ចាន់ ទេពខេមរិន្ទ ប្រមូលជីវប្រវត្តិនិងស្នាដៃបុគ្គលល្បីៗចងក្រងជាឯកសារសម្រាប់អ្នកជំនាន់ក្រោយ
NEWS 2 years agoអ្នកនិពន្ធសៀវភៅជំនាន់ថ្មីជាច្រើនរូបបានបង្ហាញស្នាដៃរបស់ខ្លួនយ៉ាងផ្ចិតផ្ចង់ប្រកបដោយអត្ថន័យដ៏ជ្រាលជ្រៅ ដើម្បីធ្វើឲ្យអ្នកអានកាន់តែស្វែងយល់ពីកត្តាមួយចំនួនទាក់ទងទៅនឹងទិដ្ឋភាពសង្គមបច្ចុប្បន្ន ក៏ដូចជាជីវប្រវត្តិរបស់បុគ្គលឆ្នើមដែលជាធនធានកម្រដែលជាគំរូដ៏អស្ចារ្យសម្រាប់យុវជនជំនាន់ក្រោយធ្វើតម្រាប់តាមផងដែរ។ ជាក់ស្តែង អ្នកនិពន្ធសៀវភៅវ័យក្មេងមួយរូបមកពីខេត្តសៀមរាបបានធ្វើការស្រាវជ្រាវពីប្រភពព័ត៌មានផ្លូវការផ្សេងៗទាក់ទងនឹងជីវប្រវត្តិ និងស្នាដៃរបស់បុគ្គលឆ្នើមរបស់កម្ពុជាមួយចំនួនដែលមនុស្សជំនាន់ថ្មីភាគច្រើនស្ទើរតែគ្មានអ្នកស្គាល់នោះឡើយ។
យុវជន ចាន់ ទេពខេមរិន្ទ និស្សិតថ្នាក់មូលដ្ឋាន សិក្សាលើមុខជំនាញស្ថាបត្យកម្មនៅក្នុងសាកលវិទ្យាល័យអកឡេន នៃប្រទេសនូវែលសេឡង់ (University of Auckland located in New Zealand) ជាអ្នកនិពន្ធជាន់ថ្មីដែលបានសរសេរពីជីវប្រវត្តិសង្ខេបរបស់បុគ្គលឆ្នើមដែលបានផ្លាស់ប្តូរមុខមាត់ថ្មីរបស់កម្ពុជា។ ក្រោយពីការបោះពុម្ពផ្សាយសៀវភៅកម្រាស់ ៥៦ ទំព័រដែលមានពីរភាសាពោលភាសាខ្មែរ និងភាសាអង់គ្លេស អមដោយគំនូររូបភាពគូរដោយយុវជនរូបនេះផ្ទាល់ គេសង្កេតឃើញថាមានការគាំទ្រអានសៀវភៅជាច្រើនពីស្រទាប់យុវវ័យ ជាពិសេស ស្ថិតនៅខេត្តសៀមរាបដែលជាកន្លែងកំណើតរបស់យុវជន ខេមរិន្ទ ផ្ទាល់តែម្តង។ ទន្ទឹមនឹងការពិភាក្សានៃដំណើរដើមទងជាមួយនឹងអ្នកនិពន្ធវ័យ២០ឆ្នាំរូបនេះបានឲ្យដឹងផងថាការនិពន្ធដំបូងរបស់ខ្លួនផ្តើមចេញមិត្តភក្តិដែលបាននិពន្ធសៀវភៅជាភាសាអង់គ្លេសបណ្តាលចិត្តរបស់ខ្លួនប្រឡូកក្នុងវិស័យនេះតែម្តង។ នៅក្នុងអំឡុងពេលនោះដែរ អ្នកនិពន្ធវ័យក្មេងនេះបានបង្ហើបឲ្យដឹងផងថា «ខ្ញុំមានផលវិបាកគួរសម ជាពិសេស ពេលដែលខ្ញុំធ្វើការទំនាក់ទំនងដើម្បីសាកសួរព័ត៌មានពីបុគ្គលម្នាក់ ទៅបុគ្គលម្នាក់ទៀត ហើយមួយវិញទៀតខ្ញុំត្រូវមានការប្រុងប្រយ័ត្នជាមួយនឹងឆ្នាំកំណើតរបស់គាត់ ប្រសិនបើខ្ញុំពុំដឹងច្បាស់ពីឆ្នាំទេនោះ ខ្ញុំនឹងប្រើទសវត្សរ៍ជំនួសវិញ។» ជាការពិតណាស់ ស្នាដៃរបស់ឥស្សរជនខ្មែរដែលត្រូវបានចងក្រង និងធ្វើការសង្ខេបត្រួសៗមានចំនួន២០ម្នាក់ដែលមកពីវិស័យផ្សេងៗគ្នា តួយ៉ាង ស្ថិតនៅក្នុងវិស័យខ្សែភាពយន្តរបស់កម្ពុជាក្នុងទសវត្សរ៍ឆ្នាំ ៦០ អ្នកស្រី ឌី សាវ៉េត ជាតារាសម្តែងស្រីឆ្នើមម្នាក់ពីយុគសម័យមាសជាដើម។ មិនត្រឹមតែប៉ុណ្ណោះ សៀវភៅដែលមានចំណងជើងថា «បុគ្គលឆ្នើមរបស់កម្ពុជា» ឬ “Extraordinary People of Cambodia” ក៏បានរៀបរាប់ពីជីវប្រវត្តិសង្ខេបជនបរទេស ៣ រូបដែលជាគំរូដ៏ល្អឯកសម្រាប់ប្រជាជនខ្មែរដូចជា៖ លោកស្រី អេនជើលីណា ជោលី លោក ស្កុត នីសិន និងលោកវេជ្ជបណ្ឌិត បេអាត រិចន័រ ដូច្នេះដែរ។ យ៉ាងណាមិញ ក្រោយពីបញ្ចប់ការបោះពុម្ពផ្សាយជាលើកដំបូងរបស់ខ្លួន យុវជន ចាន់ ទេពខេមរិន្ទ ក៏បានឲ្យដឹងថានឹងពុំបន្តស្នាដៃនិពន្ធរបស់ខ្លួនទៀតនោះទេ ក៏ព្រោះតែមានកត្តាមួយចំនួន ម៉្យាងវិញទៀត ខេមរិន្ទ ត្រូវបន្តការសិក្សារបស់ខ្លួននាក្រៅប្រទេសឆាប់ៗនេះ។
គួរបញ្ជាក់ផងដែរថា «បុគ្គលឆ្នើមរបស់កម្ពុជា» ឬ “Extraordinary People of Cambodia” បានបញ្ចប់ការចងក្រង និងបោះពុម្ពផ្សាយសម្រេចជាផ្លូវកាលើកដំបូងនៅចុងឆ្នាំ២០២១ ដែលមានចំនួនត្រឹមតែ ៣០០ ច្បាប់ប៉ុណ្ណោះ ដោយបច្ចុប្បន្នអ្នកអាចជាវស្ថិតនៅ «ស្រឡាញ់សៀវភៅ» ផងដែរ៕
Article by PAN SIVLY
Image Courtesy: ចាន់ ទេពខេមរិន្ទ