Sovrin
Sovrin
សន្សើមត្រជាក់ធ្លាក់ដោយតំណក់ទឹកភ្លៀងស្បើយកាលពីស្បៃរាត្រី ព្រឹកព្រលឹមអាកាសធាតុថ្ងៃចុងសប្តាហ៍ដូចជាអំណោយផលខុសសព្វមួយដង ដោយនាំយកនូវជំនោររហើយៗលាយឡំភាពបរិសុទ្ធ ស្របគ្នានឹងព្រះសុរិយាលេចខ្លួនចេញមកកម្តៅភពផែនដី ដែលនេះបានរុញច្រានឲ្យយើងមិនរួញរាក្នុងការស្វែងរកកន្លែងណាមួយដើម្បីលម្ហែអារម្មណ៍ជាមួយការពិសាតែកាហ្វេរួមទាំងម្ហូបឈ្ងុយឆ្ងាញ់ជាទុនផ្តល់ថាមពលដល់រាងកាយ និងធ្វើឲ្យអារម្មណ៍ស្រស់ស្រាយផងដែរ។ ពិតប្រាកដណាស់ រាល់ទិសដៅថ្មីឬកន្លែងថ្មី សូវរីនមិនដែលរំលងក្នុងការធ្វើជាមគ្គទេសក៍ណែនាំប្រិយមិត្តឆ្ពោះទៅស្គាល់មិនថាកន្លែងនោះលាក់ខ្លួនពួនសម្ងំនៅម្តុំណាឡើយ។
លាក់ខ្លួនពួនសម្ងំនៅលើដងវិថី១២បេតេ(ផ្លូវតាផុន) ស្ថិតក្នុងសង្កាត់បឹងទំពុន ដូចទៅនឹងឈ្មោះ «ម្លប់» ឬ «Maloop» គឺជាភោជនីយដ្ឋាន ហាងកាហ្វេ បារ និងសួនច្បារសម្រាប់អង្គុយសម្រាកលម្ហែ ក៏ដូចជាកន្លែងកម្សាន្តលក្ខណៈពិកនិក ទីនេះមានការរៀបចំបរិយាកាសបែបធម្មជាតិ អំណោយផលខ្យល់អាកាសរហើយៗស្រស់ស្រាយ ព្រមជាមួយនឹងដើមឈើតូចធំជាច្រើនដើម បានផ្តល់ជាម្លប់ត្រជាក់យ៉ាងត្រឈឹងត្រឈៃ។ ពិតណាស់ មកដល់ទីនេះភ្លាម យើងទទួលបានអារម្មណ៍សម្រាករហ័សភ្លែត នៅបរិវេណផ្លូវចូលមានរុក្ខជាតិយ៉ាងស្រស់ខៀវខ្ចី អមជាមួយស្លាកយីហោ «Maloop» ហាក់កំពុងចាំទទួលស្វាគមន៍ភ្ញៀវដែលអញ្ចើញមកកាន់ទីនេះ។ វត្តមាននៃហាងកាហ្វេនៅជ្រុងខាងស្តាំដៃនៃច្រកចូល ជាមួយនឹងការទទួលយ៉ាងរាក់ទាក់ពីបុគ្គលិកនៅទីនោះ កាន់តែធ្វើឲ្យអារម្មណ៍ស្រស់ស្រាយភ្លែត ហើយក៏មិនភ្លេចឡើយនូវការកុម្មង់ភេសជ្ជៈដែលមានជម្រើសជាច្រើន។ បើក្រឡេកទៅជ្រុងខាងឆ្វេងវិញ លោកអ្នកនឹងប្រទាក់ភ្នែកនឹងសំណង់ផ្ទះវីឡាពណ៌សមួយដែលបន្សល់ទុកតាំងពីទសវត្សរ៍ឆ្នាំ១៩៨០ កំពុងបង្អួតសម្រស់កណ្តាលរុក្ខជាតិបៃតងខ្ចី។
