នៅពេលទៅដល់ខេត្តណាមួយ លោកអ្នកច្បាស់ជាចង់ទិញអ្វីមួយផ្ញើអ្នកផ្ទះ ឬរកចំណីចំណុកប្លែកៗប្រចាំតំបន់គ្រាន់បានទទួលទានតាមផ្លូវធ្វើដំណើរ។ តាមរយៈផ្នត់គំនិតនេះយុវតីវ័យក្មេងមួយរូបបានសម្រេច ចិត្តបង្កើតហាងកាហ្វេទាន់សម័យមួយដើម្បីបំពេញកំណើនតម្រូវការអ្នកដំណើរជិតឆ្ងាយដែលឆ្លងកាត់ទីរួមខេត្តកំពង់ស្ពឺ ឬក្រុងច្បារមន។ ហាងកាហ្វេដែលបើកថ្មីនេះមានឈ្មោះថា June Café by Jenna ហៅកាត់ថា «ជូន កាហ្វេ»ស្ថិតនៅគល់ស្ពានរកាធំ ត្រង់ចំណុចរង្វង់មូលផ្លែត្នោតដែលជាសមិទ្ធផលនៃការអភិវឌ្ឍថ្មីប្រចាំខេត្តតែម្តង។
ក្រៅពីជាហាងកាហ្វេដែលលក់កាហ្វេ និងភេសជ្ជៈផ្សេងៗធម្មតាហាងនេះមានផលិតផលសំខាន់ប្រចាំហាងគឺ ទឹកកកឈូសជំនាន់ថ្មី និងចេកអាំងខ្ទិះល្បីប្រចាំហាង ដែលអតិថិជនក្នុងតំបន់ និងអ្នកធ្វើដំណើរកាត់តែងតែមកស្វែងរកនៅទីនេះជាញឹកញាប់។ កញ្ញា ចំរេីន ច័ន្ទភារុណ ម្ចាស់ហាងបានបញ្ជាក់ថា ថ្វីដ្បិតតែចេកអាំង និងទឹកកកឈូសជាអាហារសម្រន់បែបប្រពៃណីនៅក្នុងសង្គមខ្មែរយើងជាយូរណាស់មកហើយក៏ដោយតែក៏នៅតែទទួលការគាំទ្រពីអតិថិជន ជាពិសេសនៅពេលដែលអាហារទាំងពីរនេះត្រូវបានកែច្នៃបន្ថែមរសជាតិឲ្យកាន់តែទាន់សម័យនិងមានរសជាតិទ្វេដងលើសរសជាតិដើមដែលអ្នកស្រុកធ្លាប់ហូបពីមុនមក។
“អ្នកស្រុកអ្នកភូមិ គាត់ស្រួលញ៉ាំ ព្រោះជារបស់គាត់ធ្លាប់ញ៉ាំពីមុនៗមកដែលមានតែគេលាបទឹកអំបិលធម្មតា តែឥឡូវយើងមានលក់អ៊ីចឹងទៅ ចាស់ៗក៏ហូបបាន ព្រោះចេកយើងជាចេកខ្មែរ។ ប្រសិនបើ កន្លែងមួយចំនួន ពិបាករកចេក គេប្រើចេកធម្មតា (ចេកនាំចូល) អត់ប្រើចេកខ្មែរ ចាស់ៗអត់សូវហ៊ានហូប” កញ្ញាបានពន្យល់ពីមូលហេតុដែលនាំឲ្យទទួលការគាំទ្រនៅលើទីផ្សារ។
បើនិយាយពីចេកអាំងខ្ទិះ ចេកដែលជាគ្រឿងផ្សំសំខាន់ត្រូវបានសម្រិតសម្រាំងយកតែចេកខ្មែរសុទ្ធ សាធ។ លក្ខណៈសម្គាល់នោះគឺ ចេកមានរូបរាងមូលល្អ មិនស្រួចស្តួចចុង។ ចេកខ្មែរនោះទៀតសោតគឺសម្រាំងយកតែចេកណាដែលសាច់ទន់ តែសំបកនៅខៀវមិនទុំជោរ សម្តិលឲ្យអស់ជ័រ ស្ងួតសាច់ល្អ ហើយសង្កត់ឲ្យទាល់តែចេញសាច់ពណ៌លឿង អាំងទៅផ្អែមដូចចេកក្រមួន។ ផ្ទុយទៅវិញ បើយកចេកប្រទេសជិតខាងមកធ្វើ នោះនឹងមានសភាពរឹងក្រោយពីសង្កត់មិនលើសពី២០នាទីទេ មិនទន់ឆ្ងាញ់ដូចចេកខ្មែរនោះទេ។
