក់​ផ្លែត្នោត​ក៏​ប្រឈមមុខនឹង​ការ​បាត់បង់​ប្រាក់ចំណូល​ “​វា​ជួយ​ប្រជាពលរដ្ឋ​ឲ្យ​មាន​ចំណូល​ ​បាន​ចំណូល​ទាំង​អ្នក​លក់​ ​និង​ ​អ្នក​ដឹកជញ្ជូន​យកមក​ភ្នំពេញ​ផង​ដែរ​ ” ​។​

           ជាចុងក្រោយ​ ​ម្ចាស់​ស្នាដៃ​នំ​ប៉័​ង​ត្នោត​ ​បាន​ចែករំលែក​ដល់​សហគ្រិន​ជំនាន់​ក្រោយ​ឲ្យ​ប្រកាន់ខ្ជាប់​នូវ​ស្មារតី​រកស៊ី​ដោយ​ស្មោះត្រង់​ជាមួយ​ដៃគូ​និង​អតិថិជន​ដើម្បី​ជោគជ័យ​យូរអង្វែង​ធ្វើអ្វី​ដើម្បី​ប្រយោជន៍​ប្រជាជាតិ​ខ្មែរ​ជាជាង​ប្រយោជន៍​សួនតួ​ ​ជាពិសេស​កុំ​ភ្លេច​រិះរក​បង្កើត​អ្វី​ដែល​ថ្មី​ឆ្លើយតបនឹង​តម្រូវ​ការ​ទី​ផ្សារ​។​ ​សូម​បញ្ជាក់​ថា​ ​ហាង​ C​h​r​i​z​t​ ​Ben​ ​Bread​ & ​Ca​f​é ​មាន​អាសយដ្ឋាន​នៅ​ម្តុំ​សាលាសង្កាត់​ក្រាំង​ធ្នង់​ ​ផ្ទះ​លេខ​១​២​៧​ ​ផ្លូវ​២​០​១​១​ ​ខណ្ឌ​សែន​សុខ​ ​ឬ​អាច​ចូល​ទស្សនា​តាមរយៈ​ទំព័រ​ហ្វេសប៊ុក​ C​h​r​i​z​t​ ​ben​ ​ដោយ​ផ្ទាល់​៕​

Article by SRIN SOKMEAN


SUGGESTIONS