ជ័យលាភីពានរង្វាន់គ្រូបង្រៀនល្អគណិតវិទ្យាថ្នាក់បឋមសិក្សាចំណាត់ថ្នាក់លេខ១
NEWS 2 years agoក្នុងទិវាគ្រូបង្រៀន ៥ តុលា ឆ្នាំកន្លងទៅ គ្រូបង្រៀនថ្នាក់បឋមសិក្សានៅសាលាបឋមសិក្សាក្នុងខេត្តកំពង់ឆ្នាំងមួយរូបទទួលបានកិត្តិយសដ៏ធំធេងក្នុងអាជីពវិជ្ជាជីវៈផ្នែកអប់រំរបស់លោកស្រីគួរជាទីមោទកភាពក្រៃលែងសម្រាប់សាលាផ្ទាល់ក៏ដូចជាសម្រាប់ខេត្តកំពង់ឆ្នាំងទាំងមូលផងដែរ ព្រោះមិនមែននរណាៗក៏អាចទទួលបាននូវពានរង្វាន់ពីនាយករដ្ឋមន្រ្តីដ៏ខ្ពង់ ខ្ពស់មួយនេះទេ។ តើម្ចាស់ពានរង្វាន់គ្រូបង្រៀនល្អផ្នែកគណិតវិទ្យាចំណាត់ថ្នាក់លេខ១រូបនេះមានប្រវត្តិការសិក្សា និងបទពិសោធន៍បង្រៀនដូចម្តេចខ្លះទម្រាំបានក្លាយជាជ័យលាភីប្រចាំឆ្នាំ? តើគាត់មានការប្តេជ្ញាចិត្តចំពោះអាជីពនេះយ៉ាងណាដែរបន្ទាប់ពីទទួលបានពានរង្វាន់ខាងលើ? ជួបសម្ភាសន៍ជាមួយអ្នកគ្រូ ឈុំ ណៃគា ម្ចាស់ជ័យលាភីផ្ទាល់ នៅសាលាបឋមសិក្សាសាលាលេខប្រាំ ក្នុងភូមិសាលាលេខប្រាំ ឃុំអូរប្ញស្សី ស្រុកកំពង់ត្រឡាច ខេត្តកំពង់ឆ្នាំង ដែលជាកន្លែងអ្នកគ្រូកំពុងបំពេញការងារសព្វថ្ងៃនេះ អ្នកគ្រូបានសម្តែងក្តីសោមនស្សរីករាយប្រកបដោយស្នាមញញឹម “នេះគឺជាលើកទីមួយហើយដែលនាងខ្ញុំទទួលបានពានរង្វាន់សម្ដេចតេជោ សែន ក្នុងវិស័យអប់រំ។ នាងខ្ញុំមានអារម្មណ៍រំភើប និងសប្បាយរីករាយខ្លាំងណាស់ដែលបានក្លាយជាម្ចាស់ជ័យលាភីគ្រូបង្រៀនល្អ គណិតវិទ្យា ថ្នាក់ទី២ ចំណាត់ថ្នាក់លេខ១”។ អមដោយបរិយាកាសស្រស់បំព្រងនៃ បរិស្ថានសាលាបឋមសិក្សាសាលាលេខប្រាំ ក៏ដូចជាភាពស្រស់ស្អាតនិងមានសណ្តាប់ធ្នាប់របៀបរៀបរយនៃថ្នាក់បង្រៀនរបស់អ្នកគ្រូផ្ទាល់ អ្នកគ្រូថ្នាក់ទី២ វ័យ៣០ឆ្នាំ រូបនេះ បានបញ្ជាក់ប្រាប់ពីមូលហេតុដែលនាំឲ្យលោកស្រីទទួលបានជ័យ លាភីនេះថា ការប្រកួតនេះ ជាបឋមត្រូវឆ្លងកាត់ការចុះវាយតម្លៃការបង្រៀនពីសំណាក់នាយិកាសាលាដើម្បីដាក់ពិន្ទុ មុននឹងឈានដល់ការវាយតម្លៃជាបន្តបន្ទាប់តាមលំដាប់ចាប់តាំងពីការិយាល័យអប់រំស្រុក