Sovrin
Sovrin
ប្រអប់ដៃប្រអប់ជើងជាផ្នែកតូចមួយនៃរាងកាយដែលស្ត្រីមួយចំនួនមិនសូវចាប់អារម្មណ៍ក្នុងការថែទាំប៉ុន្មានឡើយ។ តាមពិតទៅវាជាផ្នែកដ៏សំខាន់មួយដែលជួយលើកសម្រស់របស់ស្រ្តីឲ្យស្អាតទាំងព្រមហើយក៏បង្ហាញថាអ្នកជានារីមានអនាម័យ និងស្រឡាញ់សម្រស់កម្រិតណាផងដែរ។ ស្របក្នុងខណៈពេលដែលការចេញទៅខាងក្រៅត្រូវបានកាត់ បន្ថយនៅអំឡុងពេលកូវីដ-១៩នេះ សូវរីនសូមនាំយកនូវវិធីថែទាំប្រអប់ដៃប្រអប់ជើងជាមួយរូបមន្តប្រើស្ក្រាប់ធម្មជាតិ ដែលធានាថាអ្នកនឹងទទួលបានលទ្ធផលជាទីគាប់ចិត្តដោយមិនចាំបាច់ចំណាយពេលនិងថវិកាទៅដល់កន្លែងស្ប៉ានោះទេ។
ចំពោះប្រអប់ដៃ៖ ដើម្បីឲ្យប្រអប់ដៃទន់រលោង និងមានសំណើម អ្នកអាចធ្វើការស្ក្រាប់ជម្រុះកោសិកាចាស់ៗ ដោយជ្រើសរើសរូបមន្តស្រ្កាប់ណាមួយក្នុងចំណោមស្រ្កាប់ទាំង៣បែបដូចខាងក្រោមនេះ៖
ស្រ្កាប់ជួយឲ្យដៃស្រឡូន៖ យកស្ករស ២ស្លាបព្រាបាយ ប្រេងអូលីវ ១ស្លាបព្រាបាយ និងប្រេងឡាវែនឌឺ ១០-១៥តំណក់។ ដំបូង លាយគ្រឿងផ្សំទាំងនេះចូលគ្នាឲ្យសព្វ។ បន្ទាប់មក យកវាខាត់លើប្រអប់ដៃដោយ ម៉ាស្សាថ្នមៗរយៈពេល១នាទី។ ចុងក្រោយ លាងសម្អាតជាមួយទឹកក្តៅឧណ្ហៗជាការស្រេច។ អ្នកអាច អនុវត្ត ២ទៅ៣ដងក្នុងមួយសប្តាហ៍។
ស្រ្កាប់ធ្វើឲ្យដៃទន់រលោង៖ លាយអំបិល១កូនពែង ប្រេងអូលីវ ឬ ប្រេងទំពាំងបាយជូរ ១កូនពែង។ បន្ទាប់មក កូរបញ្ចូលគ្នា រួចយកមកត្រដុសលើដៃថ្នមៗរយៈពេល១ទៅ២នាទី ហើយលាងជម្រះជាមួយទឹក ក្តៅឧណ្ហៗ។ អនុវត្តឲ្យបាន៣ដងក្នុងមួយសប្តាហ៍ដើម្បីទទួលបានលទ្ធផលកាន់តែឆាប់រហ័ស។
ស្រ្កាប់ផ្តល់សំណើមដល់ស្បែក៖ ប្រេងដូងត្រូវបានគេប្រើប្រាស់យ៉ាងទូលំទូលាយចំពោះស្បែក ព្រោះ វាផ្ទុកទៅដោយអាស៊ីតខ្លាញ់ខ្ពស់ដែលជួយឲ្យស្បែកមានសំណើម។ គ្រឿងផ្សំមានដូចជា ប្រេងដូង ១ ស្លាប ព្រាបាយ ទឹកឃ្មុំ១ស្លាបព្រាបាយ ស្ករស១ស្លាបព្រាបាយ និងទឹកក្រូចឆ្មារស្រស់១ស្លាបព្រាបាយ។ លាយ គ្រឿងផ្សំខាងលើបញ្ចូលគ្នាដោយកូរឲ្យបាន៣០វិនាទី។ ចំណែកឯវិធីប្រើវិញ គឺមិនខុសពីខាងលើប៉ុន្មាននោះ ទេ គឺយកមកត្រដុសថ្នមៗលើស្បែករយៈពេល២នាទី រួចលាងជម្រះជាមួយទឹកក្តៅឧណ្ហៗជាការស្រេច។ អ្នក អាចអនុវត្តយ៉ាងហោចណាស់២ដងក្នុងមួយសប្តាហ៍។
