ពាក្យថា Sustainable Fashion ជាភាសាបច្ចេកទេសដ៏សំខាន់មួយដែលអ្នកធ្វើការនៅក្នុងវិស័យហ្វេហ្សិន ឬ វិស័យម៉ូដសម្លៀកបំពាក់ភាគច្រើនបានស្គាល់រួចមកហើយ ពីព្រោះពាក្យនេះត្រូវបានប្រើប្រាស់យ៉ាងទូលំទូលាយនៅក្នុងគេហទំព័រជាច្រើនតាមប្រព័ន្ធអ៊ីនធឺរណេតក្នុងពេលបច្ចុប្បន្ននេះ។ ទោះបីជាយ៉ាងនេះក្តី ក៏មិនមែនមនុស្សគ្រប់គ្នាសុទ្ធសឹងតែបានយល់ច្បាស់នូវអត្ថន័យនៃពាក្យនេះ ព្រមទាំងគុណសម្បត្តិរបស់វាទាំងអស់នៅឡើយទេ។
យោងតាមការចុះផ្សាយរបស់គេហទំព័របរទេសឈ្មោះ Conscious Life & Style ហ្វេហ្សិនដែលផ្តល់នូវនិរន្តរភាពបរិស្ថាន (Sustainable Fashion) សំដៅទៅលើ វាយនភណ្ឌ ឬ គ្រឿងតុបតែងកាយដែលត្រូវបានផលិតឡើងដោយឆ្លងកាត់បច្ចេកទេសឬវិធីសាស្រ្តដែលមានទំនួលខុសត្រូវចំពោះសង្គមនិងប្រព័ន្ធជីវៈចម្រុះ(ប្រព័ន្ធអេកូឡូហ្ស៊ី)។ ការប្រើប្រាស់ហ្វេហ្សិនខាងលើនេះមិនសំដៅត្រឹមតែការផលិត ឬ ទិញផលិតផលថ្មីៗ នោះទេ ដែលខុសប្លែកពីអ្វីដែលអ្នកជំនាញម៉ាឃីតធីងសព្វថ្ងៃធ្វើយុទ្ធនាការអូសទាញយើងឲ្យទិញផលិតផលណាមួយដែលគេអះអាងថាជាប្រភេទ Sustainable Fashion។ តាមពិតទៅ យើងអាចដើរទិញអីវាន់តាមរបៀបដែលអាចជួយដល់និរន្តរភាពបរិស្ថានបាន ប៉ុន្តែមិនចាំបាច់ទិញរបស់ថ្មីគ្រប់បែបយ៉ាងទើបបានហៅថា “ហ្វេហ្សិនដែលផ្តល់នូវនិរន្តរភាពបរិស្ថាន” នោះទេ។ ជាក់ស្តែង យើងអាចពាក់អ្វីដែលយើងមានស្រាប់ ទិញផលិតផលសម្លៀកបំពាក់ជជុះ និង ខ្ចីសម្លៀកបំពាក់ពីមិត្តភក្តិ ដែលទាំងនេះក៏ជាសកម្មភាពផ្សេងទៀតដែលគាំទ្រដល់ចលនាហ្វេហ្សិនជួយដល់និរន្តរភាពបរិស្ថាន។
ហេតុអ្វីបានជាគេចាត់ទុកថាហ្វេហ្សិនប្រភេទនេះមានសារៈសំខាន់? វិស័យហ្វេហ្សិនបាននិងកំពុងបង្កផលវិបាកប៉ះពាល់ដល់សង្គម និង បរិស្ថាន អស់រយៈពេលជាយូរណាស់មកហើយ។ ខណៈដែលឧស្សាហកម្មសម្លៀកបំពាក់ត្រូវបានគេរកឃើញថាបានរួមចំណែកប្រមាណ ៨-១០% នៃការបញ្ចេញឧស្ម័នកាបូនិចនៅលើពិភពលោក ការស្វែងរកដំណោះស្រាយក្នុងការកែលម្អហ្វេហ្សិនមានលទ្ធភាពអាចជួយផ្លាស់ប្តូរលុបបំបាត់ការបញ្ចេញសារធាតុកាបូនទៅក្នុងបរិយាកាសនិងឈានទៅសម្រេចគោលដៅជួយការពារអាកាសធាតុពិភពលោកដែលមនុស្សទូទាំងពិភពលោកកំពុងផ្តោតការយកចិត្តទុកដាក់។ ជាទូទៅ គេតែងតែសួរថា ហេតុអ្វីបានជាផលិតផលប្រភេទ Sustainable Fashion មានតម្លៃថ្លៃម្ល៉េះ? ប៉ុន្តែតាមការពិត ផ្ទុយទៅវិញ វាអាចជួយដល់សេដ្ឋកិច្ចគ្រួសារបានថែមទៀតផង ពីព្រោះ ទ្រឹស្តីបានកំណត់ថា ជម្រើសណាដែលធូរថ្លៃជាងគេ ជម្រើសនោះជាជម្រើសដែលមាននិរន្តរភាពជាងគេ។ តាមរយៈនេះ យើងអាចសន្សំសំចៃដោយប្រើប្រាស់ឡើងវិញនូវធនធានដែលយើងមានស្រាប់ ជាពិសេសខោអាវចាស់ៗនៅក្នុងទូររបស់លោកអ្នក។ គេហទំព័រដដែលក៏បានបង្ហាញឲ្យដឹងថា លោកអ្នកអាចជួយបរិស្ថានតាមរយៈការខ្ចី ឬ ផ្លាស់ប្តូរសម្លៀកបំពាក់រវាងគ្នាទៅវិញទៅមកក្នុងករណីចាំបាច់ម្តងម្កាលណាមួយ ឬ ស្វែងរកសម្លៀកបំពាក់នៅហាងជជុះ ឬ ពីវេបសាយលក់ផលិតផលជជុះ ឬ ពិចារណាទៅលើវិធីសាស្រ្តផ្សេងទៀត តួយ៉ាង ការជួលសម្លៀកបំពាក់ទៅចូលរួមកម្មវិធី ជាដើម (ប៉ុន្តែវាអាចមិនមែនជាជម្រើសដែលពេញនិយមបំផុតនោះទេ ដោយសារតែវាផ្តល់នូវផលប៉ះពាល់ពីការដឹកជញ្ជូន និង ការបោកគក់សម្អាត។ល។) ។
ចុះបើករណីយើងចង់ទិញសម្លៀកបំពាក់ថ្មីៗ? ជាទូទៅ នៅលើសម្លៀកបំពាក់ អ្នកនឹងឃើញមានស្លាកសម្គាល់ថា “Conscious”, “Eco” ឬ “ Sustainable” ដែលសំដៅដល់ អត្ថប្រយោជន៍របស់វាចំពោះផ្នែកបរិស្ថាន។ ប៉ុន្តែសូមចងចាំថា ពាក្យទាំងនោះអាចនឹងក្លែងក្លាយ ដោយមូលហេតុថា វាមិនត្រូវបានកំណត់ចេញពីភាគីទីបីណាមួយឡើយ ពោលគឺ អ្នកផលិតជាអ្នកសរសេរដោយខ្លួនឯងទៅលើផលិតផលរបស់ខ្លួន។ ដូចនេះ ស្លាកសញ្ញាសម្គាល់តែមួយមុខមិនគ្រប់គ្រាន់សម្រាប់ការកំណត់អត្តសញ្ញាណផលិតផលប្រភេទខាងលើនេះទេ។ លោកអ្នកត្រូវពិនិត្យទៅលើចំណុចជាច្រើនទៀត ក្នុងនោះរួមមាន ការស្គាល់អត្តសញ្ញាណវត្ថុធាតុដើម (ឧទា: កប្បាសបែបសរីរាង្គ, ក្រណាត់ Linen ឬ Hemp, ក្រណាត់កែច្នៃពីសំណល់ប្លាស្ទិក) ការប្រើប្រាស់ល័ក្តធម្មជាតិ ឬ ប្រភេទល័ក្ត Fiber-reactive ដែលបង្កផលប៉ះពាល់តិចតួច ការប្រើប្រាស់ធនធានប្រកបដោយទំនួលខុសត្រូវ (ឧទា: រោងចក្រដែលប្រើថាមពលអាចប្រើប្រាស់ឡើងវិញបាន ដូចជា ថាមពលខ្យល់ ឬ វារីអគ្គិសនី) ស្តង់ដារពលកម្មប្រកបដោយក្រមសីលធម៌ (គិតគូរពីធនធានពលកម្ម) និង ការកំណត់គុណតម្លៃផ្ទាល់ខ្លួនរបស់អ្នកប្រើប្រាស់ (ឧទា: គាំទ្រយីហោដែលជួយបរិច្ចាគដល់សកម្មភាពអភិរក្សបរិស្ថាន)។
ទន្ទឹមនឹងនេះ លោកអ្នកគប្បីជ្រើសរើសផលិតផលណាដែលត្រូវគ្នានឹងគុណតម្លៃណាមួយដែលលោកអ្នកចង់បានបំផុត ដូចជាថាតើវាជាផលិតផលធ្វើក្នុងស្រុកពិតមែនឬទេ? ប្រើវត្ថុធាតុដើមកែច្នៃឡើងវិញមែនឬទេ? សង្វាក់ផលិតកម្មមិនប្រើជាតិគីមីបំពុលបរិស្ថានមែនឬទេ? ជាពិសេស សូមកុំរំពឹងទុកនូវភាពល្អឥតខ្ចោះពីផលិតផលបែបនិរន្តរភាពបរិស្ថាន! ផលិតផលបែបនេះអាចជាផលិតផលសហគមន៍ធ្វើដោយដៃដែលអាចមិនល្អឥតខ្ចោះដូចបោះពុម្ពនៅក្នុងរោងចក្រឧស្សាហកម្មធំៗនោះទេ៕
Article by SRIN SOKMEAN