កាលពីខែតុលាកន្លងទៅថ្មីៗនេះ ស្ទូឌីយ៉ូគំនិតច្នៃប្រឌិតកម្ពុជាហ្វារ (Phare Creative Studio) បានរៀបចំយុទ្ធនាការលើកកម្ពស់ការយល់ដឹងផ្នែកបរិស្ថានដល់កុមារជាង១ពាន់នាក់នៅក្នុងខេត្តបាត់ដំបង តាមរយៈការបង្កើតកម្មវិធីល្ខោនទេសចរណ៍ (theatre tour) និងសិក្ខាសាលានៅតាមសាលារៀន និង អង្គការក្រៅរដ្ឋាភិបាលផ្សេងៗនៅក្នុងខេត្ត ចាប់ដៃគូសហការជាមួយអង្គការល្ខោនគំនិត (Lakhon Komnit Organization) ដែលជាក្រុមឯកទេសមិនសំដៅស្វែងរកប្រាក់ចំណេញក្នុងគម្រោងល្ខោននិយាយសហគមន៍។
ល្ខោនទេសចរណ៍នេះមានគោលបំណងអប់រំកុមារអំពីទំនាក់ទំនងដោយផ្ទាល់រវាងការប្រើប្រាស់ប្លាស្ទិកប្រចាំថ្ងៃ និងផលប៉ះពាល់របស់វាទៅលើបរិស្ថានសមុទ្រជាកន្លែងចុងក្រោយដែលប្លាស្ទិកធ្លាក់ទៅដល់ ក្រោយពីមានការបោះចោលពាសវាលពាសកាល។ វាបង្កឲ្យមានហានិភ័យដល់សត្វក្នុងទឹក និងសត្វមានជីវិតទាំងអស់។
ល្ខោនទេសចរណ៍នេះបានសម្តែងនៅសាលាបញ្ញាសាស្រ្ត សាលាសុវណ្ណភូមិ សាលាយូអេសអេ សាលាហ្វារពន្លឺសិល្បៈ អង្គការសកម្មភាពកុមារដើម្បីការអភិវឌ្ឍន៍ និងអង្គការអនាគតកុមារអន្តរជាតិ ដោយមានកុមារជាង១ពាន់នាក់ មានអាយុពី៦ដល់១២ឆ្នាំ ចូលរួមទស្សនា។ ការសម្តែងល្ខោននេះមានចំណងជើងថា «មិត្តសំឡាញ់» និងសិក្ខាសាលាជាបន្តបន្ទាប់ផ្សេងៗទៀត ដែលបង្រៀនកុមារទាំងនោះឲ្យចេះធ្វើរូបត្រីចេញពីរបស់ដែលគេប្រើប្រាស់ម្តងហើយបោះចោលនៅតាមផ្ទះ ស្របពេលដែលពួកគេអាចស្វែងយល់បន្ថែមអំពីគោលការណ៍ 4Rs គឺ បដិសេធប្លាស្ទិក ( Refuse ) កាត់បន្ថយប្លាស្ទិក (Reduce) ប្រើឡើងវិញ (Reuse) និងកែច្នៃឡើងវិញ (Recycle)។
រឿង «មិត្តសំឡាញ់» បង្ហាញអំពីមិត្តសំឡាញ់ទាំងពីរ គឺ កុមារម្នាក់ និង ត្រីមួយក្បាលដែលមានជីវិតរងការគំរាមកំហែងដោយសារកាកសំណល់ប្លាស្ទិក។ ល្ខោននេះបានរំលេចឲ្យឃើញជារូបសត្វត្រីអាយ៉ងធ្វើដោយដៃ និងបិសាចប្លាស្ទិកដែលត្រូវបានសម្តែងបែបកំប្លុកកំប្លែងយ៉ាងប៉ិនប្រសប់ និងរស់រវើក ដើម្បីបញ្ជូនសារសំខាន់ៗនៃយុទ្ធនាការនេះ និងបង្កើតឲ្យមានទំនាក់ទំនងទៅវិញទៅមកជាមួយទស្សនិកជនវ័យក្មេង។ សាច់រឿងបានសបញ្ជាក់អំពីការផ្លាស់ប្តូរការសម្រេចចិត្តរបស់តួអង្គកុមារដើម្បីជួយសង្រ្គោះសត្វត្រី។ រឿងនេះបានជួយបំផុសគំនិតដល់ទស្សនិកជនថាប្រសិនបើមនុស្សបញ្ឈប់ការបំពុលទឹកដោយកាកសំណល់ប្លាស្ទិក ត្រីនឹងត្រូវបានសង្រ្គោះដោយជោគជ័យ ហើយសាច់រឿងក៏នឹងត្រូវបានបញ្ចប់ដោយរីករាយដែរ៕
ទាំងអស់គ្នា យើងរួមគ្នាប្រយុទ្ធនឹងបិសាចប្លាស្ទិក និងប្រយុទ្ធប្រឆាំងនឹងការបំពុលប្លាស្ទិក!