ចំពោះទឹកកកឈូសវិញ ហាងនេះប្រើរូបមន្តប្លែកពិសេសខុសពីកន្លែងដទៃត្រង់ ដាក់ទឹកកនៅបាតខាងក្រោម ហើយគ្រឿងផ្សំផ្សេងទៀតដាក់គ្របពីខាងលើវិញ ដើម្បីកុំឲ្យនៅពេលដែលយើងក្រទទួលទាន ទឹកកកនឹងរលាយបណ្តាលឲ្យបាត់បង់រសជាតិបង្អែម។ ទឹកកកឈូសជំនាន់ថ្មីនេះប្រើតែកសិផលធម្មជាតិ ប្រភេទសណ្តែកនិងដំឡូងក្នុងស្រុក ពោលគឺមានតែសណ្តែកក្រហម ដំឡូងស ដំឡូងជ្វាក្រហម និងស្វាយ ហើយចំពោះទឹកស្ករ ប្រើតែខ្ទិះសុទ្ធ មិនប្រើទឹក ធ្វើឲ្យមានរសជាតិខាប់ចូលជាតិផ្អែមមុតឆ្ងាញ់។ អ្វីដែលរឹតតែពិសេសទៀតនោះ គឺបង្អែមនេះប្រើសាច់ដូងដុតដ៏សែនឈ្ងុយឆ្ងាញ់ជំនួសសាច់ដូងខ្ចីធម្មតាដែលលោកអ្នកធ្លាប់សាកល្បងនៅទីតាំងផ្សេងៗកន្លងមក។ សរុបមក គ្រឿងគ្រៅសឹងតែទាំងអស់គឺជាផលិតផលក្នុងស្រុក ហើយធ្វើដោយដៃខ្លួនឯង តួយ៉ាងសណ្តែកក្រហមយកមកស្ងោរជំនួសការប្រើសណ្តែកកំប៉ុងលក់នៅឯផ្សារ។
មិនត្រឹមតែមានគុណតម្លៃផ្នែករសជាតិប៉ុណ្ណោះទេ ការកំណត់តម្លៃសមរម្យក៏ជាកត្តាទាក់ទាញអតិថិជនរបស់ហាងនេះដែរ។ ចេកអាំងខ្ទិះដូង មួយចង្កាក់ត្រឹមតែ៣០០០រៀលប៉ុណ្ណោះ ហើយក៏មានជម្រើសចេកអាំងខ្ទិះកាត់ដាក់ប្រអប់ពិសេសថែមទៀតផង។ ឯ ទឹកកកឈូសមួយកែវធំ (អាចចែកគ្នាញ៉ាំបាន ២-៣នាក់) មានតម្លៃត្រឹមតែ ៥០០០ រៀលប៉ុណ្ណោះ។ ត្រង់ចំណុចតម្លៃនេះ កញ្ញាបានបកស្រាយថា ធ្លាប់មានអតិថិជនមួយចំនួនតូចដែលយល់ថាតម្លៃនេះរាងថ្លៃសម្រាប់ទឹកកកឈូសប៉ុន្តែមតិនេះត្រូវរសាយទៅវិញនៅពេលពួកគាត់បានឃើញផលិតផលជាក់ស្តែង គឺមានបរិមាណច្រើន ហូបម្នាក់ឯងស្ទើរតែមិនអស់។
ផលិតផលទាំងពីរខាងលើនេះទទួលបានប្រជាប្រិយភាពកើនឡើងជាលំដាប់។ ជាឧទាហរណ៍ ទឹកកកឈូសដែលទើបចាប់ផ្តើមលក់ត្រឹមតែ២-៣ខែនេះ លក់ដាច់រហូតដល់ជាង១០០កែវក្នុងថ្ងៃលក់ផ្លូវការជាលើកដំបូង។ ទោះបីជាថ្ងៃធម្មតា មិនមែនថ្ងៃបុណ្យទានធំៗ ក៏អាចលក់បានប្រមាណ៧០កែវជាមធ្យម។ រីឯចេកអាំង អាចលក់បាន ១០០-២០០ក្នុងមួយថ្ងៃ។ អតិថិជនដែលគាំទ្រកន្លងមកគឺមានមកពីគ្រប់បណ្តាស្រុកទាំង៨នៃខេត្តកំពង់ស្ពឺ ហើយកញ្ញាក៏អាចទទួលការកុម្ម៉ង់សម្រាប់អតិថិជនរស់នៅទីក្រុងនិងតាមបណ្តាខេត្ត ផ្សេងៗដែលចង់សាកល្បងផងដែរដោយធានាថាមានវិធីសាស្រ្តវេចខ្ចប់មិនឲ្យបាត់បង់នូវគុណភាពរសជាតិរបស់វាឡើយ។ កញ្ញាគ្រោងនឹងបង្កើនផលិតផលអាហារសម្រន់បែបច្នៃប្រតិដ្ឋមួយមុខទៀតបន្ទាប់ពីនេះ ហើយក៏សង្ឃឹមថានឹងទទួលបានជោគជ័យកាន់តែខ្លាំងដែរព្រោះទីតាំងនេះជាផ្លូវទេសចរឆ្លងកាត់មានសក្តា នុពលទាក់ទាញច្រើន៕
Article by SRIN SOKMEAN