Sovrin
Sovrin
ជ័យលាភីលេខ១ស្នាដៃសិល្បៈស្តីពីសម្បត្តិបេតិកភណ្ឌវប្បធម៌អរូបីកម្ពុជាដែលចុះក្នុងបញ្ជីយូណេស្កូ
NEWS 2 years ago
ការប្រកួតស្នាដៃសិល្បៈ «អបអរសាទរបេតិកភណ្ឌវប្បធម៌ទាំង៥របស់កម្ពុជាបានចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ» គឺជាកម្មវិធីមួយដែលបានរៀបចំឡើងដោយសាកលវិទ្យាល័យភូមិន្ទវិចិត្រសិល្បៈ សហការជាមួយការិយាល័យអង្គការយូណេស្កូប្រចាំប្រទេសកម្ពុជា។ គោលបំណងនៃការបង្កើតកម្មវិធីនេះឡើងគឺ ដើម្បីជួយលើកកម្ពស់វប្បធម៌អរូបីនៅក្នុងប្រទេសកម្ពុជា និងចង់ឲ្យប្រជាជន ក៏ដូចជាសិស្សនិស្សិតមកពីបណ្តាសាកលវិទ្យាល័យផ្សេងៗមានឱកាសបញ្ចេញទេពកោសល្យតាមរយៈការបញ្ចេញស្នាដៃ។ ជាលទ្ធផលកាលពីថ្ងៃទី០៤ ខែឧសភា នេះ កម្មវិធីបានរកឃើញជ័យលាភីលេខ១ដែលបានទៅលើវិចិត្រករវ័យក្មេងមួយរូបនោះគឺ ងួនឡេង ម៉េងក័ង។
បរិយាយពីអារម្មណ៍រំភើបមិនទាន់បាត់នៅឡើយ ម៉េងក័ង បានរៀបរាប់មកកាន់សូវរីនថា “ខ្ញុំពិតជារំភើបចិត្តណាស់ ក្រោយដឹងថារូបខ្ញុំបានឈ្នះការប្រកួតស្នាដៃនេះ ព្រោះពេលប្រកួតខ្ញុំមិនរំពឹងថាអាចទទួលបានលទ្ធផលបែបនេះឡើយ។ អ្វីដែលសំខាន់អ្នកចូលរួមប្រកួតសុទ្ធសឹងតែមានស្នាដៃខ្លាំង វាធ្វើឲ្យខ្ញុំនឹកស្មានមិនដល់ រំភើបរកពាក្យអ្វីនិយាយពុំបាន។”
ម្ចាស់ជ័យលាភីបានបង្ហើបដែរថា មូលហេតុដែលសម្រេចចិត្តចូលរួមប្រកួតកម្មវិធីនេះ ក៏ដោយសារតែការស្រលាញ់ផ្នែកសិល្បៈគំនូរ ជាពិសេសគឺសម្បត្តិវប្បធម៌តែម្តង។ ម្យ៉ាង នេះជាឱកាសមួយដែលអាចបញ្ចេញសមត្ថភាពរបស់ខ្លួន ។ ហេតុផលសំខាន់ទៀតនោះគឺដើម្បីទទួលបានបទពិសោធន៍ ព្រោះបើឈ្នះអាចនឹងមានគេស្គាល់ស្នាដៃច្រើន។ ចំណែកឯប្រាក់រង្វាន់ក៏អាចយកមកផ្គត់ផ្គង់ការសិក្សាផងដែរ។