ចំពោះប្រអប់ជើង៖ ដូចគ្នាទៅនឹងប្រអប់ដៃដែរ ប្រអប់ជើងអាចនឹងមានស្នាមក្រិនឬប្រេះនៅតាមកែងជើង ជាពិសេសគឺមានស្នាមខ្មៅនៅតាមក្រញរជើងតែម្តង។ ដើម្បីឲ្យមើលទៅស្រឡូនស្អាត អ្នកអាចថែទាំដោយប្រើស្រ្កាប់ ណាមួយចំណោមស្ក្រាប់ទាំង៣ខាងក្រោម៖
ស្រ្កាប់ប្រេងជីរអង្កាម៖ ស្រ្កាប់ប្រភេទនេះជួយផ្តល់សំណើម និងជួយសម្រួលការចុករោយបានខ្លះផងដែរ។ គ្រឿងផ្សំមានដូចជា ស្ករស១ពែង ប្រេងដូង ឬ ប្រេងអូលីវ ២ស្លាបព្រាបាយ និងប្រេងជីរអង្កាម ១ ស្លាប ព្រាបាយ។ លាយស្ករស និងប្រេងដូង ឬប្រេងអូលីវបញ្ចូលគ្នាកូរឲ្យសព្វ រួចចាក់ប្រេងជីរអង្កាមចូលតាម ក្រោយ។ ចុងក្រោយយកស្រ្កាប់ដែលលាយរួចខាងលើមកដុសខាត់ប្រអប់ជើង រួចលាងជម្រះទឹកស្អាតជាការ ស្រេច។
ស្រ្កាប់ក្រូចឆ្មារ៖ ស្ករស ២ពែង ប្រេងដូង កន្លះពែង និងទឹកក្រូចឆ្មារស្រស់១ស្លាបព្រាបាយ។ លាយគ្រឿងផ្សំ ទាំងអស់បញ្ចូលគ្នាឲ្យទៅជាល្បាយតែមួយ បន្ទាប់មកយកមកដុសខាត់រយៈពេល៥នាទីលើប្រអប់ជើង ជា ពិសេស ត្រង់ផ្នែកដែលមានស្នាមក្រិនរួចលាងជម្រះជាមួយទឹកជាការស្រេច។ អ្នកអាចដុសស្រ្កាប់ ២ដងក្នុង មួយសប្តាហ៍។
ស្រ្កាប់ទឹកដោះគោព្យាបាលប្រេះកែងជើង៖ គ្រឿងផ្សំមានដូចជា ទឹកដោះគោ១ពែង ទឹកក្តៅ៥ពែង ស្ករស៤ស្លាបព្រាបាយ ប្រេងសម្រាប់លាបស្បែកកូនក្មេងកន្លះពែង ឡេផ្តល់សំណើមណាមួយ និងស្រោមជើង។ ឯរបៀបអនុវត្តវិញ ចាក់ទឹកដោះគោជាមួយទឹកក្តៅទៅក្នុងចានដែក រួចត្រាំជើងរយៈពេលពី ៥ទៅ ១០ នាទី។ ជូតជើងឲ្យស្ងួតយកប្រេងសម្រាប់លាបស្បែកកូនក្មេងមកលាយជាមួយស្ករសកូរចូលគ្នាឲ្យសព្វ រួចយក មកដុសខាត់នៅជុំវិញប្រអប់ជើង។ ព្រមជាមួយគ្នានេះដែរ យកថ្មខាត់កែងជើងមកដុសត្រង់តំបន់ដែលមាន ស្នាមប្រេះរួចលាងជម្រះចេញ។ ក្រោយពេលដុសខាត់រួចរាល់ យើងលាបឡេផ្តល់សំណើមបន្ថែម និងពាក់ស្រោមជើងឃ្លុំជាការស្រេច៕
Article by: SOUNG SOKSAN