មន្ទីរអប់រំខេត្ត រហូតឈានដល់ថ្នាក់ក្រសួងអប់រំ យុវជន និងកីឡា នៅជុំផ្តាច់ព្រ័ត្រ។ ដើម្បីបានក្លាយជាបេក្ខភាព អ្នកគ្រូត្រូវត្រៀមខ្លួនរួចជាស្រេចគ្រប់ជ្រុងជ្រោយ ទាំងការរៀបចំថ្នាក់រៀន ការអង្គុយរបស់សិស្ស ការងាររដ្ឋបាល ការងារបរិស្ថាន ទំនាក់ទំនងល្អជាមួយគ្រប់ភាគីពាក់ព័ន្ធទាំងអស់ ជាពិសេសការបង្រៀនតែម្ដង។
អ្នកគ្រូបានពន្យល់បន្ថែមឲ្យយើងដឹងថា នៅក្នុងថ្នាក់របស់អ្នកគ្រូ ពីមុនមានបញ្ហាខ្វះខាតសម្ភារមួយចំនួន តែឥឡូវនេះ ក្រោមកិច្ចដឹកនាំគ្រប់គ្រងរបស់អ្នកគ្រូ បញ្ហាទាំងនេះត្រូវបានដោះស្រាយរួចហើយ ដោយមានការចូលរួមពីសំណាក់អង្គការដៃគូ «Save the Children»និងមាតាបិតាសិស្សដែលបានជួយផ្ដល់ជាទូរដាក់សម្ភារបង្រៀន រៀបការ៉ូ បំពាក់កង្ហារ ដែលធ្វើឲ្យការរៀននិងបង្រៀនកាន់តែប្រសើរ។ នាងខ្ញុំប្ដេជ្ញាចិត្តនឹងខិតខំសិក្សាស្រាវជ្រាវរកវិធីថ្មីៗ ដើម្បីបង្រៀនកូនៗឱ្យក្លាយជាធនធានមានតម្លៃសម្រាប់ប្រទេសជាតិ។ “ចំណុចលេចធ្លោរបស់នាងខ្ញុំ គឺការបង្រៀនដោយយកចិត្តទុកដាក់ ការជួយសិស្សរៀនយឺត ការប្រើប្រាស់សម្ភារងាយៗដែលមានក្នុងជីវភាពរស់នៅរបស់កុមារជាក់ស្ដែង និងការទំនាក់ទំនងល្អជាមួយមាតាបិតាសិស្ស ព្រមទាំងបានអញ្ជើញមាតាបិតាសិស្សមកចូលរួមប្រជុំទាក់ទងនិងការសិក្សារបស់កូនរបស់គាត់ និងលើកទឹកចិត្តឲ្យគាត់បង្រៀនកូននៅផ្ទះបន្ថែម ” អ្នកគ្រូបានសង្កត់ធ្ងន់ពីសមត្ថភាពការងារដែលជាកត្តាជំរុញជោគជ័យនេះ។
ចំពោះប្រវត្តិរូបរបស់មន្រ្តីអប់រំដ៏ឆ្នើមដែលមានដើមកំណើតចេញពីទឹកដីកំពង់ឆ្នាំងនេះវិញ លោកស្រី កើតនៅថ្ងៃទី១៥ ខែតុលា ឆ្នាំ១៩៩១ នៅភូមិឧកញ៉ាប៉ាង ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង។ គាត់បានចាប់ផ្តើមការសិក្សានៅសាលាបឋមសិក្សាបន្ទាយលង្វែក ចន្លោះឆ្នាំ១៩៩៩-២០០៤។ បន្ទាប់មក គាត់បានបន្តការសិក្សានៅអនុវិទ្យាល័យ លង្វែក (២០០៤-២០០៧) និង វិទ្យាល័យ ហ៊ុន សែន