តាមរយៈគំនូរមួយផ្ទាំងដែលលម្អិតច្បាស់ទាំងក្បាច់ និងរូបរាង ម៉េងក័ង បានចំណាយពេលធ្វើត្រឹមតែ១សប្តាហ៍ប៉ុណ្ណោះ ដោយចាប់ផ្តើមពីការគូរព្រាងនៅលើកំព្យូរទ័រ រួចទើបសម្រេចគូរនៅលើក្រដាស។ គំនូរនេះបានច្បិចសិល្បៈគូរបែប Doodle មកបំបែកបញ្ចូលជាមួយការប្រើក្បាច់ខ្មែរ និងលាយជាមួយការប្រើពណ៌ទឹក។ លក្ខណៈពិសេសនៃគំនូរគឺត្រូវបានគូរដោយការប្រើប៊ិកពណ៌ខ្មៅ និងលម្អិតផ្ចិតផ្ចង់ជាមួយចំណុចតូចៗមានសុស មានស្កះ មានរង្វើល រហូតបង្កើតជាស្រមោល ជារាងរៅយ៉ាងល្អវិចិត្រ។ ត្រង់ចំណុចនេះ ម៉េងក័ង និយាយដែរថា ការគូរចំណុចអុចៗបង្កើតជារូបរាងនេះ បើចុចខុសតែបន្តិចនឹងធ្វើឲ្យខូចរូបតែម្តង។ ដូច្នេះវាទាមទារឲ្យមានភាពអត់ធ្មត់ខ្លាំងបំផុត។
ជាមួយគំនូរផ្តោតលើប្រធានបទបង្ហាញពីសម្បត្តិវប្បធម៌អរូបីទាំង៥ ម៉េងក័ង បានប្រើគំនិតច្នៃប្រតិដ្ឋដោយគិតចម្បងទៅតាមលំដាប់ទម្រង់សិល្បៈ តួយ៉ាង ល្ខោនស្រមោលស្បែកធំ របាំក្បាច់បុរាណខ្មែរ និងល្ខោនខោលវត្តស្វាយអណ្តែត ដែលសុទ្ធសឹងស្ថិតក្នុងទម្រង់សិល្បៈខ្ពង់ខ្ពស់ ម្ចាស់ស្នាដៃរូបនេះសម្រេចគូរដាក់នៅខាងលើ។ ចំណែកចាប៉ីដងវែងគេលេងនៅលើឆាក និងអង្គុយលេងលើក្តារងឿ គូរដាក់នៅបន្ទាប់ រីឯល្បែងទាញព្រ័ត្រដាក់នៅខាងក្រោមគេ ដោយហេតុថាគេលេងនៅផ្ទាល់នឹងដី។
ឆ្លងកាត់បទពិសោធន៍រួចមក ម៉េងក័ង ចែករំលែកថា “ការធ្វើអ្វីមួយមិនមែនសុទ្ធតែទទួលជោគជ័យឬសម្រេចជាលទ្ធផលភ្លាមៗនោះទេ គឺត្រូវចេះអត់ធ្មត់ និងសិក្សាពីកំហុសដែលនាំឲ្យខ្លួនយើងបរាជ័យ។ ដូចជារូបខ្ញុំពីមុនប្រឡងស្នាដៃអ្វីក៏មិនទទួលបានលទ្ធផលល្អដែរ ដូច្នេះហើយទើបខ្ញុំកែតម្រូវចំណុចដែលខ្វះខាត និងបំពេញវាបន្ថែម។ ហើយខ្ញុំក៏សូមអរគុណដល់ក្រុមគ្រួសារដែលតែងតែលើកទឹកចិត្តនូវអ្វីដែលខ្ញុំកំពុងធ្វើ វាជាកម្លាំងចិត្តដ៏ធំសម្រាប់ខ្ញុំ។”
គួរឲ្យដឹងដែរថា កន្លងមកនិស្សិតដែលសិក្សាជំនាញផ្នែកគំនូរវិចិត្រកម្មរូបនេះក៏ធ្លាប់បានចូលរួមប្រកួតស្នាដៃនៅក្នុងកម្មវិធីផ្សេងៗផងដែរ ដូចជាកម្មវិធី «white canvas Cambodia»និង ការប្រកួតស្នាដៃ «រចនាឯកសណ្ឋាននិស្សិត» ជាដើម៕
Article by SOUNG SOKSAN
