លម្ហែជាយក្រុងជាមួយទេសភាពមាត់បឹងជនបទនៅឯផ្ទះចម្ការ «Home Chamkar»
TRAVEL & LIVING 2 years agoនៅមិនឆ្ងាយប៉ុន្មានពីទីក្រុងភ្នំពេញ ស្ថិតក្នុងឃុំអរិយក្សត្រ ស្រុកល្វាឯម ខេត្តកណ្តាល «Home Chamkar» ឬ «ផ្ទះចម្ការ» គឺជាកន្លែងលម្ហែក្បែរក្រុងមួយដែលអំណោយផលជាមួយទេសភាពបរិសុទ្ធបែបស្រុកស្រែចម្ការ។ ដើម្បីឆ្ពោះទៅដល់ទីនោះ យើងត្រូវធ្វើដំណើរដោយចេញពីកំពង់ចម្លងភ្នំពេញ-អរិយក្សត្រឆ្ពោះទៅកាន់ត្រើយម្ខាង រួចបន្តដំណើរប្រមាណ១៥នាទីលើចម្ងាយផ្លូវប្រមាណ២គីឡូម៉ែត្រនឹងទៅដល់ទីជាប់មាត់បឹងនោះមិនខាន។
ដូចទៅនឹងឈ្មោះ «ផ្ទះចម្ការ» គឺជាភោជនីយដ្ឋាន និងជាហាងកាហ្វេ ដែលមានការរៀបចំបរិយាកាសបែបធម្មជាតិ អំណោយផលខ្យល់អាកាសរហើយៗស្រស់ស្រាយ ព្រមជាមួយការរៀបចំជាផ្ទះលម្ហែបែបស្រុកស្រែចម្ការតែម្តង។ ពិតណាស់ មកដល់ទីនេះភ្លាម យើងទទួលបានអារម្មណ៍សម្រាករហ័សភ្លែត នៅបរិវេណផ្លូវចូលមានដាំលម្អដោយសួនស្រូវបៃតងខ្ចី ឯឈានចូលដល់ធ្លាដីខាងក្នុងមានដាំដំណាំតាមជ្រុងម្ខាងទៅជ្រុងម្ខាង លាយឡំហូរហែដូចជា ចេក ស្វាយ ខ្នុរ និងបន្លែបង្ការចម្រុះមុខ។ បើចង់ស្រួលខ្លួននឹងម៉ាស៊ីនត្រជាក់ អាចអង្គុយនៅក្នុងភោជនីយដ្ឋានបិទជិតដោយផ្ទាំងកញ្ចក់ តែបើចង់ណ្តោយខ្លួននឹងខ្យល់ធម្មជាតិអាចអង្គុយនៅតុក្រោមឆត្រប្របមាត់បឹង ឬក៏មានគ្នាច្រើនជួបជុំនៅក្យូសក្បែរហាងក្រោមម្លប់ឈើត្រឈឹងត្រឈៃ។
តាមរយៈការឲ្យដឹងពីម្ចាស់ «ផ្ទះចម្ការ» ទីនេះក្រៅពីទទួលភ្ញៀវសម្រាកលម្ហែ ក៏មានទទួលរៀបចំកម្មវិធីជប់លៀង កម្មវិធីខួបកំណើត និងមានជាបន្ទប់ប្រជុំផងដែរ។ មកកម្សាន្តនៅទីនេះ យើងមិនត្រឹមតែបានក្រេបរសជាតិកាហ្វេដ៏ឈ្ងុយឆ្ងាញ់ និងអាហារដ៏សម្បូរបែបប៉ុណ្ណោះទេ តែថែមទាំងអាចកម្សាន្តស្ទូចត្រី គយគន់ព្រះអាទិត្យរះ និងរៀបអស្តង្គត ក៏ដូចជាបានប្រទះនឹងទេសភាពនៃអគារខ្ពស់ៗកំពុងអើតឡឺមពីទីក្រុងភ្នំពេញ។ ជាមួយដំណាំហូបផ្លែកំពុងឲ្យផល ទីនេះអនុញ្ញាតឲ្យយើងបេះហូបបានដោយឥតគិតថ្លៃផងដែរ។
សម្រាប់មុខម្ហូប «ផ្ទះចម្ការ» មានបម្រើទាំងម្ហូបបែបខ្មែរ និងអឺរ៉ុប ទាំងអាហារពេលព្រឹក ពេលថ្ងៃត្រង់ អាហារសម្រន់ និងអាហារពេលល្ងាច។ បើបានមកពេលព្រឹកកុំភ្លេចសាកល្បង គុយទាវ បាយមាន់ បាយផាក់ឡូវ និងនំបុ័ងខគោជាដើម។ រីឯអាហារកុម្ម៉ង់ពេលថ្ងៃត្រង់វិញ អាចកុម្ម៉ង់ម្ហូបជាមួយជម្រើសសាច់ដូចជា សាច់ជ្រូក សាច់គោ បង្កង បង្គា ត្រីរ៉ស់ ត្រីឆ្លូញ ត្រីកេះ និងមាន់ស្រែ ចម្អិនជាមុខម្ហូបណាក៏បាន ពិសេសក៏មានជាស្តេកសាច់គោអូស្រ្តាលី ស្តេកត្រីសាម៉ុងផងដែរ។ មុខម្ហូបមិនគួររំលងផងនោះ រួមមាន តុងយ៉ាំបង្កង ឆាជូរអែមត្រីកេះ ទឹកគ្រឿង មាន់លីងគល់ស្លឹកគ្រៃ។ បើនិយាយពីភេសជ្ជៈទីនេះមាន កាហ្វេចម្ការ តែក្រហមទឹកដោះគោ តែក្រហមក្រូចឆ្មារ និងភេសជ្ជៈជាច្រើនមុខទៀត។
«ផ្ទះចម្ការ» បើកដំណើរការរៀងរាល់ថ្ងៃចាប់ពីម៉ោង៦ព្រឹកដល់ម៉ោង៩កន្លះយប់។ ចុងសប្តាហ៍កុំភ្លេចទៅសម្រាកលម្ហែណា៎! ព្រោះទីនេះមានទីតាំងថតរូបស្អាតៗជាច្រើនកន្លែងធានាថាមិនខកបំណង៕
Article by SOUNG SOKSAN