Sovrin
Sovrin
ការ៉ាតេ គឺជាក្បាច់គុនមួយប្រភេទដែលមានដើមកំណើតនៅប្រទេសជប៉ុន ជាក្បាច់គុនប្រយុទ្ធដោយដៃទទេ ប្រយុទ្ធដោយមិនប្រើអាវុធ ហើយចំណុចពិសេស និងសំខាន់នោះគឺ ចាប់ផ្តើមដោយការគោរព និងបញ្ចប់ដោយការគោរពដូចគ្នា។ ថ្ងៃនេះផងដែរ សូវរីន បានធ្វើកិច្ចជំនួបជាមួយកីឡាករខ្មែរមួយរូបដែលនឹងតំណាងឲ្យកម្ពុជាចូលរួមការប្រកួតកីឡាការ៉ាតេ មកបង្ហើបអំពីការហ្វឹកហាត់ ការត្រៀមខ្លួន ក៏ដូចជាការប្តេជា្ញចិត្ត ក្នុងការប្រកួតកីឡាអាស៊ីអាគ្នេយ៍លើកទី៣២នាពេលខាងមុខនេះផងដែរ។
លោក ហូ ហេង អាយុ ២៨ឆ្នាំ មានស្រុកកំណើតមកពីខេត្តកំពង់ធំ។ បើនិយាយពីដំណើរដើមទងដែលបានក្លាយខ្លួនជាកីឡាករជម្រើសជាតិការ៉ាតេវិញ លោកបានរំលឹកឡើងថា “កាលនៅរៀនថ្នាក់វិទ្យាល័យ អំឡុងឆ្នាំ២០១២ ខ្ញុំបានចូលហ្វឹកហាត់ការ៉ាតេ នៅក្លឹបមួយដែលមានឈ្មោះថា មន្ទីរស្ថាបនាខ្សាច់កណ្តាល។ ដោយមានចិត្តស្រលាញ់កីឡាការ៉ាតេ និងការតាំងចិត្តយ៉ាងមុតមាំ ធ្វើឲ្យខ្ញុំបានខិតខំហ្វឹកហាត់រហូតទទួលបានលទ្ធផលល្អក្នុងការប្រកួត។ រហូតដល់ឆ្នាំ២០១៩ ខ្ញុំបានដាក់ពាក្យប្រកួតប្រជែងជ្រើសរើសជើងឯកថ្នាក់ជាតិទូទាំងប្រទេស ហើយខ្ញុំបានជាប់ចំណាត់ថ្នាក់លេខ១ និងទទួលបានមេដាយមាស។ ក្រោយមកសហពន្ធការ៉ាតេកម្ពុជាបានជ្រើសរើសឲ្យខ្ញុំចូលមកក្រុមជម្រើសជាតិតាំងពីពេលនោះមក។” ក្រោយចូលជាកីឡាករជម្រើសជាតិជាផ្លូវការ កន្លងមកកីឡាករ ហូ ហេង ក៏ធ្លាប់បានចូលរួមក្នុងការប្រកួតធំៗជាច្រើនដងដូចជា ការប្រកួត SEA Games ការប្រកួតនៅប្រទេសហ្វីលីពីន ប្រទេសវៀតណាម ឥណ្ឌូនេស៊ី កាហ្សាស្តង់ប្រទេសអូបេគីស្ថាន និងការប្រកួតចុងក្រោយគឺ កីឡាជាតិលើកទី៣ ដែលទទួលបានចំណាត់ថ្នាក់មេដាយមាសចំនួន២គ្រឿងផងដែរ។
ងាកមកជជីកសួរអំពីការត្រៀមខ្លួនសម្រាប់ចូលរួមការប្រកួត SEA Games ដែលនឹងខិតចូលមកដល់នាពេលខាងមុខនេះវិញ លោកបានប្រាប់ថា បច្ចុប្បន្នគឺលោកកំពុងបោះជំរំហ្វឹកហាត់នៅឯប្រទេសជប៉ុនដែលជាប្រទេសម្ចាស់ក្បាច់គុនការ៉ាតេនេះតែម្តង។ ហើយការហ្វឹកហាត់នៅជប៉ុននេះដែរ គឺជាលើកទី២ហើយ ដែលលើកទី១មានរយៈពេល៣ខែ (ខែមិថុនា ដល់ខែសីហា ឆ្នាំ២០២២) ហើយលើកទី២នេះក៏មានរយៈពេល៣ខែដែរ(ចាប់ពីថ្ងៃទី០១ ខែកុម្ភៈ ដល់ថ្ងៃទី០១ ខែឧសភា ឆ្នាំ២០២៣)។ បើនិយាយពីការហ្វឹកហាត់វិញ ច្បាស់ណាស់ថាវាមិនមែនជារឿងងាយស្រួលឡើយដើម្បីពង្រឹងសមត្ថភាព “ចំពោះការហ្វឹកហាត់វិញ ក្នុងមួយថ្ងៃខ្ញុំខិតខំហ្វឹកហាត់ណាស់ ថ្ងៃខ្លះហាត់រហូតដល់ទៅ៨ម៉ោង ទៅ៩ម៉ោង។ ចំណែកឯការលំបាកក៏មានដែរ ហើយទាមទារឲ្យមានការអត់ធ្មត់ខ្ពស់ ប៉ុន្តែទោះបីជាយ៉ាងណាក៏នៅតែជម្នះ និងព្យាយាមអភិវឌ្ឍសមត្ថភាពអោយកាន់តែខ្លាំងជាងមុខទៀត។” កីឡាករការ៉ាតេ ហូ ហេង បានលើកឡើង។
ចំពោះការប្រកួតស៊ីហ្គេម ដែលកម្ពុជាធ្វើជាម្ចាស់ផ្ទះនាពេលខាងមុខនេះ កីឡាករការ៉ាតេលោក ហូ ហេង ក៏បានប្តេជ្ញាចិត្តយ៉ាងមុតមាំ និងឆ្លេីយទាំងមិនស្ទាក់ថា “ខ្ញុំបានត្រៀមខ្លួនរួចជាស្រេចដើម្បីយកមេដាយជូនជាតិ ខ្ញុំប្តេជ្ញាចិត្តនឹងខិតខំហ្វឹកហាត់ និងព្យាយាមធ្វើឲ្យបានល្អបំផុត ខំឲ្យអស់ពីសមត្ថភាព ព្រោះនេះជាគោលដៅធំសម្រាប់ខ្ញុំរួមទាំងជនរួមជាតិយើងផងដែរ។ ហើយខ្ញុំក៏សូមលើកទឹកចិត្តដល់បងប្អូនកីឡាករ កីឡាការិនីកម្ពុជាយើងដែលត្រៀមនឹងចូលរួមប្រកួតដូចគ្នាថា យើងត្រូវព្យាយាមទាំងអស់គ្នា ហើយតាំងចិត្តឲ្យបានខ្ពស់ ជាពិសេសនោះគឺត្រូវថែទាំសុខភាពឲ្យបានល្អ ព្រោះបើយើងមានទាំងកម្លាំងចិត្ត និងកម្លាំងកាយ យើងនឹងអាចទទួលបានលទ្ធផលល្អក្នុងការប្រកួត”៕
Article by SOUNG SOKSAN
Image Courtesy: ហូ ហេង
