នៅព្រឹកថ្ងៃទី០៩ ខែធ្នូ ឆ្នាំ២០២២ ក្រុមហ៊ុនអាកាសចរណ៍ AirAsia Aviation Group Limited (AAAGL) បានរៀបចំសន្និសីទកាសែតស្តីពីការចុះហត្ថលេខាផ្លូវការលើកិច្ចព្រមព្រៀងបណ្តាក់ទុនជាមួយនឹងក្រុមហ៊ុន Sivilai Asia ស្ថិតនៅសណ្ឋាគារ Rosewood Phnom Penh ក្នុងការបង្កើតក្រុមហ៊ុនអាកាសចរណ៍ថ្មីមួយប្រចាំប្រទេសកម្ពុជានោះគឺ AirAsia Cambodia ដែល ជាក្រុមហ៊ុនអាកាសចរណ៍ថ្មីមួយផ្តល់នូវតម្លៃសមរម្យសម្រាប់ការធ្វើដំណើរហោះហើរ។ ជាក់ស្តែង ក្រុមហ៊ុនអាកាសចរណ៍ថ្មីនេះនឹងជួយជំរុញសេដ្ឋកិច្ចកម្ពុជា ក៏ដូចជាការផ្សារភ្ជាប់ទៅនឹងសេដ្ឋកិច្ចអន្តរជាតិពីបណ្តាប្រទេសផ្សេងៗទៀតដោយរួមមាន៖ ប្រទេសអាស៊ាន អាស៊ីខាងជើង ហើយនឹងប្រទេសដទៃជាច្រើន។ យ៉ាងណាមិញ ក្រុមហ៊ុនអាកាសចរណ៍ AirAsia Cambodia ក៏មានគោលបំណងនិងជំរុញបន្ថែមទៀតនូវក្នុងវិស័យឧស្សាហកម្មអាកាសចរណ៍ និងទេសចរណ៍ក្នុងកម្ពុជាឲ្យកាន់តែមានភាពរីកចម្រើន និងនាំនូវតម្លៃសមរម្យដ៏ប្រាកដមួយដែលតម្រូវនឹងទីផ្សារកម្ពុជា ក៏ដូចជានាំមកនូវឱកាសការងារផ្សេងៗបន្ថែមទៀតផងដែរ។ ទន្ទឹមនឹងនេះ លោក Tony Fernandes ដែលជាស្ថាបនិករបស់ក្រុមហ៊ុន AirAsia បានមានប្រសាសន៍ឲ្យដឹងនៅក្នុងសន្និសីទកាសែតសារព័ត៌មានថា «យើងនៅតែបន្តផ្តោតលើអាស៊ានដែលយើងស្គាល់ច្បាស់ជាងគេ និងខ្លាំងជាងគេបំផុត។ រីឯប្រទេសកម្ពុជា គឺជាប្រទេសអាស៊ានទី៥ ហើយដែលយើងកំពុងបន្តដំណើរឆ្ពោះទៅមុខដែលជាប្រទេសឈានមុខគេជាចំណុចស្នូលនៃកំណើនសេដ្ឋកិច្ចសម្រាប់ប្រទេសអាស៊ាន។ AirAsia គឺជាទ្រព្យ និងមានតម្លៃមួយដែលមិនអាចកាត់ថ្លៃបាន ហើយវានឹងក្លាយជាបណ្តាញមួយបន្ថែមទៀតដែលនឹងតភ្ជាប់ឲ្យកាន់តែទូលំទូលាយនៅក្នុងប្រទេសកម្ពុជា និងក្នុងតំបន់ដទៃទៀតដូចជាប្រទេសចិន ឥណ្ឌា និងអាស៊ីខាងជើង។» យ៉ាងណាមិញ លោក ណម វិស្សុត ដែលជានាយកគ្របគ្រងរបស់ Sivilai Asia មានប្រសាសន៍ដូច្នេះថា «ប្រទេសកម្ពុជាក្នុងនាមជាប្រទេសមួយក្នុងចំណោមប្រទេសដំបូងគេដែលបើកការធ្វើដំណើរអន្តរជាតិដោយគ្មានការដាក់ឲ្យនៅដាច់ដោយឡែកកាលពីអំឡុងខែវិច្ឆិកា ឆ្នាំ២០២១ កម្ពុជាបាននាំមុខគេក្នុងការស្តារការធ្វើដំណើរតាមអាកាសរបស់អាស៊ានក្រោយជំងឺកូវីដ ដោយមានប្រទេសផ្សេងទៀតក្នុងតំបន់អនុវត្តតាម។ ថ្ងៃនេះ យើងមានមោទកភាពក្នុងការក្លាយជាកាតាលីករសម្រាប់ក្រុមហ៊ុនអាកាសចរណ៍មួយដែលមានតម្លៃទាបថ្មីដែលកំពុងដំណើរការក្នុងប្រទេសកម្ពុជាផងដែរ។»
គួរជម្រាបផងដែរថា ក្រុមហ៊ុនអាកាសចរណ៍ AAAGL នឹងដំណើរការជើងហោះហើរចំនួន ៥ មកកាន់ប្រទេសកម្ពុជាពីកូឡាឡាំពួរទៅកាន់ខេត្តសៀមរាប និងរាជធានីភ្នំពេញ ពី Penang ទៅភ្នំពេញ (ចាប់ផ្តើមថ្ងៃទី 3 ខែមករា ឆ្នាំ 2023) ព្រមទាំងពីបាងកក (ដុនមឿង) ទៅខេត្តសៀមរាប និងភ្នំពេញ។ ដោយឡែក ចាប់តាំងពីចូលមកក្នុងទីផ្សារកម្ពុជានៅអំឡុងឆ្នាំ២០០៥ ក្រុមហ៊ុន AirAsia បានដឹកភ្ញៀវចូលមកកម្ពុជាជាង១០លាននាក់៕
Advertising Article