Sovrin
Sovrin
«Mona Palette» ស្លាកយីហោគ្រឿងអលង្ការប្រណីតរំលេចសិល្បៈខ្មែរដោយយុវតីខ្មែរ
NEWS 2 years ago
គ្រឿងអលង្ការ ត្រូវបានគេចាត់ទុកថាជាគ្រឿងលម្អកាយដ៏សំខាន់បំផុតដែលជាផ្នែកមួយបន្ថែមសម្រស់ឲ្យកាន់តែស្រស់ស្អាត ជាពិសេស នៅពេលដែលគេត្រូវចូលរួមក្នុងកម្មពិធីនានាជាដើម។ យ៉ាងណាមិញ ប្រសិនបើនិយាយពីម៉ូដគ្រឿងអលង្ការដែលត្រូវបានច្នៃឡើងដោយអ្នកជំនាញសុទ្ធសឹងតែមានការរចនាម៉ូដយ៉ាងប្រណីតភាព និងទាន់សម័យដែលស័ក្តិសមបំផុតសម្រាប់អ្នកប្រើប្រាស់។ ទន្ទឹមនឹងកត្តានេះដែរ បានជំរុញឲ្យស្ថាបនិកាមួយរូបសម្រេចចិត្តជ្រើសរើសអត្តសញ្ញាណជាតិខ្មែរមកច្នៃជាគ្រឿងអលង្ការដ៏ទាក់ទាញ និងជាទំនោរថ្មីផងដែរ។
ផ្តើមចេញពីអ្នកស្រឡាញ់ការប្រើប្រាស់គ្រឿងអលង្ការមួយរូប កញ្ញា នួន ម៉ូលីណា ស្ថាបនិការបស់ស្លាកយីហោ Mona Palette ដែលបង្កើតឡើងរយៈពេលជាង ២ ឆ្នាំមកនេះបានបង្ហាញពីទស្សនៈវិស័យរបស់ខ្លួនទាក់ទងនឹងការបង្កើតស្លាកយីហោ ក៏ដូចជាការជ្រើសរើសទម្រង់សិល្បៈមកច្នៃជាម៉ូដគ្រឿងអលង្ការយ៉ាងដូច្នេះថា «រយៈពេល២ឆ្នាំមុន ខ្ញុំបានចាប់អារម្មណ៍លើគ្រឿងអលង្ការ ហើយខ្ញុំពុំទាន់ឃើញថានៅក្នុងស្រុកយើងមានក្រវិលដែលមានចម្រុះពណ៌ស្រស់ឆើតឆាយ និងទាន់សម័យដែលមានលក្ខណៈបែបខ្មែរមិនទាន់មានទីផ្សារនោះទេ ដូចខ្ញុំជាដើមនៅពេលដែលខ្ញុំទៅខាងក្រៅដើម្បីជួបមិត្តភក្តិបរទេសចង់ពាក់ក្រវិលដែលមានលក្ខណៈខ្មែរមិនទាន់ឃើញមានជម្រើសច្រើនឲ្យរើសនៅឡើយ ដូច្នេះខ្ញុំក៏ចាប់ផ្តើមចង់បង្កើត និងច្នៃក្រវិលឡើង ហេតុដូច្នេះខ្ញុំក៏ចាប់ផ្តើមសិក្សាតាមរយៈ Youtube ថាតើយើងអាចច្នៃក្រវិលនោះឡើងតាមវិធីណា?។ បន្ទាប់មកខ្ញុំក៏បានឃើញថាភាគច្រើនគេធ្វើក្រវិលអស់ទាំងនោះផលិតពី Polymer Clay ច្រើនកំពុងតែពេញនិយមនៅខាងក្រៅប្រទេសផង ហើយខ្ញុំក៏ចាប់ ផ្តើមរៀនធ្វើវាបន្តិចម្តងៗក្នុងទម្រង់សិល្បៈខ្មែរ រីឯម៉ូដដែលខ្ញុំចាប់ផ្តើមធ្វើមុនគេនោះគឺរូបប្រាសាទអង្គរវត្ត