ធ្វើដំណើរចូលទៅខាងក្នុងបានបីជំហានយើងសម្គាល់ឃើញថា ទីនេះមានផ្តល់ជម្រើសអង្គុយក្រេបភេសជ្ជៈ និងទទួលទានអាហារជាច្រើនជម្រើស ជាពិសេសសិល្បៈនៃការរៀបចំកន្លែងអង្គុយតុកៅអីយ៉ាងប្លែកភ្នែក និងស្រស់ស្អាតដែលធ្វើឲ្យយើងអត់ទ្រាំពុំបាននឹងទម្លាក់កាយអង្គុយចុះ និងថតផ្តិតយករូបភាពទុកជាអានុស្សាវរីយ៍។ បោះជំហានបន្តចូលទៅកាន់ភោជនីយដ្ឋាននៅបរិវេណខាងក្នុងនៃទីធ្លាដ៏ធំទូលាយ មានទាំងសួនច្បារធម្មជាតិបៃតងខ្ចី នឹងធ្វើឲ្យភ្ញៀវដែលមកកាន់ទីនេះមានរម្មណ៍ថា ហាក់បានទៅសម្រាកលម្ហែនៅឯខេត្តយ៉ាងដូច្នោះដែរ។ មកដល់តុអង្គុយក្រោមម្លប់ឈើ ដៃស្រវាកាន់បញ្ជីរាយមុខម្ហូបឃើញថា ទីនេះមានបម្រើទាំងមុខម្ហូបដល់ទៅជាង៤០មុខ ដែលមានទាំងម្ហូបបែបខ្មែរ និងម្ហូបបែបអឺរ៉ុប។ កុម្មង់ម្ហូប៣ទៅ៤មុខ កំពុងតែស្លុងអារម្មណ៍នឹងធម្មជាតិ អមដោយតន្រ្តីយ៉ាងពិរោះលន្លង់លន្លោច មិនបានប៉ុន្មានផងម្ហូបដែលកុម្មង់ក៏បានមកដល់លើតុបង្ហើរជាមួយក្លិនឈ្ងុយ និងសោភ័ណភាពគួរឲ្យចង់ភ្លក់ចង់ពិសាបំផុត។
តាមការជំនួបជាមួយម្ចាស់ហាងលោកបាឲ្យដឹងថា ទីនេះបែងចែកអាហារជា៣ផ្នែកផ្សេងគ្នា ទី១គឺ Taster Menu សម្រាប់ភ្ញៀវដែលចង់ភ្លក់មុខម្ហូបច្រើនមុខ មួយមុខបន្តិចក្នុងចានតែមួយ ទី២ Main សម្រាប់ភ្ញៀវដែលចង់ពិសាអាហារចម្អែតតែម្តងឬមុខម្ហូបណាមួយដែលជាចំណូលចិត្ត។ ចុងក្រោយនោះគឺសម្រាប់ភ្ញៀវដែលអញ្ជើញមកជាក្រុមមានគ្នាច្រើនហើយចង់កុម្មង់អាហារដែលអាចទទួលទានរួមគ្នាជាឈុត អាចជ្រើសជម្រើសទី៣គឺ Sharing Special ។ ក្រៅពីនេះ ក៏មានជម្រើសភេសជ្ជៈជាច្រើនប្រភេទ រាប់តាំងពីកាហ្វេ តែ រួមទាំងស្រាក្រឡុកផងដែរ។
ជាមួយនឹងបទពិសោធន៍ថ្មីនៅសួនច្បារក្នុងព្រៃកណ្តាលក្រុងភ្នំពេញនេះ យើងមិនត្រឹមតែបានភ្លក់នូវរសជាតិម្ហូបបែបថ្មីដ៏ឈ្ងុយឆ្ងាញ់ប៉ុណ្ណោះទេ ថែមទាំងបានណែនាំកន្លែងថ្មីសន្លាងទៅកាន់ប្រិយមិត្តដើម្បីត្រៀមទុកសម្រាប់ថ្ងៃសម្រាកលម្ហែនាថ្ងៃចុងសប្តាហ៍ ឬចង់រកកន្លែងអង្គុយដើម្បីបំពេញការងារបន្ថែម ក៏ដូចជាអង្គុយជួបជុំលេងកម្សាន្តបន្ទាប់ពីបានធ្វើការងារដ៏នឿយហត់ពេញមួយថ្ងៃផងដែរ។ សួនច្បារ «Maloop» បើកទទួលស្វាគមន៍ភ្ញៀវរៀងរាល់ថ្ងៃអង្គារ ដល់ថ្ងៃអាទិត្យ ចាប់ពីម៉ោង១១ព្រឹក រហូតដល់ម៉ោង១១យប់៕
Article by SOUNG SOKSAN