កំពង់ត្រឡាច (២០០៧-២០១០)។ បន្ទាប់មកទៀត គាត់បានឆ្លងកាត់ការបណ្តុះបណ្តាលជំនាញអប់រំនៅសាលាគរុកោសល្យនិងវិក្រឹតការខេត្តកំពង់ឆ្នាំង អំឡុងឆ្នាំ២០១០-២០១២។ នៅឆ្នាំ ២០១៣ គាត់បានទទួលវិញ្ញាបនបត្រកុំព្យូទ័ររដ្ឋបាលពីសាលាភាសាអន្តរជាតិ និងកុំព្យូទ័រ។ នៅឆ្នាំ២០១៧ គាត់ បានបញ្ចប់ការសិក្សាថ្នាក់បរិញ្ញាបត្រឯកទេសជីវវិទ្យា នៅឯសាកលវិទ្យាល័យឯកទេសនៃកម្ពុជា។
ចុះអ្នកគ្រូទទួលបានអ្វីខ្លះបន្ទាប់ពីជាប់ជ័យលាភីនេះ? អ្នកគ្រូបានឆ្លើយតបថា នៅពេលដែលក្រសួងអប់រំ យុវជន និងកីឡា បានប្រកាសផ្សាយលទ្ធផលតាមរយៈទំព័រហ្វេសប៊ុកផ្លូវការរបស់ក្រសួងអប់រំនោះ ទាំងមាតាបិតាសិស្ស លោកគ្រូអ្នកគ្រូ គណៈគ្រប់គ្រងសាលា ការិយាល័យអប់រំស្រុក មន្ទីរអប់រំខេត្ត សុទ្ធតែបានចូលរួមអបអរសាទរតាមរយៈសារ ការផុសលើគណនេយ្យហ្វេសប៊ុក និងផេក (Page) សាលារៀន ជាដើម។ សម្រាប់ជ័យលាភី អ្នកគ្រូទទួលបានពានជ័យ លាភីចំនួនមួយគ្រឿង ព្រមទាំងទឹកប្រាក់ចំនួនប្រាំលានរៀល។ ក្នុងឱកាសនេះដែរ អ្នកគ្រូក៏បានប្ដេជ្ញាចិត្តយ៉ាងមុតមាំថានឹងខិតខំសិក្សាស្រាវជ្រាវរកវិធីថ្មីៗដើម្បីបង្រៀនសិស្សានុសិស្សទាំងអស់ឲ្យក្លាយជាធនធានមានតម្លៃសម្រាប់ប្រទេសជាតិយ៉ាងពិតប្រាកដ។
ជាចុងក្រោយ អ្នកគ្រូ ឈុំ ណៃគា សូមអរគុណដល់លោកគ្រូ អ្នកគ្រូ គណៈគ្រប់គ្រងសាលា ការិយាល័យអប់រំស្រុក និងមន្ទីរអប់រំខេត្តកំពង់ឆ្នាំង ដែលបានផ្ដល់អនុសាសន៍ល្អៗនិងលើកទឹកចិត្តចំពោះអ្នកគ្រូនាពេលកន្លងមក។ ក្នុងនាមជាអ្នកអប់រំដ៏ជោគជ័យម្នាក់ អ្នកគ្រូក៏សូមឲ្យលោកគ្រូអ្នកគ្រូទាំងអស់ធ្វើការតាំងចិត្តខិតខំបង្រៀនសិស្សដោយបេះដូង ហើយអ្នកគ្រូក៏សូមជំរុញលើកទឹកចិត្តលោកគ្រូអ្នកគ្រូឲ្យចូលរួមប្រកួតប្រជែងគ្រូបង្រៀនល្អបន្តនាឆ្នាំក្រោយៗទៀត។ ទន្ទឹមនឹងនេះ សូមលើកទឹកចិត្តមាតាបិតាសិស្សឲ្យជួយជំរុញនិងបង្រៀនកូនៗបន្ថែមនៅផ្ទះដើម្បីឲ្យការសិក្សារបស់ពួកគេកាន់ តែប្រសើរឡើងទ្វេដង៕
Article by SRIN SOKMEAN