បន្តបន្ទាប់មកទៀត អក្សរ ឬតួលេខខ្មែរជាដើម»។ ជាក់ស្តែង ពីម៉ូដក្រវិលមួយទៅម៉ូដក្រវិលមួយសុទ្ធសឹងតែមានការរចនាយ៉ាងល្អិតល្អន់បំផុតពីស្ថាបនិការូបនេះផងដែរ តួយ៉ាង ការស្វែងរកគំនិតប្លែកៗ ការគូរព្រាង ការធ្វើរចនាច្នៃម៉ូដសាកល្បងមុននឹងសម្រេចជាផ្លូវការត្រូវការរយៈពេលយូរ ដើម្បីប្រាកដថាសមិទ្ធផលចុងក្រោយនោះនឹងស័ក្តិសមសម្រាប់អ្នកប្រើប្រាស់ មានគុណភាពខ្ពស់ ស្រស់ស្អាត និងពេញនិយមជាដើម។
«Mona Palette» ជាស្លាកយីហោដែលបានប្រើប្រាស់ឈ្មោះរបស់ស្ថាបនិកា «ម៉ូលីណា» រីឯពាក្យថា «Palette» មានន័យថាពណ៌ ហេតុដូច្នេះកាលដែលអ្នកប្រើប្រាស់ ឬអតិថិជននឹកគិតដល់ Mona Palette គឺគេនឹងនឹកឃើញដល់ម៉ូដក្រវិលដែលមានពណ៌ចម្រុះទាន់សម័យធ្វើដោយដៃប្រកបដោយគុណភាព។ យ៉ាងណាមិញ ប្រសិនបើតាមការលើកឡើងរបស់ស្ថាបនិកាវ័យក្មេងរូបនេះបានឲ្យដឹងផងដែរថា Mona Palette ចាប់ផ្តើមបើកដំណើរការផ្លូវការនៅក្នុងអំឡុងឆ្នាំ២០២០ ជាពេលកំពុងមានការរីករាលដាលនៃជំងឺកូវីដ ១៩ យ៉ាងខ្លាំងដែលធ្វើឲ្យមានការប៉ះពាល់ដល់ការអាជីវកម្មទើបតែដំណើរការនេះធ្ងន់ធ្ងរ ក៏ប៉ុន្តែដោយក្តីស្រឡាញ់ និងភាពអត់ធ្មត់របស់ស្ថាបនិកាបានធ្វើឲ្យស្លាកយីហោនេះនៅតែបន្តរហូតដល់បច្ចុប្បន្ន និងមានការគាំទ្រពីអតិថិជនជាតិ និងអន្តរជាតិ។ ទន្ទឹមនឹងនេះកិច្ចពិភាក្សាជាមួយនឹង សូវរីន កញ្ញា ម៉ូលីណា ក៏បានបង្ហាញពីចំណាប់អារម្មណ៍របស់ខ្លួនទាក់ទងនឹងការប្រើប្រាស់ផលិតផលក្នុងស្រុក ជាពិសេស ផលិតផលធ្វើដោយដៃយ៉ាងដូច្នេះថា «កំណើននៃការប្រើប្រាស់ផលិតផលក្នុងស្រុកកាន់តែមានការរីកចម្រើនគួរឲ្យកត់សម្គាល់ ខ្ញុំដឹងថាផលិតផលទាំងអស់នោះមានតម្លៃថ្លៃជាងទីផ្សារពិតមែន ប៉ុន្តែតម្លៃទាំងនោះវាសមស្របជាមួយនឹងកម្លាំងពលកម្មរបស់ពួកគាត់អាចជាផ្នែកមួយដែលជួយដល់គ្រួសាររបស់ពួកគាត់ ខ្ញុំសង្ឃឹមថាប្រជាជនខ្មែរយើងនឹងនៅតែបន្តផលិតផលក្នុងស្រុកកាន់តែច្រើនឡើងជាបន្តបន្ទាប់»៕
Article by PAN SIVLY
